aMbaŋ 15:20
bIgham 20:13
cMbnp 1:28

Genesis 9

Maaron imbua saveeŋ toman Noa

Maaron ighur poia toni iza to Noa toman ndinatu, ve isaav padi ighaze: “Apoop, ve amasa anim naol, ve aneep irau taan muul. Ŋgai naol naol to tineep izi taan, toman man, iigh, ve mbeb soroksorok to tindandarab ila taan, nene pale matadi iza ve timatughez payam. You naghur di tilat nimamim. Muuŋ, naghur mbeb naol to titub ila taan tinim aniiŋ payam. Ve aazne, you napul mbeb matadi yaryaara to naol ne payam paam, leso aghan di.”

Mbeb ee moghon to you naŋgalsekin gham pani. Mbeb minda to siŋ ineep ila, yam aghani malep. Pasa, siŋ to inim pughu pa mbeb tineep matadi iyaryaar. a 

Tovenen ighaze ŋgeu eta, ma ŋgai eta irab tamtoghon imaat, you Maaron naghur atia pani tovene: Ye pale imaat paam. Leso iyat siŋ to tamtoghon tonenen.

Tovenen ighaze ŋgeu eta irab tamtoghon eta imaat,
nene pale ye paam tirabi imaat. Leso iyat siŋ to tamtoghon tonenen.
Pasa, Maaron ighur tamtoghon tigham ye tau nagho. b 

Ghoro Maaron isaav muul pa Noa toman ndinatu ighaze: “Yam apoop, ve amasa anim naol kat ve aneep irau taan. Ve alooŋ. You naghaze nambua saveeŋ pa yam ve papaghu tiam to pale tivot muri. 10 Ve yam moghon maau. Mbeb matadi yaryaara tisob to paanu ve su to tineep toman gham ila waaŋ lolo, ve yamŋa avot ala pumuri, ve aazne tineep izi taan, saveeŋ mbuaaŋ tiou tonene iŋarua di paam. c 

11 You nambua saveeŋ ariaŋa payam tovene: Irau nagham ya ivon muul toman yawaaŋa tiina pa nawaghamun mbeb matadi yaryaara maau. Ve taan tovene paam. Ya irau iwaghamuni muul maau.”

12 Ve Maaron isaav muul ighaze: “Maalraŋgo tiou to ineep ila yaghur tae ve izi, aazne naghuri inim ghilalooŋ pa saveeŋ mbuaaŋ tiou tonene. Saveeŋ tonene, you nambua toman gham, ve mbeb matadi yaryaara tisob to tineep toman gham izi taan. Saveeŋ tonene pale iyoon ariaŋa itaghoni taghoni gha ila. Tovenen maalraŋgo pale inim ghilalooŋ pa saveeŋ mbuaaŋ to you nambua toman mbeb tisob to tineep izi taan. 14 Muri, ighaze you naghur yaghur tae iyoon toman maalraŋgo, nene pale matag iŋgal saveeŋ to nambua toman gham ve mbeb matadi yaryaara tisob. Saveeŋ mbuaaŋ tovene: Ya irau ivon le iwaghamun gham muul maau. 16 Tovenen maalraŋgo ighaze ivot toman yaghur tae, nene pale naghita, ve matag iŋgal saveeŋ to nambua toman mbeb matadi yaryaara tisob to tineep izi taan. Saveeŋ tonene pale iyoon tovene itaghoni taghoni gha ila.”

17 Tovenen Maaron isaav pa Noa ighaze: “Maalraŋgo, nene inim ghilalooŋ pa saveeŋ to you nambua toman mbeb matadi yaryaara tisob to tineep izi taan.”

Noa ve ndinatu tol

18 Noa ndinatu tol to yesŋa tineep ila waaŋ lolo ve tivot tila pumuri ne, izadi tovene: Sem, Ham, ve Yapet. Ham natu, iza Kanaan. 19 Ival tisob to tineep izi taan, yes tivot ila to Noa ndinatu tol tonowen.

20 Noa, ye ŋgeu to ghamuuŋ uraat pa uum, ve ye to ivazog vaen muuŋ. 21 Sawa eez, ye ighun vaen le iyamaan tau maau, ve uli toni imaruat. Tovenen igheen tini ŋginiŋa ila mbeez toni lolo. 22 Noa natu Ham, to Kanaan tama, ighita tama igheen tini ŋginiŋa, ve ivot ila pumuri ve ipaes pa nditogha. 23 Eemoghon Sem yesuru Yapet tigham uli eez, ve tipiyaava izala avaradi, ve tilaagh pa muridi tila, ve tipoon tamandi pani. Pasa, lolodi pa tighita tamandi tini ŋginiŋa maau.

24 Sawa to Noa imundig ve ŋgar toni ighazooŋ, ilooŋ tighaze natu Ham ighita igheen tini ŋginiŋa. 25 Tovenen isaav pani ighaze:

“Pataŋani tonene pale iŋarua Kanaan. Ye toman papaghu toni pale tinim mbesooŋa sorok pa toŋvetaz todi.”
26 Ve Noa ighur poia iza to Sem ve Yapet tovene:

“Iit tapait Yoova. Ye Maaron to Sem.
Kanaan papaghu toni pale tinim uraata sorok pa papaghu to Sem.
Ve Yapet papaghu toni, Maaron pale igham di timasa tinim naol, ve induur taan todi ila inim tiina.
Yesŋa Sem papaghu toni pale tilup di tinim ee moghon.
Eemoghon yes Kanaana pale tinim uraata sorok pa Yapet papaghu toni.”

28 Yawaaŋa tiina ivot le isob, ghoro Noa ineep muul irau ndaman 350. Tovenen ndaman toni inim 950, ghoro imaat.

Copyright information for `TUCO