aMt 24:43+, 25:13; 2Pe 3:10; Syg 3:3
bEp 5:8+; 1Yo 1:7
cMt 25:1-13; Ro 13:11+; Ep 5:14
dEp 6:13+
eRo 5:9; 1Tes 1:10; 2Tes 2:13+
fRo 14:8+; 2Kor 5:15; 1Tes 4:14
gHib 10:24+
h1Tim 5:17; Hib 13:17
iGa 6:2+; Kol 3:12; 2Tes 3:11+
jMt 5:39+; Ro 12:17; 1Pe 3:9
kPil 4:4
lLu 18:1; Ro 12:12; Ep 6:18; Kol 4:2
mEp 5:20; Kol 3:17
oEp 4:30
p1Kor 14:29; 1Yo 4:1
qRo 15:33; 1Kor 1:8+; 1Tes 3:13; 2Tes 3:16
rPil 1:6; 2Tes 3:3
sRo 15:30; Kol 4:3; 2Tes 3:1
tRo 16:16

1 Thessalonians 5

Tagharaat tauud ve tasaŋan mulaaŋ to Tiina toit

Yam toŋvetaz, sawa kat to Tiina toit imuul inim, nene irau nimbood saveeŋa eta payam maau. Pasa, taumim awatag wa. Sawa to Tiina toit imuul inim, nene pale ikarmotin ghiit inimale yubyub to inim pa mboŋ. a 

Tamtoghon pale tigham ŋgar tighaze: “Aa, aazne taneep poia kat. Mbeb eta irau iwaghamun ghiit maau.” Pale tisavsaav tovene, ve rikia moghon pataŋani tiina ivot padi le iwaghamun di kat. Pale ikarmotin di inimale yabyabuuŋ to ighamgham ndiliva pa popaaŋ. Ve irau tighau pani maau.

Eemoghon yam toŋvetaz, aazne aneep ila ndoroom lolo maau. Tovenen sawa tonenen irau ikarmotin gham inimale yubyub maau. Pasa, yam asob tamtoghon to ndag ve alaagh ila ghazooŋa to Maaron. Iit tanimale yes to mboŋ to tineep ila ndoroom lolo ne maau. b 

Tovenen iit tagheen le lolood imaagh inimale tamtoghon pida malep. Tapamaat ve taŋgin tauud pooi. c 

Iit tawatag: Yes to tigheen, nene tigheen pa mboŋ. Ve yes to tighun le tisami, nene tighun pa mboŋ. Eemoghon iit tamtoghon to ndag. Tovenen iit irau taŋgin tauud pooi. Ve taghur ila ariaŋa, ve lolood pa Maaron ve tamtoghon paam. Pasa, ŋgar tovene, nene inimale mbeb ariaŋa to ipoon ateed pa ndaab. Ve taghur mataad pa sawa to Maaron igham mulin ghiit ve taneep pooi. Pasa, ŋgar tovene, nene inimale guduuŋa ariaŋa to ipoon dabaad pa ndaab. d 

Aghita. Maaron ighur ghiit pa mbalmbali toni iza toit ne maau. Ye ighur ghiit pataghaaŋ ighaze igham mulin ghiit ila uraat to Yesu Krisi, leso taneep pooi. e 

10 Krisi igham inaad ve imaat pait, leso igham ghiit tala taneep tomani. Tovenen sawa to mulaaŋ toni, ighaze tamaat, ma taneep mataad iyaryaar, nene ye pale igham ghiit tala itiŋa taneep. f 

11 Tovenen yam asob awapalotin gham ve apariaaŋ nditamim pa ŋgar to Krisi, inimale aazne yam aghamghami ne. g 

Tutuuŋ pida

12 Yam toŋvetaz, ŋginiiŋa tiam tighamgham uraat tiina ila yam lolomim, ve tipasaluŋgan gham, leso ataghon katin Tiina toit ŋgar toni. Tovenen yei nighason gham pa atandag padi, ve aneep ila sambadi. 13 Apakur di, ve lolomim padi kat. Pasa, yes tighamgham uraat tiina payam. Ve yam asob alup lolomim inim ee moghon, ve aneep toman ŋgar luuma. h 

14 Yam toŋvetaz, yei nighaze nipalot gham pa ŋgar pida. Yes to maatedi pa uraat ve tinepneep sorok, yam asaav ariaŋa padi leso tigham uraat. Ve yes to matadi matughezaaŋ, ma lolodi ipataŋan, yam apalot di. Ve yes to tapiridi maau ve tirau tigham uraat maau, yam auul di. Apatooŋ ŋgar luuma pa tamtoghon tisob. Ighaze tamtoghon eta igham samin gham, atatan atemim ve ambaada moghon. i 

15 Tovenen ighaze tamtoghon eta igham ŋgar samia payam, yam ayati malep. Sawa isob, atoova pa apatooŋ ŋgar poia pa taumim ve tamtoghon tisob. j 

16 Lolomim poia irau sawa isob. k 

17 Ve asuŋ irau sawa isob. Apul suŋuuŋ malep. l 

18 Sa mbeb to ighaze ivot payam, lolomim poia pa Maaron ve apaiti. Pasa, ye ighaze yam tamtoghon to anim Krisi le, agham tovene. m 

19 Arab matin yab to Avuvu Patabuaŋ malep.
(5:19) Saveeŋ waaro tonene, ŋgara tovene: Ighaze Avuvu Patabuaŋ ipamundigin ghiit pa ghamuuŋ ŋgar eta, nene taghami moghon. Tazoor ŋgar toni malep. Ve ighaze ye igham uraat tiina ila nditaad pida lolodi, nene paam, tayou avood padi malep.
,
o 

20 Ve Maaron aliŋa to propet toni tisavia payam, yam avelegi, ma aghita inimale saveeŋ sorok malep. 21 Eemoghon yam irau aŋgabiiz poian saveeŋ ve ŋgar to naol ne. Ighaze popoiadi, ghoro akis di ve ataghon di. p 

22 Ve ŋgar samsamia to naol ne, yam aneep saguan padi.

Paulus ipasob saveeŋ toni

23 Maaron toit, ye ŋgar luuma pughu ve iŋgin ghiit taneep pooi irau sawa isob. Ye tau pale igham gham ataghon ŋgar patabuaŋ moghon. Ve iŋgin anunumim, lolomim ve ŋgar tiam, toman anoŋamim, ve igham gham ataghon ŋgar poia moghon le irau mulaaŋ to Tiina toit Yesu Krisi. Leso lemim sosor eta ila mata sob. q 

24 Maaron to ipoi gham anim le, ye pale igham tovene. Pasa, ye avo onoon, ve itataghon saveeŋ mbuaaŋ toni. r 

25 Yam toŋvetaz, matamim iŋgal ghei, ve aghur ghei ila suŋuuŋ tiam. s 

26 Akis toŋvetaz to Krisi tisob nimadi, ve agham di toman lolomim poia. t 

27 You nasaav ariaŋa payam ila Tiina toit iza: Awaat rau tonene pa toŋvetaz toit tisob to tighur ila to Krisi.

28 Poia to Tiina toit Yesu Krisi iza tiam. Onoon.

Copyright information for `TUCO