aMbaŋ 7:16; Hib 11:9,13

Genesis 23

Sara imaat

Sara inepneep le ndaman toni irau 127, ghoro sawa toni isob ve imaat izi ndug Kiriat Arba to ineep ila taan suruvu to Kanaan. (Kiriat Arba iza ite Ebron). Tovenen Abaram lolo ipataŋan pa azuwa ve itaŋ pani. Itaŋtaŋ le isob, ghoro imundig, ipul azuwa paatu izi, ve ila isavsaav toman yes Hita. Isaav padi ighaze: “Aghita. You leg taan eta maau. Naneep nanim loom ila yam lolomim. Vena, irau aghita leg taan suruvu eta leso inim ndug to naghur azuwag paatu ila ve igheen pani?” a 

Yes Hita tipamuul aliŋa tighaze: “Olman, yom ŋgeu tiina eez to uneep toman ghei, ve nighilaal ghom nighaze Maaron ineep toman ghom. Ulooŋ, mateeŋa tiei inadi katindi. Ughita poia eta to irau lolom, ghoro ughur azuwam paatu ila. Tamtoghon tiei eta irau iŋguruuta payom maau.”

Abaram ilooŋ saveeŋ todi le lolo poia. Tovenen imundig ve itud padi inimale pakuruuŋ di, ve isaav ighaze: “Poia. Ighaze yam ayok payou pa naghur mateeŋ tiou izi ndug tonene, ghoro ala to Zoar natu Epron, ve aghasoni pa yaam saambu to ineep izi taan toni Makpela dige. Ndug tonowen to naghaze nagholi inim leg, ve naghuri inim mateeŋa tiei inadi. Atia piiz to ye ighuri, nene pale naghol motini ila yam asob matamim.”

10 Abaram isavsaav toman yes Hita izi lupuuŋ ina to ineep ataam avo, ve Epron tau inepneep paam. Tovenen imundig iyoon ila ival tiina matadi, ve ipamuul Abaram aliŋa ighaze: 11 “Tiina tiou, ulooŋ. You lolog pa ughol taan tiou tonowen malep. Pale nagham payom sorok. Ve yaam saambu to ineep ila taan tonowen paam, pale nagham payom sorok ila ival tisob tonene matadi. Ula utavia mateeŋ tiom tonowe.”

12 Abaram ilooŋ saveeŋ tonene, ve itud padi muul inimale pakuruuŋ di, ve isaav pa Epron ila ival tisob matadi ighaze: 13 “Nene poia. Eemoghon ughur taliŋam payou. You naghaze naghol motin taan tiom tonowen. Tovenen taan atia pale ilat nimam muuŋ, ghoro nala natavia mateeŋ tiou.”

14 Epron ipamuul Abaram aliŋa ighaze: 15 “Tiina tiou, ulooŋ! Taan tonowen atia irau yaam silva 400 ma venen. Eemoghon tambaŋa paam. Ugholi pasa? Ituru tawatag tauud. Ula ve utavia azuwam.” 16 Abaram ilooŋ Epron aliŋa, ve inin le yaam silva irau 400 itaghon saveeŋ to Epron isavia ila ival tiina matadi.

17 Tovenen taan to Epron to ineep izi Makpela igharau ndug Mamre, toman yaam saambu ve ai tisob to tiyoon ila taan tonowen, nene Abaram ighol motin di tinim le. Ve yes Hita tisob to tineep ila lupuuŋ tonenen, tilooŋ saveeŋ mbuaaŋ to yesuru, ve tighita pa matadi. 19 Ghoro Abaram ila ighur azuwa Sara paatu ilooŋ ila yaam saambu to ineep ila taan Makpela igharau ndug Mamre izi taan Kanaan. (Ndug Mamre iza ite Ebron.) 20 Tovenen taan tonowen toman yaam saambu to ineep ila, nene yes Hita tipuli inim Abaram le, ve ye ila igharaata inim mateeŋa toni inadi.

Copyright information for `TUCO