aMt 24:23+; 2Pe 3:3; Jud 18
bMbnp 9:3; Mk 7:19; 1Kor 10:30+; Hib 13:4
cRo 14:14; 1Kor 10:25
d1Tim 1:4, 6:20; 2Tim 2:16,23
eMbo 84:11; Mt 6:33; 1Tim 6:6
f1Tim 2:4
g1Kor 16:10+; Tit 2:7,15; 1Pe 5:3
h1Tim 1:18; 2Tim 1:6
iMbaŋ 20:28

1 Timothy 4

Paulus isavia ndiran kaaromŋa ŋgar todi

Avuvu Patabuaŋ isaav ghazooŋa pait wa: Muri, avuvu samsamiadi pale titombaan tamtoghon ve tighamun ŋgar todi, leso tipul muridi pa saveeŋ onoon to iit taghur ila ne, ve tighur taliŋadi pa ŋgar kaarom naol ve titaghon di. a 

Ndiran kaaromŋa tonowen, Ŋgeu Samia igham di tinim le wa. Tauto tiyamaan sosor todi muul maau, ve tiparim taudi pa ghurla todi. Yes tiŋgalsekin tamtoghon pa vaiuuŋ, ve ghaniiŋ aniiŋ pida. Eemoghon aniiŋ to naol ne, Maaron ighur di, leso iit to taghur ila toni ve tawatag saveeŋ onoon ne, tagham di ve taghan di toman lolood poia pani. b 

Mbeb tisob to Maaron ighur di, popoiadi moghon. Tovenen tazurun eta malep. Tagham di ve taghan di toman lolood poia pa Maaron. c 

Pasa, saveeŋ to Maaron toman suŋuuŋ toit to izala aniiŋ pogho, nene ighami inim mbeb patabuaŋ to Maaron to poia pa ghaniiŋ.

Paulus ipalot Timoti, leso inim mbesooŋa poia to Yesu Krisi

O Timoti, saveeŋ poia to iit taghur ila ne, tipatoot ghom pani ve utaghoni wa. Ighaze saveeŋ tonenen ipalot ghom inimale aniiŋ poia, ve upaesia aliŋag to ineep ila rau tonene pa yes toŋvetaz to Krisi, nene pale unum mbesooŋa poia to Yesu Krisi. Eemoghon saveeŋ kaarom ve vuvuaaŋ soroksorok to tisasavia itaghon taan ŋgara, yom ughur taliŋam pani rita malep.Matam iŋgal Maaron ve uzuaria ghom le utaghon katin ŋgar toni. d 

Ighaze tazuaria ghiit pa ghamuuŋ anoŋaad tapiri ivot inim tiina, nene iuul ghiit ris moghon. Ve ighaze tazuaria ghiit pa taghoniiŋ ŋgar to Maaron, nene iuul ghiit kat. Pasa, iuul ghiit pa nepooŋaad to aazne, ve nepooŋaad to muri paam. e 

Saveeŋ tonene, nene onoon moghon. Irau taghur ila kat. 10 Maaron mata yaryaara, ye iuluul tamtoghon tisob. Ve yes to tighur ila toni, ye inim Volaaŋa tau todi, ve igham mulin di. Iit taghurghur mataad pani ve nepooŋ poia to ye pale igham pait. Tauto tazuaria ghiit ve tagham katin uraat. f 

11 Saveeŋ tiou isob tonene, upatoot tamtoghon pani, ve usaav ariaŋa padi leso titaghoni. 12 Onoon, yom ŋgeu paghum. Eemoghon tamtoghon matadi izi payom malep. Yom irau unum patoŋaaŋ poia eez pa yes to tighur ila to Krisi. Saveeŋ tiom toman gabuam isob irau deŋia moghon. Tovenen lolom pa tamtoghon ve ugham poian di, upatooŋ ghurla tiom ivot ighazooŋ, ve ugham ŋgar ŋgalaaŋa moghon. Leso tamtoghon tighita ŋgar to ughamghami, ve titaghon ghom. g 

13 Sawa to usasaŋan ghou, upul taum kat pa uraat tiom. Uwatwaat Maaron aliŋa pa tamtoghon, upatoot di pani, ve upalot di pa titaghoni.

14 Muuŋ, sawa to yes ŋginiiŋa tighur nimadi izala poghom ve tighur ghom pa uraat, Avuvu Patabuaŋ ipamundigin tamtoghon pida ve tivotia Maaron aliŋa payom. Sawa tonenen, Maaron Avuvu irei tapiri ve ŋgar popoia pida payom, leso upalot lupuuŋ to Krisi pani. Tovenen umamalai pa uraat tiom malep. Tapiri ve ŋgar popoia to ineep tiom ne, matam iza pani ve ugham anoŋa ivot. h 

15 Ŋgar isob to nasavia di payom ila rau tonene, matam kisin di, ve utaghon katin di. Upul taum kat pa taghoniiŋ di. Leso tamtoghon tisob to matadi ilatlat tiom, tighilaal ghom tighaze yom uzuaria ghom ila ila, le ŋgar tiom toman uraat tiom ivot kat. 16 Tovenen matam imosmoos pooi pa taum, toman saveeŋ to upatoot tamtoghon pani. Ighaze ukis ŋgar tovene, nene pale Maaron igham mulin ghom, ve yes to tiloŋlooŋ saveeŋ tiom ne paam. i 

Copyright information for `TUCO