aEp 3:1; Pil 1:27; 1Tes 2:12
bGa 5:22+; Kol 3:12+; 1Tes 5:14
cKol 3:14+
eRo 11:36, 12:5; 1Kor 8:6, 12:13; Kol 1:5
fRo 12:6; 1Kor 12:4+
gMbo 68:18; Kol 2:15
hMbaŋ 1:9; Ep 1:20+; Hib 4:14
iRo 12:6+; 1Kor 12:27+
j2Kor 3:18; Kol 1:28, 2:2
k1Kor 14:20; Yems 1:6
lEp 1:22; Kol 1:18, 2:19
mRo 1:21; Ep 2:12; 1Pe 4:3
nRo 1:24; Kol 3:5; 1Tes 4:5
oKol 3:7+; Hib 12:1; 1Pe 2:1
pYo 3:3; Ro 12:2
qRo 6:4; 2Kor 5:17; Kol 3:10
rSek 8:16; Kol 3:8+
sMbo 37:8; Mt 5:22+; Yems 1:19+
tEp 6:11; Yems 4:7; 1Pe 5:9
uIgham 20:15; 1Tes 4:11+; 2Tes 3:8+
vEp 5:4; Kol 3:8, 4:6
w2Kor 1:22; Ep 1:13+; 1Tes 5:19
xMt 6:14; Kol 3:13

Ephesians 4

Mbeb pida to ilup Krisi tamtoghon toni tinim ee moghon

You naneep ila ruum to yabyabuuŋ lolo pasa, nanim Tiina toit Yesu le, ve naghamgham uraat toni. You naghaze napalot gham tovene: Maaron igham poian gham, ve ipoi gham anim le wa. Tovenen laghooŋ tiam, yam irau ataghon ŋgar poia to deŋia pa poiŋ toni tonenen. Ataghon ŋgar tovene: a 

Apait taumim izamim malep. Sawa isob, yam atatan izamim izila kat, ve ataghon ŋgar luuma. Ve ighaze tamtoghon tigham samin gham, yam ayati malep. Ambaada moghon, ve aghur lolomim padi ve agham poian di. b 

Iit tamtoghon to Krisi, Maaron Avuvu ilup ghiit tanim ee moghon wa. Tovenen yam irau azuaria gham pa ŋgar luuma. Pasa, ŋgar tonenen to ikis lupuuŋ to Krisi, leso tavalag ghiit sob, ve taneep pooi. c 

Aghita. Lupuuŋ ee moghon to Krisi to inepneep. Nene iit tamtoghon toni to tanim Krisi anoŋa. Ve Maaron Avuvu ee moghon to inepneep. Ve sawa to Maaron ipoi gham anim le, ye ipoi gham pa aghur matamim pa mbeb ee moghon.
(4:4-6) Iit Kristen taghurghur mataad pa sawa to itiŋa Krisi talup ghiit izi ndug sambam, ve taneep ila yesuru Tama Maaron ŋgurubadi.


Ve Tiina toit ee moghon, ghurla toit ee moghon, ghamuuŋ ya toit ee moghon, ve Tamaan ee moghon. Nene Maaron. Mbeb tisob tineep ila ye samba ve tigham uraat titaghon ŋgar toni. Ve ye ineep ila mbeb tisob lolodi. e 

Maaron irei uraat naol naol irau iit eŋaeŋa

Krisi igham poian ghiit, ve irei tapiri tiina ve ŋgar popoia naol irau iit eŋaeŋa. f 

Saveeŋa ineep pataghaaŋ wa. Ighaze:

“Ye iparab le ilib pa koia. Ve sawa to izala sala, ighereb ival tiina to ye iyou di tinim le, ve yesŋa tila, ve irei mbeb popoia pa tamtoghon.” g 
Saveeŋ to ighaze ye izala sala, nene pughu tovene: Ye izala moghon maau. Papazogi ye izi inim taan, ve imaat gha izila kat mateeŋa ndug todi. Ve imundig muul, tauto izala. 10 Tovenen ŋgeu to izi inim taan, tauto imuul iza ila pa sambam to ineep sala le sala kat. Leso ineep irau ndug to naol ne, ve iŋgin mbeb tisob. h 

11 Krisi ighur uraat naol naol tinim nimaad, leso tapalot lupuuŋ toni. Tamtoghon pida tinim mbaŋooŋa toni, pida tinim propet, ve pida tivovotia varu poia pa yes to tighur ila maau. Ve pida ledi uraat pa ŋginiiŋ lupuuŋ to Krisi, ve tipatoot tamtoghon pa Maaron aliŋa. i 

12 Krisi ighur uraat tovene inim nimaad, leso tapalot Maaron tamtoghon toni, ve anadi timbees pooi pa Maaron ve tamtoghon paam, ve tiuul lupuuŋ to Krisi le ivot kat itaghon ŋgar toni. 13 Iit irau taghamgham tovene, le ghurla toit iyaryaaŋ ve tawatag katin Maaron Natu. Leso lupuuŋ toit ee moghon, ve ŋgar toit imatu, ve tataghon suvun ŋgar to Yesu Krisi. j 

14 Tovenen iit tataghon ŋgar to ndipain muul malep. Pasa, ndipain tikis Maaron aliŋa tuŋia maau. Yes tinimale waaŋ to yaghur ve dibom iwatokini ila inim. Ighaze ndiran to tiraua kat pa ghamuuŋ kaarom, tinim ve tiŋgal di pa saveeŋ, nene pale rikia moghon tighur ila saveeŋ kaarom todi, ve tipul ataam to Maaron. k 

15 Eemoghon iit tagham tovene malep. Iit irau lolood pa tamtoghon ve tagham poian di, ve tasavia saveeŋ onoon moghon padi. Ve tazuaria ghiit le tataghon katin ŋgar isob to Krisi, ve taneep tuŋia ila toni. Pasa, ye to inim daba pait, ve iit to taneep ila lupuuŋ toni ne, tanimale ye anoŋa pida pida. Ye ilup ghiit tanim ee moghon, ve ikis ghiit tuŋia, leso tagham uraat toit toit. Ve uraata toni, to tinim seŋgaŋa, ve tilup anoŋa pida pida tonowen ve tikis di tinim ee moghon, ve tipapalot di. Ighaze lolood pa tauud, ve iit eŋaeŋa tagham katin uraat toit toit, nene pale lupuuŋ to Krisi ivot inim tiina, ve iyaryaaŋ. l 

Tataghon ŋgar paghu to Krisi

17 Tovenen you nasaav ariaŋa payam ila Maaron iza: Yes to tiwatag Maaron maau, yam ataghon ŋgar todi muul malep. Pasa, ŋgar todi le anoŋa poia eta maau. Ŋgar todi iyaryaaŋ tighaze tizoor Maaron aliŋa ve titaghon ŋgar to ndoroom. Tauto ighamun ŋgar todi, le tineep saguan pa nepooŋ poia to iit taghami ila to Maaron. m 

19 Matadi samia tinimale ŋgavuun. Ve mayadi rita maau. Tila pa naghodi moghon. Sa ŋgar to ulidi to matadi iŋgali, nene tighami moghon. Tauto tighamgham ŋgar samsamia naol to tiŋgalaaŋ ila Maaron mata maau. n 

20 Laak, sawa to yam aghur ila to Krisi, ve tipatoot gham pa ataam toni, tisaav payam pa ataghon ŋgar tovene? Maau kat! 21 You nawatag: Yam alooŋ Yesu varu, ve tipatoot gham pa saveeŋ onoon to ineep toni, le aghazooŋ pani. 22 Yes tisaav payam tovene: Nepooŋ tiam to muuŋ, lolomim ipazaagh gham pa ŋgar kaarom ve ŋgar samsamia naol. Eemoghon aazne, yam irau aghur murimim pa ŋgar muŋgina tonanan inimale nonogiiŋa to aghita isami ve apiyaava ilale. Ataghoni muul malep. Pasa, ŋgar tovene pale iwaghamun gham. o 

23 Ve tisaav payam tighaze yam irau apul Maaron itoor ŋgar tiam toman lolomim inim paghu. p 

24 Maaron ighaze igham ŋgar tiam inim paghu kat, leso ataghon saveeŋ onoon, ve ŋgar tiam deŋia ve patabuaŋ inimale ye tau. Tovenen yam irau agham ŋgar paghu ila toni, inimale andud gham pa nonogiiŋa paghu. q 

25 Tovenen, yam asob apul ŋgar to ghamuuŋ kaarom ineeple, ve asavia saveeŋ onoon moghon pa taumim. Pasa, iit tanimale Krisi anoŋa pida pida, ve ye ilup ghiit tanim ee moghon wa. r 

26 Ighaze atemim yabyab, ghoro apatum gham. Pa vene, agham sosor. Tovenen agharaat lolomim le isob, ghoro ndag izila. s 

27 Aghur soso pa Ŋgeu Samia malep. t 

28 Ve yes yubyubŋa tiyub iraua. Yes irau timundig ve tigham uraat popoia pida pa taudi nimadi. Leso tigham ledi mbeb ve tiuul yes mbolaaŋa. u 

29 Ve saveeŋ samia eta ivot ila avomim malep. Asavia saveeŋ popoia moghon to irau iuul tamtoghon, ve ipatoot di pa sa ŋgar to yes tikankaan pani. Leso saveeŋ tiam inim ataam pa poia to Maaron iza todi. v 

30 Ve agham Avuvu Patabuaŋ to Maaron lolo ipataŋan malep. Pasa, ye to inim ghilalooŋ payam ighaze yam anim Maaron le wa. Ighaze ye ineep ila lolomim, yam awatag: Sawa to Krisi imuul inim, ye pale igham mulin gham, ve aneep pooi. w 

31 Tovenen ŋgar to ŋuŋuaaŋ, ateed yabyab, kisiiŋ malmaliiŋ toit, kokaaŋ, bobaaŋ soroksorok, ŋgaliiŋ saveeŋ, ve piyavooŋ saveeŋ velegiiŋ, toman ŋgar samsamia pida paam, ineep tiam malep. Apul di tisob tineepledi. 32 Ve agham poian taumim, lolomim isamin nditamim, ve awagharaton lolomim ve apul sosor to nditamim, inimale Maaron ireu sosor tiam ila uraat to Yesu Krisi. x 

Copyright information for `TUCO