a2Kor 1:24, 5:20; Hib 12:15
bIs 49:8
cLu 4:18+; Hib 3:13
dRo 14:13; 1Kor 8:13, 10:32
e2Kor 4:9+
gMbaŋ 16:23; 2Kor 11:23+
hRo 12:9; 2Kor 4:2; Ga 5:22; Kol 3:12; 1Tim 4:12
i1Kor 2:4; 2Kor 10:4
jMbo 118:18; 2Kor 4:9+
k2Kor 7:4, 8:9; Pil 2:17
l1Kor 4:14
m1Kor 5:9+; Ep 5:6+,11; 1Yo 1:5+
o1Kor 10:20+
pWkp 26:12; Ezek 37:27; 1Kor 3:16; Syg 21:3
qWkp 5:2; Is 52:11; Syg 18:4
rRo 8:14; Syg 21:7

2 Corinthians 6

Yeiŋa Maaron niluplup ghei pa uraat toni. Tovenen nighaze nipalot gham tovene: Poia to Maaron to iza tiam, nene irau ipamundigin gham pa ataghon Maaron ŋgar toni. Leso poia toni tonanan anoŋa ivot. Ighaze maau, nene pale inim mbeb sorok. a 

Maaron aliŋa isaav tovene:

“You taug naghur sawa pa nagham mulin gham ve nagham poian gham. Ve sawa kat tonenen, nalooŋ suŋuuŋ tiam, ve nauul gham.” b 
Alooŋ. Sawa to Maaron igham mulin ghiit ve igham poian ghiit, tauto aazne taza pani wa. c 

Nepooŋ to mbesooŋa tau to Krisi

Mbesooŋ tiei to nighamghami pa Krisi, yei nighaze nitaghon ŋgar to deŋia kat ila tamtoghon matadi. Lolomai pa nigham ŋgar eta isosor maau. Pa vene, nigham tamtoghon titap pa ghurla todi. d 

Ŋgar tiei isob, nene ipatooŋ ghei ighaze yei mbesooŋa to Maaron. Pasa, pataŋani naol tighamgham ghei, eemoghon niyoon ariaŋa pa badooŋ di. Moghon moghon pataŋani izaza tiei, ve sawa pida, nighita nighaze lemai ataam muul maau. e 

Tamtoghon tiloslos ghei, ve tighurghur ghei nilooŋ nila ruum to yabyabuuŋ, ve nighamgham samia ila malmal. Yei nirab taumai pa uraat to Krisi le tapirimai isob kat. Ve sawa naol, nigheen pooi maau, ve pitool matmatin ghei.
(6:5) Ataam ite to tatoor saveeŋ waaro tonene, nene vene: “Sawa naol, yei nigheen pooi maau. Nipamaat ve niŋgun taumai pa ghaniiŋ aniiŋ, leso matamai iŋgal suŋuuŋ.”
,
g 

Yei nitaghon ŋgar ŋgalaaŋa moghon ila Maaron mata, ve nighazooŋ pa ŋgar toni, ve nighamgham poian tamtoghon. Ve ighaze tigham samin ghei, yei nitatan taumai ve nimbaada moghon. Avuvu Patabuaŋ inepneep toman ghei, ve nighur lolomai pa tamtoghon kat. h 

Yei nisasavia saveeŋ onoon moghon, ve Maaron tapiri ipapalot ghei. Mbeb tiei to malmal, nene ŋgar to deŋia ila Maaron mata. Ŋgar tonene inim iiz pa niparab pani, ve inim sigeu pa nipoon taumai pani. i 

Sawa to nigham uraat to Maaron, tamtoghon pida tipait izamai, ve pida tiveleg ghei tighaze yei tamtoghon sorok. Tamtoghon pida tipait varumai, ve pida tiwaghamun izamai. Tamtoghon pida tighita ghei tighaze yei mbesooŋa tau to Maaron, ve pida tighaze yei nigham kaarom ve nipaghau tamtoghon pa ataam to Maaron. Tamtoghon pida tighazooŋ payei, ve pida tikankaan payei. Sawa pida, nigham ŋgar nighaze paam nimaat. Eemoghon nimaat maau. Pataŋani pida to tivot payei, nene pa ipasaluŋgan ghei. Eemoghon irab ghei nimaat maau. j 

10 Onoon, pataŋani naol to nimbadbaad di ne, tigham ghei lolomai ipataŋan. Eemoghon Maaron igham ghei lolomai poia irau sawa isob. Yei ndiran mbolaaŋa. Eemoghon niuluul ival tiina le tiraua kat pa mbeb popoia to Maaron. Yei lemai mbeb eta maau. Eemoghon nirau mbeb to naol. k 

Paulus ivotia lolo pa yes Korin

11 O yam Korin, yei lolomai payam kat, tauto nisavia saveeŋ naol tonene payam. Leso awatag katin lolomai. Eemoghon nighita nighaze yam aponpoon lolomim payei sone. 13 You nasaav payam inimale ndinatug yam: Apoon lolomim payei muul malep. Aghur lolomim payei, inimale yei nighur lolomai payam. l 

Taghur muriid pa ŋgar samsamia

14 Alooŋ. Yes to tighur ila to Krisi maau ne, yam ala toman di pa ŋgar todi malep. Pasa, ŋgar todi inimale yam maau. Yes to titaghon ŋgar deŋia ve yes to timalaaŋ pa Maaron tutuuŋ toni, pale tilup di pa uraat vena? Ghazooŋa ve ndoroom irau tilup di? Maau. m 

15 Ma Krisi yesuru Sadan
(6:15) Paulus imbood Belial (o Beliar). Belial, nene Sadan iza ite.


tigham ŋgar raraate? Ighaze tamtoghon eez ighur ila to Krisi, ve ite ighur ila maau, sa mbeb irau ilup yesuru? Maau. o 

16 Yam awatag: Iit tanim Maaron mata yaryaara rumai toni. Vena, irau talup rumai toni toman rumai to maaron kaaromŋa? Maau. Saveeŋa, Maaron isavia pataghaaŋ wa. Ighaze:

“You pale naneep toman di, ve nalaghlaagh ila lolodi.
Ve you pale nanim Maaron todi, ve yes tinim tamtoghon tiou.” p 
17 Tauto Maaron isaav muul ighaze:

“Apul ndiran samsamiadi tonanan tineep, ve ala aneep saguan padi.
Ve mbeb to ighaze iŋgalaaŋ maau, yam agharaui malep.
Leso nagham gham toman lolog poia. q 
18 ve nanim tamamim, ve yam anim ndinatug ve ndinatug liva.
Saveeŋ tonene, nene Maaron ariaŋa tau aliŋa.” r 
Copyright information for `TUCO