aRo 13:1; Ep 6:18; Pil 4:6
bYo 3:16+; 1Tim 4:10
c1Kor 8:4+; Ga 4:4+; Hib 9:15
dMk 10:45; Ep 1:7+
eGa 1:16, 2:7+; Ep 3:7+; 2Tim 1:11
fMbo 134:2; Mt 5:23+
g1Pe 3:3+
h1Tim 5:10
i1Kor 14:34+
jMbnp 2:21+, 3:1+; 1Kor 11:8+

1 Timothy 2

Taghur tamtoghon tisob ila suŋuuŋ toit

Yo, mbeb tiina to naghaze napalot gham pani muuŋ, nene vene: Yam irau aghur tamtoghon tisob ila suŋuuŋ tiam. Asuŋ pa Maaron toman lolomim poia pani, ve aghasoni pa iuul di ve igham pooz padi. Aghur yes kinik toman daba tisob to taneep ila sambadi ne, ila suŋuuŋ tiam. Leso pataŋani indeeŋ ghiit sob, ve taneep poia toman lolood luuma, ve mataad iŋgal Maaron ve tataghon ŋgar toni, ve taŋgin tauud pooi tanimale yes to ledi ŋgar pa Maaron. a 

Suŋuuŋ tovene, nene poia ila Maaron to Volaaŋa toit ne mata, ve ighami lolo poia. Pasa, ye ighaze igham mulin tamtoghon tisob, ve igham di tiwatag katin saveeŋ onoon. b 

Iit tawatag:

Maaron ee moghon to inepneep.
Ve Ŋgeu ee moghon to iyoon bodbodaaŋ pa Maaron ve iit tamtoghon, ve ilup ghiit tanim ee moghon. Nene Yesu Krisi. c 
Ye izi inim taan ve inim tamtoghon, ve iyokia tau ve imaat pa iit tasob.
Tauto ighol sosor toit atia,
ve ipas ghiit tavot pa samia tapiri.
Mbeb tonenen ivot ila sawa to Maaron tau ighuri, ve ipariaaŋ ghiit pa taghur ila saveeŋ toni. d 
Maaron ighur ghou nanim mbaŋooŋa toni, ve ighur uraat inim nimag ighaze navotia saveeŋ tonene pa tamtoghon. (Saveeŋ tiou tonene, kaarom maau. Onoon moghon.) Tauto napatoot yes to Yuda maau ne pa Maaron aliŋa, leso tiwatag katin saveeŋ onoon, ve tighur ila to Yesu Krisi toman lolodi. e 

Ŋgar to nditamoot irau titaghoni ila sawa to suŋuuŋ

You naghaze yam nditamoot to ndug to naol ne ataghon ŋgar tovene: Sawa to alup gham pa suŋuuŋ, yes nditamoot irau tigharaat taudi le tiŋgalaaŋ ila Maaron mata, ghoro tiit nimadi ve tisuŋ ila ival tiina matadi. Ve ŋgeu to ighaze ate yabyab soroksorok, ma izorzoor saveeŋ, nene ye irau ipul ŋgar toni tonenen ineeple, ghoro iit nima ve isuŋ. f 

Saveeŋ iŋarua yes ndiliva

You leg saveeŋ pida to iŋarua yes ndiliva paam. Yes tigham ŋgar to ndiliva nasolo malep. Tovenen yes irau tighur nonogiiŋa to poia ila tamtoghon matadi ve ŋgar todi. Ve timbuul dabadi raua ma tipiraii, ma tighur nonogiiŋa to atiadi tintina, ma titiik di pa gol ma mbaliiŋ pida malep. g 

10 Pasa, ndiliva to tisaav tighaze yes tiroron pa Maaron ve titaghon ŋgar toni, nene ŋgar popoia to tighamgham di, tauto tinim tikooŋ padi. h 

11 Ighaze alup gham pa suŋuuŋ, yes ndiliva irau tineep ila yes ŋginiiŋa sambadi, ve neneeŋadi, tighur taliŋadi pa Maaron saveeŋ toni, ve tigham ŋgar pani pooi. i 

12 You naŋgalsekin yes ndiliva pa uraat to patoŋaaŋ tamtoghon pa Maaron aliŋa. Ve titoova pa titatan nditamoot ve tinim daba padi malep. Yes irau neneeŋadi moghon, ve tighur taliŋadi pa saveeŋ. 13 Saveeŋ tiou tonene, pughu tovene: Maaron ighur Adam muuŋ, ghoro ighur Eva. Ve Ŋgeu Samia ila to Adam ve itombaana maau. Ye ila to liva ve itombaana. Tauto ye itap, ve imalaaŋ pa tutuuŋ to Maaron. j 

15 Eemoghon yes ndiliva to tivai ve tipoop, ighaze tikis ghurla todi ariaŋa, toman ŋgar to lolood pa tamtoghon, ve titaghon ŋgar patabuaŋ, ve tiŋgin taudi pooi, nene pale Maaron igham mulin di ve tineep pooi.

Copyright information for `TUCO