bLu 1:1+, 9:51, 24:13+; Yo 20:19+; 1Kor 15:5+
cLu 24:49; Yo 14:16+; Mbaŋ 2:2+,33
dLu 3:16
eMika 4:8; Lu 24:21
fMk 13:32+; 1Tes 5:1+
gLu 24:47+; Mbaŋ 2:1+
Act 1
h[Mk 16:19-20; Lu 24:50-53]
 
iLu 24:4
jMt 26:64; 1Tes 4:16; Syg 1:7
kLu 24:52
lMbo 41:9
mMt 27:3+
nMbo 69:25
oMbo 109:8
pLu 24:48+
qYo 2:25; Syg 2:23

Acts 1

Paesiiŋ to Lukas

O Teopilus, uraat naol to Yesu igham di muuŋ, toman saveeŋ isob to ye ipatoot tamtoghon pani, tauto ineep ila rau to nambooda ilat tiom muuŋ.
(1:1-3) Rau to Lukas imbooda muuŋ, nene varu poia toni.


Saveeŋ toman uraat toni tonowen inim inim le Maaron ighami imuul iza ila pa sambam. Yesu imaat ve imundig muul, ve mboŋi tamoot ru to itaghoni, ye ila ivotvot to yes mbaŋooŋa toni to ye tau isia di tinim le, ve ipatooŋ tau padi ila ataam naol. Leso tiwatag kat tighaze ye imundig pa mateeŋ, ve ineep mata iyaryaar. Sawa tonenen, ila uraat to Avuvu Patabuaŋ, ye ipaghazoŋan ŋgar todi pa tutuuŋ toni pida. Ve isavsaav padi pa pooz to Maaron. b 

Yesu isaav pa mbaŋooŋa toni ighaze mala maau pale Avuvu Patabuaŋ izi inim

Sawa eez, Yesu toman mbaŋooŋa toni tinepneep, ve Yesu isaav padi ighaze: “Apul Yerusalem rikia malep. Aneep ve asaŋan pa mbeb to Tamaŋ ighaze igham payam itaghon saveeŋ mbuaaŋ toni. Mbeb tonowen, you nasavia payam ve alooŋ saveeŋa wa. c 

‘Yoan, ye irughuuz tamtoghon pa ya. Eemoghon yam, mala maau pale Maaron igham Avuvu Patabuaŋ payam.’” d 

Ghoro mbaŋooŋa toni to tinepneep tomani, tighasoni tighaze: “Tiina, vena? Sawa to ughaze ugharaat mulin nepooŋ to yei Israela leso taumai niŋgin ndug tiei, tau tonene?” e 

Yesu ipamuul aliŋadi ighaze: “Sawa to mbeb tovene, yam irau awatagi maau. Nene ineep to Tamaŋ moghon. Ye tauto ighur sawa pa mbeb tisob tivot. f 

Ve alooŋ. Sawa to Avuvu Patabuaŋ izi inim ve izala poghomim, yam pale agham tapirimim tiina ila toni. Leso ayoon ariaŋa pa votiaaŋ varug ve apariaaŋ saveeŋ tiou. Pale agham uraat tonene izi Yerusalem muuŋ. Le isob, ghoro alaagh irau taan isob to Yudea, ve ala pa Samaria, ve alaagh irau taan dige to naol.” g 

Yesu imuul iza ila pa sambam h 

Yesu isavsaav padi le isob, ghoro Maaron indaea ila matadi, ve imuul iza ila pa sambam, le yaghur tae ipoona ve tighita muul maau. 10 Matadi itaghoni ve izala, ve mala maau, ndiran ru tivot todi ve yesŋa tiyondyood. Nonogiiŋa todi pisosooŋa moghon. Yesuru tisaav padi tighaze: i 

11 “Yam ndiran to Galilaia, pughu vena to ayondyood ve matamim izazala pa sambam? Alooŋ. Yesu tonowen, aazne Maaron ighami ipul gham, ve imuul iza ila pa sambam. Eemoghon muri, ye pale imuul izi inim raraate inimale aazne yam aghita iza ila.” j 

Tighur Matias igham Yudas ina

12 Ghoro taghoniiŋa toni tipul lolooz Oliv, ve timuul tila pa Yerusalem. Lolooz tonowen ineep igharau Yerusalem, irau 1 kilomita ma venen. k 

13 Yes tilaagh tila tivot Yerusalem, ve malmalidi tizala pa inadi to nepooŋ to ineep ruum lolo sala. Ndiran tonowen, nene Petrus yesuru Yoan, Yakobus ve Andreas, Pilip yesuru Tomas, Patoromai ve Matayu, Yakobus ite to Alapai natu, Simon (ye to yes Selot), ve Yudas to Yakobus natu. Sawa isob, yesŋa Yesu tina Maria toman nditazi ve ndiliva pida, lolodi ee moghon ve tiluplup di pa suŋuuŋ.

15 Sawa eez, yes to tighur ila to Yesu tilup di. Yes irau tamoot liim avua tamoot ee (120) ma venen. Petrus imundig iyoon ila lolodi, ve isaav padi ighaze: 16 “Yam toŋvetaz, muuŋ, Avuvu Patabuaŋ ipamundigin kinik David ve ivotia Maaron aliŋa to iŋarua mbeb to ivot pa Yudas. Saveeŋa ineep ila Maaron aliŋa to timbooda, ve aazne anoŋa ivot wa. Pasa, Maaron aliŋa isob pale ighur anoŋa ivot itaghon ye tau ŋgar toni. Yam awatag: Yesu igham Yudas inim taghoniiŋa toni, ve itiŋa taluplup ghiit ve tambesmbees pa uraat to Maaron. Eemoghon muri, Yudas ilaagh toman Yesu koia, ve ipatooŋ di pani, tauto tikisi. l 

18 Ŋgar to Yudas ighami, deŋia maau. Eemoghon tigham le atia, ve ighol le taan pida eez pani. Eemoghon ila itap izala taan tonowen, le apo ivavaal ve kodkoda imaliŋ. 19 Mbeb tonenen varu ilaan irau tamtoghon tisob to Yerusalem ve tilooŋa. Pughu tonene to tiwaat taan tonowen ila taudi aliŋadi tighaze: ‘Akeldama.’ (Akeldama pughu, nene vene: ‘Taan to siŋ.’) m 

20 “Saveeŋ waaro eez to ineep ila Mbouŋ To Yes Israela, isaav tovene:

‘Ina to nepooŋ pale ŋginiŋa.
Tamtoghon eta irau ineep tonowe muul maau.’ n 
“Ve Maaron aliŋa waaro ite isaav ighaze:

‘Tamtoghon ite irau igham ina, ve igham uraat toni to ŋginiiŋ.’ o 
21 “Tovenen tamtoghon eta irau igham Yudas ina. Leso yeiŋa nipariaaŋ mundigiiŋ to Yesu saveeŋa. Taghita tamtoghon toit eta to inepneep toman ghiit ve itiŋa Yesu talaghlaagh pa sawa to Yoan ŋgeu rughuzaaŋa igham uraat toni, ve inim sawa to Maaron indae Yesu a ipul ghiit, ve imuul iza ila pa sambam.” p 

23 Petrus isavsaav le isob, ghoro tipayoon ndiran ru: Yosep Barsabas to iza ite Yastus, ve Matias. 24 Tipayoon yesuru, ve tisuŋ pa Maaron tighaze: “O Tiina tiei, yom uwatag tamtoghon tisob lolodi. Tovenen ndiran ru tonene, upatooŋ sei to yom ughaze ughuri igham Yudas ina. Leso inim mbaŋooŋa tiom ve igham uraat tiom tonene. Pasa, Yudas, ye ipul muri pa uraat tiom, ve imaat gha ila ndug to yom ughuri pani pataghaaŋ wa.” q 

26 Tisuŋ le isob, ghoro tiŋgozŋgooz le ipatooŋ Matias. Tauto Matias igham Yudas ina, ve iŋgal mbaŋooŋa saaŋgul ve eez le tinim saaŋgul ve ru muul.

Copyright information for `TUCO