aMk 12:30; Lu 10:25+
cIgham 34:17; 1Kor 10:14; 1Yo 5:21; Syg 21:8
dIgham 34:7
eMt 5:33+
fIgham 16:23+
gIgham 23:12, 34:21
hMbnp 2:1+
iMt 15:4; Mk 7:10; Ep 6:2+
jMt 5:21; 1Yo 3:15; Syg 21:8
kMt 5:27+; 1Kor 6:15+; Ep 5:5; Hib 13:4; Syg 21:8
lMt 19:18; Ro 13:9; Ep 4:28
mMk 10:19; Lu 18:20; Syg 21:8, 22:15
nLu 12:15
oRo 7:7, 13:9
pHib 12:18+

Exodus 20

Tutuuŋ Saaŋgul

Maaron isavia saveeŋ isob tonene iŋarua yes Israela eŋaeŋa ighaze:

“You Yoova, Maaron tiom. Muuŋ, yom unum mbesooŋa sorok izi taan to Isip. Eemoghon you nagham mulin ghom, tauto upul ndug to pataŋani tonowen. Yom irau umbees pa you eŋgengou. Ughur maaron ite paam imuuŋ payou ve umbees pani malep. a 

“Ve ugharaat mbeb eta ve ughuri inim Maaron payom malep. Sa mbeb to tineep sambam, taan, ve te lolo, ugharaat eta nagho, ve ughuri inim maaron payom, ve umbees pani malep.
(20:4) Tutuuŋ tonene, ŋgara tovene: Iit irau tagharaat mbeb eta, ve taghaze Maaron nagho raraate tovene ne maau. Pasa, mbeb eta to taan nagho inimale Maaron maau. Yesu moghon to ipatooŋ katin Maaron nagho pait (Yo 14:9).
,
c 

Uput aghem pa mbeb eta tovene ve umbees pani malep. Pasa, you Yoova moghon, to Maaron tiom. Matag pariuuŋ. Naghaze tamtoghon tiou timbees pa you eŋgengou moghon. Yes to tighur koi payou, nene pale matag kisin sosor todi, ve naghur atia iza to yes taudi, toman ndinatudi, nditimbudi, ve saas todi. Eemoghon yes to tighur lolodi payou ve titaghon tutuuŋ tiou, nene pale lolog ineep tuŋia ila todi ve papaghu todi, ve poia tiou izaza todi itaghoni taghoni gha ila. d 

“You Yoova, Maaron tiom. Uwaat sorokin izag malep. Pasa, tamtoghon to ighaze iwaat sorokin izag, ma ipariaaŋ saveeŋ kaarom ila you izag, nene irau naghurghuri maau. Pale naghur atia iŋarua pa sosor toni. e 

“Matam iŋgal umbom to Maaron ve upatab pani. f 

Tovenen ndag inim eez, ila imuul ndag inim liim ve eez, nene sawa to ugham uraat tiom. Ve ndag inim liim ve ru, ghoro yom irau upul uraat tiom tisob tineep, ve upatab pani. Pasa, nene umbom patabuaŋ to Yoova, Maaron tiom. Tovenen yamŋa ndinatum, mbesooŋa tiom, ŋgai tiom, ve yes loomba to tineep toman ghom ne paam, yam asob irau apul uraat tiam ineep, ve atemim izi. g 

11 Pasa, sawa to you Yoova naghur sambam, taan, ve te, toman mbeb tisob to tineep ila, nagham uraat irau mboŋ liim ve eez moghon, ve napasob uraat tonenen. Ve sawa to inim liim ve ru, ateg izi. Tauto napait sawa tonenen, ve naghuri inim umbom patabuaŋ, ve naghur poia tiou ineep izala. h 

12 “Matam loŋloŋaiŋa pa tamam ve tinam, ve utandag padi. Leso uneep mala izi taan to you Yoova, Maaron tiom, pale nagham payom. i 

13 “Urab tamtoghon imaat malep. j 

14 “Ughur maat malep. k 

15 “Uyub malep. l 

16 “Upariaaŋ saveeŋ kaarom pa uwaghamun itam ite malep. m 

17 “Lolom igham pa nditam ruum todi malep. n 

“Ve lolom igham pa ndizwadi, mbesooŋa, ŋgai, ma mbeb todi ite paam malep.” o 

Yes Israela timatughez pa Maaron

18 Yes Israela tilooŋ lalaav avolutu, ve tighita ndug milia, ve tilooŋ mbeb to itaŋtaŋ inimale tavuur, ve tighita yab mbuasa asosooŋa ikau lolooz, le timatughez ve tinidi irur. Tovenen tiyoon saguan pa lolooz pughu, 19 ve tisaav pa Mose tighaze: “Yom irau ugham Maaron avo, ve upaesia aliŋa payei. Pasa, yei nimatughez. Ighaze ye tau isavsaav toman ghei, nene pale nisob nimatmaat!” p 

20 Mose isaav padi ighaze: “Amatughez malep. Aazne, Maaron izi inim itaghon ataam tonene, pa ipatooŋ tapiri payam, leso awatag katini ve amatughez pani, ve agham sosor muul sob.” 21 Tovenen ival tiina to Israel tiyoon saguan pa lolooz pughu, ve Mose eŋgeni imuul izala, le ila igharau yaghur tae asosooŋa to Maaron ineep ila.

Tutuuŋ pida to artaal

22 Ghoro Yoova isaav pa Mose ighaze ipaesia aliŋa pa yes Israela tovene: “Yam taumim aghita wa. You naneep sambam, ve aliŋag izilat payam. 23 Ambees pa you moghon. Alup ghou toman maaron kaarom eta malep. Tovenen agharaat maaron kaarom eta pa silva ma gol ve ambees pani malep.

24 “Yam irau andou taan, ve agharaata inim artaal payou, leso agham watooŋrau tiam izala. Sipsip ve makau tiam to arab di tinim watooŋrau, aghur pida tizala yab, leso yab ighan suvun di. Ve pida, amoz di ve taumim aghan di, leso itiŋa talup ghiit tanim ee moghon. Ndug sine to ighaze you naghuri payam inim inamim to suŋuuŋ, yam irau alup gham pa suŋuuŋ ve apait izag tonowe. Leso matamim iŋgal ghou, ve nanim naneep toman gham, ve naghur poia tiou iza tiam. 25 Ve ighaze andou yaam inim artaal payou, ayou yaam dodolidi moghon. Yaam to ighaze agharaata ve asap dige, nene aghami pa artaal tiou malep. Yaam tovene, poia pa artaal maau. Pasa, nene ndug patabuaŋ. 26 Ighaze agharaat artaal eta, izala kat malep. Pasa, ighaze ataghon ndeet azala, nene pale tighita mbolemim.”

Copyright information for `TUCO