bMbnp 11:31, 12:1
cMbnp 12:4+
dMbnp 12:7, 17:8; Hib 11:13
eMbnp 15:13+; Igham 12:40
fIgham 3:12
gMbnp 17:10+, 35:18
hMbnp 39:2,21+
iMbnp 41:37+
jMbnp 41:54, 42:1+
kMbnp 42:1+, 45:1+
lMbnp 45:9+, 46:26+
mMbnp 46:1+, 49:33
nMbnp 23:3+, 33:18+, 50:7+
oIgham 1:7
pIgham 1:9+
qIgham 2:2
rIgham 2:11+; Hib 11:24+
sIgham 3:6
tIgham 3:5+
uIgham 7-11, 14-17; Mbo 105:27
vLo 18:15; Mbaŋ 3:22
wIgham 19:1-20:17
xIgham 32:1+, 32:23
yMbo 106:19
zMbo 81:12; Yer 19:13
abAmos 5:26-27
adIgham 25:9,40; Hib 8:5
aeYos 3:14+, 18:1
af2Sam 7:1+; Mbo 132:1+
ag1King 6:1+
ahMbaŋ 17:24
aiIs 66:1-2; Mt 5:34+
ajIgham 32:9; Lo 10:16; Is 63:10
akMt 23:31+; Lu 13:34; 1Tes 2:15
alMbaŋ 7:38; Ga 3:19
amMk 16:19; Lu 22:69
anMbo 110:1; Ro 8:34; Kol 3:1
aoMbaŋ 22:20; Hib 11:37
apMbo 31:5; Lu 23:46
aqMt 5:44; Lu 23:34

Acts 7

Stepanus isavia yes Yuda gabuadi: Muuŋ ve inim, yes tizorzoor Maaron aliŋa

Ghoro daba to watooŋrau ighason Stepanus ighaze: “Laak, saveeŋ to tisavia ne, nene onoon?”

Muuŋ, Maaron ivot to Abaram izi taan suruvu to Mesopotamia

Stepanus ipamuul aliŋa ighaze:
(7:2) Saveeŋ to Stepanus mata ru. Eez, nene yes Yuda tigham ŋgar tiina kat pa taan todi ve rumai todi to iyoon izi Yerusalem. Yes tighaze ndug tonowen, nene Maaron ina kat. Eemoghon Stepanus isaav tovene: Maaron ineep ndug tonowen moghon maau. Ndug sine to tamtoghon toni tineep pani, ye ineep toman di. Ve saveeŋ toni mata ite, nene vene: Muuŋ ve inim, yes Yuda tizorzoor Maaron aliŋa.


“Yam nditamaŋ ve toŋvetaz tiou, alooŋ saveeŋ tiou tonene ve agham ŋgar pani pooi. Muuŋ kat, sawa to timbuud Abaram ila ineep izi ndug Aran sone, ve inepneep izi taan suruvu to Mesopotamia, Maaron toit to iza tiina pa tapiri ve poia toni ne ivot toni,
ve isaav pani ighaze:

‘Umundig, upul taan tiom toman siŋ tiom, ve ula. You pale napatooŋ ghom pa taan to naghaze uneep pani.’ b 
“Tovenen Abaram ipul Mesopotamia to taan to yes Kaldia, ve ila ivot ndug Aran, ve ighur ina to nepooŋ tonowe. Tama Tera imaat, ve muri ghoro, Maaron ipamundigin Abaram muul ve ilaagh inim ivot taan to aazne iit tanepneep pani ne. c 

Maaron igham taan rita inim Abaram le kat ne maau. Eemoghon sawa to Abaram le natu eta sone, Maaron imbua saveeŋ tomani ighaze ye pale igham taan tonene pani ve papaghu toni to muri pale tivot muri ne paam. Leso inim ledi kat. d 

Ve Maaron ipaghazoŋan Abaram pa mbeb pida to muri pale tivot ighaze:

‘Papaghu tiom pale tila tineep tinim loomba izi taan ite. Ve taan tonowen tamtoghona pale tigham di tinim mbesooŋa sorok, ve tigham samin di irau ndaman 400. e 
Eemoghon muri, you pale naghur atia iŋarua taan tonowen tamtoghona pa ŋgar todi samia, ve nagham papaghu tiom tipul taan tonowen, ve timuul tinim. Leso tisuŋ ve timbees payou izi sualen.’ f 
“Ghoro Maaron isaav pa Abaram ighaze ŋgar to zirooŋ nditamoot pale inim ghilalooŋ pa saveeŋ mbuaaŋ to yesuru. Tovenen sawa to Abaram azuwa ipoop Isak, ve mboŋi inim liim ve tol, ghoro tama iziri. Muri ghoro, Isak yesuru azuwa tipoop Yakop, ve Yakop toman ndizuwa tipoop ndinatudi saaŋgul ve ru to iit Israela tavot ila todi. g 

Maaron ineep toman Yosep izi Isip

“Yakop ndinatu tighita tamandi lolo pa tazidi Yosep kat, le ireu lolodi. Tauto tigholia ila to tamtoghon pida, ve anadi tighami tila Isip, ve inim mbesooŋa sorok izi tonowe. Eemoghon Maaron ineep tomani, h 

10 ve igham mulini pa pataŋani toni tisob. Sawa to tigham Yosep ila iyoon ila kinik to Isip mata, Maaron igham kinik lolo pani, ve ighilaala ighaze ye le ŋgar tiina. Tauto ighuri inim ŋginiiŋ pa ruum toni toman mbeb toni tisob, ve taan isob to Isip paam. i 

11 “Mala maau ve pitool tiina ivot irau taan isob to Isip ve Kanaan, ve igham di tineep sami kat. Iit Israela nditimbuud paam, tikaal adi aniiŋ le maau. j 

12 Eemoghon sawa to Yakop ilooŋ tighaze aniiŋ wit inepneep izi Isip, ye imbaaŋ ndinatu tila tighol adi aniiŋ, ve timuul tinim to tamandi. Nene laghooŋ to tighami muuŋ. 13 Tinepneep le aniiŋ todi isob, ghoro tizila Isip muul inim pae ru. Sawa tonenen, Yosep ivotia tau pa nditogha ve tazi. Ve kinik to Isip paam ilooŋ tighaze Yosep siŋ toni pida to tinim tinepneep. k 

14 Ghoro Yosep imbaaŋ ila pa tama Yakop ighaze yesŋa tamtoghon toni tisob tiyouyou, ve tizi tinim toni. Tamtoghon to timundig ve tizila Isip ne, yes irau tamoot tol saaŋgul ve liim (75). l 

15 Tovenen Yakop toman tamtoghon toni tizila Isip, ve yesŋa ndinatu tisob timatmaat izi tonowe. m 

16 Eemoghon titavia di izi Isip maau. Tigham patudi, ve timuul tila pa ndug Sekem, ghoro tighur di tilooŋ tila yaam saambu to Amor ndinatu to Abaram igholi pa yaam silva pida. n 

Maaron ineep toman Mose izi Isip ve Midian

17 “Saveeŋ to Maaron imbua toman Abaram, nene sawa inim igharau pa anoŋa ivot. Ve sawa tonenen, nditimbuud to tineep izi Isip, timasa tinim ival le ival kat. o 

18 Ghoro kinik paghu ana igham pooz pa Isip. Kinik tonowen ilooŋ Yosep varu pa uraat toni rita maau. 19 Ye iwatombanon nditimbuud, ve igham samin di kat. Ve isaav ariaŋa padi ighaze ndinatudi papaghu to ŋgaramus tipoop di, yes irau tipul di tineepledi. Leso timatmaat. p 

20 “Sawa tonenen, Mose tina ipoopa. Maaron ighita Mose ye pain paghuna kat ve lolo pani. Tina ve tama tiŋgini izi ruum todi irau kaiyo tol, q 

21 le pain tuŋia ve irau tiŋgooza muul maau. Ghoro tighami tila, ve tipuli izi ya Nil paŋa. Eemoghon kinik natu liva ilaagh ila le ighita. Tauto ighami inim le, ve iŋgini inimale ye tau natu. 22 Mose itub inim olman, ve tipatooti pa Isipa ŋgar todi to naol ne. Ye ŋgeu ariaŋa eez. Ve saveeŋ toni paam, toman tapiri.

23 “Ye inepneep le ndaman toni irau tamoot ru (40), ghoro igham ŋgar ighaze ila iŋgig yes Israela to tau siŋ toni. r 

24 Eemoghon sawa to ila ivot todi, ye ighita ŋgeu eez to Isip igham samin ŋgeu eez to Israel. Tovenen ilaan ila ivool to ŋgeu tonowen, ve irab Isip taamdi tonowen imaat inimale yatuuŋ sosor toni. 25 Mose mata iŋgal ighaze tamtoghon toni Israel avaat tighilaala tighaze Maaron ighuri pa igham mulin di pa pataŋani todi. Eemoghon ŋgar todi ivot pa mbeb tonenen sone.

26 “Mboŋ ndugizau, ghoro Mose imuul ila le ighita Israela ru anadi tiparab. Tovenen itoova pa isuul di pa malmal ve ilup di. Ve isaav padi ighaze: ‘Wai, yamru toŋvetaz! Awaghamun taumim pasa?’

27 “Eemoghon ŋgeu to imuuŋ pa malmal, ye imundig ve isipiir Mose ighau, ve isaav pani ighaze: ‘Ai, yom, sei ighur ghom ighaze unum ŋginiiŋ payei, to ughaze ugharaat saveeŋ tiei? 28 Vena, yom ughaze urab ghou namaat nanimale Isip taamdi to noor urabi imaat ne?’ 29 Mose ilooŋ saveeŋ tonene, ve imundig ve ighau ila ivot taan suruvu to yes Midiana. Ye ineep inim loom tonowe, le ivai, ve yesuru azuwa tipoop ndinatudi nditamoot ru.

30 “Ndaman tamoot ru (40) paam inim ila, ghoro aŋela eez ila ivot toni izi ndug balim to ineep igharau lolooz Sinai. Ivot toni inimale yab to ighanghan izala ai kainaŋen eez.

31 Mose mata ila ighita mbeb tonenen, le ruŋa iza ve igham ŋgar naol. Tovenen ila igharau ai tonowen ighaze ighita poiani. Eemoghon ilooŋ Ŋgeu Tiina aliŋa ivot ila yab tonowen ighaze:

32 ‘You Maaron to nditimbum. You Maaron to Abaram, Isak, ve Yakop.’ s 
Mose ilooŋ saveeŋ tonene, le ruŋa iza ve imbotoon nagho. Pasa, imatughez pa ighita Maaron.

33 “Maaron isaav pani muul ighaze:

‘Upas duduuŋa to aghem izi. Pasa, taan to uyondyood izala ne, nene patabuaŋ.
34 Ulooŋ. Tamtoghon tiou Israel to tineep Isip we, you naghita pataŋani todi wa. Yes Isipa tighamgham samin di, le tisami kat. Eemoghon taŋiiz todi, you nalooŋa wa. Tauto nazi nanim pa nagham mulin di pa pataŋani todi tonowen. Aazne, you naghaze nambaaŋ ghom umuul ula pa Isip. Tovenen umundig ve ula.’ t 

Sawa to yes Israela tineep izi ndug balim, tizorzoor Maaron aliŋa

35 “Aghita. Mose to muuŋ tizuruni ve tighaze: ‘Ai, sei ighur ghom unum ŋginiiŋ, to ughaze ugharaat saveeŋ tiei?’ Ŋgeu ee moghon tonenen, to Maaron imbaaŋ aŋela ila ivot toni inimale yab to ighanghan izala ai kainaŋen. Ve ighuri pa iŋgin yes Israela, ve igham mulin di pa pataŋani todi. 36 Ve ye to imuuŋ padi ve igham di tipul taan to yes Isipa, ve igham mbeb gharatooŋadi tintina tinim ghilalooŋ padi izi Isip, Te Kaviaaŋa, ve izi ndug balim paam irau ndaman tamoot ru (40). u 

37 Mose tonene, tauto isaav pa yes Israela ighaze:

‘Maaron pale ighur tamtoghon tiam eta inim propet, leso ivotia Maaron aliŋa payam inimale you.’ v 
38 “Mose toman ival tiina to Israel tinim lupuuŋ to Maaron izi ndug balim. Ve ye isavsaav toman aŋela izi lolooz Sinai, ve igham saveeŋ to nepooŋ mata yaryaara ila to Maaron, ve ipaesia pa nditimbuud. Saveeŋ tonowen, tauto iit Israela takiskisi ve inim aazne. w 

39 “Eemoghon nditimbuud tipul muridi pani ve lolodi pa tilooŋ saveeŋ toni maau. Ve tikausim muul ila pa nepooŋ todi to muuŋ tineep izi Isip. 40 Tovenen timundig ve tisaav pa Aron tighaze:

‘Ugharaat leed maaron pida! Leso timuuŋ pait ve tiŋgin ghiit. Pasa, ŋgeu to igham ghiit tapul Isip ve tanim taneep to sualen, yei nikankaan pani: Avaat mbeb eta ivot pani wa.’ x 
41 “Tauto tigharaat makau natu anunu inim maaron kaarom, ve tigham watooŋrau pani. Aghita. Mbeb to taudi tigharaata pa nimadi, yes tipaiti toman tinidi iza. y 

42 Tovenen muri, Maaron ipul muri padi, ve ipul di titaghon taudi ŋgar todi. Tauto timbees pa mbeb to tineep ila sambam paroŋania inimale ndag, kaiyo, ve pitum pida. Saveeŋa ineep ila rau to yes propeta. Ighaze:

‘O yam Israela, ndaman tamoot ru (40) to alaghlaagh izi ndug balim, yam aghamgham watooŋrau pa makau ve sipsip. Watooŋrau naol tonanan agham eta payou? Maau kat! z 
43 Ve sawa tonenen, yam ambaad mbeez to Molek toman pitum Repan anunu to maaron kaarom tiam, ve alaghlaagh toman di.
(7:43) Molek ve Repan, nene pitum tintina ru to muuŋ antuata tighur di tinim maaron padi. Molek, nene pitum Virae. Ve Repan, nene pitum to yes antuata tiwaata tighaze ‘Saturn.’

Maaron kaaromŋa tonanan, taumim agharaat di pa aput aghemim padi ve apakur di.
Tovenen you pale nareu gham, ve nandiir gham malmalimim ala aneep izi Babilon dige ite ve ila.’ ab 

Muuŋ, yes Israela ledi rumai tau maau

44 “Sawa to nditimbuud tilaghlaagh izi ndug balim, yes tilaghlaagh toman mbeez patabuaŋ. Mbeez tonowen, saveeŋ mbuaaŋ todi toman Maaron ineep ilooŋ ila.
(7:44) Muuŋ, Maaron isaav pa Mose ve ighur yaam babaŋadi ru tilooŋ tila bokis to saveeŋ mbuaaŋ to ineep mbeez patabuaŋ lolo. Leso yes Israela matadi kisin saveeŋ mbuaaŋ todi toman Maaron. Ŋgara tovene: Ighaze titaghon katin tutuuŋ tonowen, nene pale Maaron ineep toman di, ve yesŋa tilup di tinim ee moghon.


Sawa to tirei mbeez tonenen, Maaron isaav ariaŋa pa Mose ighaze ye irau itaghon katin mboom to mbeez to ighita izala lolooz Sinai. ad 

45 Nditimbuud tilaagh toman mbeez tonenen ila ila le tighuri ivool to papaghu todi. Ghoro anadi tilaagh tomani tila tila le tivot taan Kanaan. Sawa tonenen, Maaron ireu yes ndug ndug to tineep izi Kanaan tighau, ve Yosua igham yes Israela tilooŋ tinim tigham taan tonene inim ledi. Mbeez patabuaŋ tonenen inepneep le sawa to kinik David. ae 

46 David, Maaron lolo pani kat. Tovenen ye ighason Maaron ighaze iyok pani, ghoro irei Maaron to Yakop le rumai tau. Leso inim ina to nepooŋ. af 

47 Eemoghon David irei rumai eta maau. Natu Solomon to irei rumai. ag 

48 “Ve Maaron Tiina To Ilib Pa Ndimaronŋa Tisob Ne, ye ineep ilooŋ ila rumai eta to tamtoghon tireii pa nimadi ne maau. Pasa, propet eez ivotia Maaron aliŋa ighaze: ah 

49 ‘Sambam, nene you inag to ghamuuŋ pooz. Ve taan, nene ndug to naghur agheg izala.
Tovenen sa ruum muul to aghaze areii payou? Ve sa ndug muul to aghaze aghuri payou pa naneep pani? ai 
50 Maau. Pasa, taug nimag nagharaat mbeb naol tonenen.’”

Stepanus isaav ghazooŋa pa yes Yuda pa sosor todi

51 Ghoro Stepanus isaav pa yes to tipayoonda pa savsaveeŋ ighaze: “Yam ndiran to zoraaŋ saveeŋ. Ŋgar tiam ariaŋa kat animale yes to tiwatag Maaron maau! Ŋgar samia to ineep ila lolomim, Maaron iwaana ivot sone. Ve taliŋamim ivool kat. Sawa isob, yam azorzoor Avuvu Patabuaŋ ŋgar toni, inim muuŋ nditimbumim tighamghami. aj 

52 Aghita. Muuŋ, nditimbumim tipul propet eta ineep? Maau. Sawa naol, tighamgham samin di. Ve yes to muuŋ tivotia Maaron aliŋa tighaze ye pale imbaaŋ Mesia inim, nene nditimbumim tirab di tisob timatmaat. Ve sawa to ŋgeu deŋia tonowen tau inim, yam ataghon ŋgar raraate. Azi ve aghuri ila koia nimadi, ve tirabi imaat. ak 

53 Onoon, tutuuŋ to Maaron to aŋela tinim ataam pani ve izi inim, yam aghami wa. Eemoghon ataghoni maau.” al 

Tirab Stepanus imaat

54 Tilooŋ Stepanus saveeŋ toni tonenen, le atedi yabyab kat, ve tiŋaaŋ mareer pani tighaze tirabi imaat. 55 Eemoghon Stepanus, Avuvu Patabuaŋ izeev katini, ve mata izala pa sambam le ighita Maaron ŋguruba, ve ighita Yesu iyondyood ila Tama Maaron nima waan. am 

56 Tovenen isaav padi ighaze: “Alooŋ. You naghita sambam ikaak, ve Tamtoghon Natu iyondyood ila Maaron nima waan!” an 

57 Tilooŋ saveeŋ tonene, le bobaaŋ tiina iza, ve tipoon taliŋadi, ve tilaan tiŋarua Stepanus tila, 58 ve tighami ve tisasaara ivot ila ndug tiina dige, ghoro tikor yaam ve tirabi. Yes to tipariaaŋ saveeŋ tighaze Stepanus igham sosor, tiduduum nonogiiŋa todi to moŋeŋaaŋ tizi, ve tila tighur di tila ŋgeu paghu eez aghe pughu, iza Saul. ao 

59 Tirabrab Stepanus pa yaam, ve ye isuŋ ighaze: “O Tiina Yesu, ugham anunug.” ap 

60 Ghoro iput aghe izi taan, ve isaav aliŋa tiina ighaze: “O Tiina, sosor to tigham payou ne, uyati malep. Ureua padi.” Isaav tovene, ve itap izi imaat. aq 

Copyright information for `TUCO