Luk 17
a[Mt 18:6-7,21-22; Mk 9:42]
 
bMt 18:15; Ep 4:32
cMt 18:21-22
eMt 17:20; Mk 11:23
fLu 12:37
g1Kor 9:16+
hWkp 13:45+
iLu 5:14
jMt 9:22; Lu 7:50
kYo 3:3; Ro 14:17
Luk 17
l[Mt 24:23-28,37-41; Mk 13:14-23]
 
mLu 21:8; 2Tes 2:1
n1Tes 4:16+
oMk 8:31; Lu 9:22
pMbnp 6:5-7:1
qMbnp 19:24+; 2Pe 2:6; Jud 7
sMt 24:17+; Mk 13:15+
tMbnp 19:26
uMt 10:39; Lu 9:24; Yo 12:25
vMt 24:40+
yMt 24:28

Luke 17

Tagham nditaad titap pa ghurla todi malep a 

Yesu isaav pa taghoniiŋa toni ighaze: “Tovaaŋ naol pale tivot pa tamtoghon, ve tigham di titap pa ghurla todi. Eemoghon tamtoghon to ighaze inim watiiŋ pa pain eta, ve ighami itap pa ghurla toni, nene ye ikaria tau wa. Tamtoghon tovene, poia pa timbit yaam tiina ila lua, ve tipandalini izila te lolo ve ilale. Tovenen apatum gham!

“Ighaze toŋvetaz tiom eta igham sosor, yom ula toni ve usaav kat pani pa sosor toni. Ighaze ilooŋ ghom, ve itoor ŋgar toni, ghoro upul sosor toni, ve lolom imaagh pani. b 

Ighaze ye igham sosor payom pa liim ve ru pa ndag ee moghon, ve ilatlat tiom ve isavsaav payom ighaze: ‘You naghilaal sosor tiou ve natoor ŋgar tiou wa.’ Nene yom paam, upul sosor toni, ve lolom imaagh pani.” c 

Mbaŋooŋa toni tilooŋ saveeŋ tonene, ve tisaav pani tighaze: “Tiina, ighaze venen, ugham ghurla tiei ivot inim tiina.”

Yesu isaav padi: “Ighaze ghurla tiam rismoghon inimale mastet uve,
(17:6) Mastet, nene mbeb to itub iza inimale was ma venen. Ve uve, nene gegegeu kat tinimale ndog ma mbuas uvedi.


yam pale irau asaav pa ai tiina tonene aghaze: ‘Ukuul taum uza, ve ula upayoon taum ila te lolo.’ Ve ai tonene pale itaghon aliŋamim.” e 

Ighaze tagham uraat to Maaron, taghur mataad pa pakuruuŋ to tamtoghon malep

Yesu isaav muul: “Ighaze tiam eta isaav pa mbesooŋa toni ila imbut uum, ma iŋgin sipsip toni, ve rabrab mbesooŋa tonowen imuul ila pa ruum, nene pale isaav vena pa mbesooŋa tonenen? Pale rikia moghon isaav pani ighaze: ‘Unum, mbolem izi, ve ughan?’ Nene pale maau. Pale isaav pani tovene: ‘Yom ula ugharaat aniiŋ payou le isob, ghoro ugharaat ghom, ve umuul unum umbees payou le irau naghan ve naghun le isob. Ghoro anam mbolem izi, ve ughan ve ughun.’ f 

“Ve vena? Ighaze mbesooŋa toni ilooŋ aliŋa ve igham uraat toni isob, pale tiina toni ipakuri? Maau. Pasa, nene ye uraat toni. 10 Yam tovene paam. Ighaze agham mbeb tisob to Maaron isavia di payam pa agham di, ghoro asaav moghon aghaze: ‘Yei mbesooŋa to Maaron. Nigham mbeb poia eta irau to tipakur ghei pani ne maau. Uraat to ye ighuri inim nimamai, tauto nighami.” g 

Yesu igharaat tamtoghon saaŋgul to kolekole (o sik lepra) igham di

11 Yesu ilaagh taghon ataam to ila pa Yerusalem, le ila ivot bodbodaaŋ pa Samaria ve Galilaia. 12 Ye ilooŋ ila ndug eez to ineep tonowe, le ivot to ndiran saaŋgul to moroghooŋ kolekole igham di. Tovenen tiyoon mala, ve timboob ila pani tighaze: “Yesu, tiina tiei, lolom isamin ghei ve uul ghei lak!” h 

14 Yesu ighita di, ve isaav padi ighaze: “Yam ala apatooŋ taumim pa yes ndiran to watooŋrau.” Tovenen tipuli ve tila. Tilaagh taghon ataam tila, ve Maaron tapiri igham di tinidi popoia le tiŋgalaaŋ ila mata. i 

15 Todi eez ighita ighaze Maaron iuuli ve tini poia wa. Tovenen ipapait Maaron iza toman aliŋa tiina, ve imuul ila to Yesu. 16 Ila ivot toni, ghoro itap izi ila Yesu aghe pughu, ve ighur nagho izila taan, ve ipaiti toman lolo poia. Ŋgeu tonowen, ye Yuda maau. Ye to Samaria.

17 Yesu ighita ŋgeu tonenen, ve isaav ighaze: “Wai, you naghaze pa nagharaat tamtoghon saaŋgul tinidi popoia. Liim ve paaŋ tineep sine? 18 Ŋgeu tonene, ye Yuda maau. Pughu vena to ye eŋgeni imuul inim ve ipait Maaron iza, ve yes pida maau?” 19 Ghoro Yesu isaav pa ŋgeu tonenen ighaze: “Umundig ve ula toman lolom poia. Ghurla tiom, tauto igham ghom tinim poia, ve Maaron igham mulin ghom wa.” j 

Pooz to Maaron ivot vena?

20 Sawa eez, ndiran tutuuŋa pida tighason Yesu tighaze: “Pale ŋeez, o pooz to Maaron ivot ighazooŋ?”

Yesu ipamuul aliŋadi ighaze: “Pooz to Maaron ivot toman ghilalooŋ tiina eta to tamtoghon irau tighita pa matadi ne maau.
21 Tovenen tamtoghon irau tisaav tighaze: ‘Aghita. Pooz to Maaron ineep sualen,’ ma ‘ineep tonowe,’ nene maau. Pasa, pooz to Maaron, nene mbeb to ivot ila lolomim.” k 

Sawa to Tamtoghon Natu pale ipatooŋ pooz toni ivot ighazooŋ l 

22 Ghoro Yesu isaav pa taghoniiŋa toni ighaze: “Muri, sawa samia kat pale ivot, ve yam apasul aghaze le aghita Tamtoghon Natu ipatooŋ pooz toni ivot ighazooŋ rita, ghoro poia. Eemoghon yam irau aghita rikia maau. 23 Tovenen apatum gham. Pasa, ndiran pida pale tisaav payam tighaze: ‘Aghita. Ye tau tonowe!,’ ma tisaav tighaze: ‘Ye tau tonene!’ Eemoghon yam ala ataghon di malep. m 

24 Pasa, sawa to Tamtoghon Natu imuul inim ve ipatooŋ tapiri ivot ighazooŋ, tamtoghon tisob pale tighita. Ye pale izi inim inimale ndug milia, ve lalaav waro ilaan ila tata paroŋania dige eez ve ivool ila pa dige ite. n 

25 Eemoghon mbeb tonenen irau ivot rikia sone. Pasa, Tamtoghon Natu pale imbaad pataŋani naol muuŋ itaghon Maaron ŋgar toni, ve tamtoghon to aazne tizuruni. o 

26 “Sawa to mulaaŋ to Tamtoghon Natu ighaze inim igharau, nene pale tamtoghon titaghon ŋgar to muuŋ tighami ila sawa to Noa. p 

27 Sawa tonenen, tamtoghon lolodi imaagh pa taudi kat. Pataŋani to ighaze ivot, yes tighilaala maau. Tovenen tighanghan, tighunghun, ve tiwavaivai ila ila le sawa kat to Noa ilooŋ ila waaŋ lolo. Ghoro Maaron igham ya ivon toman yawaaŋa le itatab taan, ve irab tamtoghon tisob tilaledi.

28 “Ve tamtoghon pale titaghon ŋgar to tighami ila sawa to Lot. Sawa tonenen paam, tamtoghon tighilaal pataŋani to ighaze ivot padi ne maau. Tighanghan, tighunghun, tirauraukol pa mbeb todi, tivavazog aniiŋ, tireirei ruum, ila ila le sawa to Lot ipul ndug Sodom ve ighau ila. Ghoro Maaron igham yab toman yaam salfa tuntunu to vuzi samia kat, titaptap ila tata ve tizi, le tirab di tisob tilaledi. q 

30 Sawa to Tamtoghon Natu imuul inim ve ipatooŋ pooz toni ivot ighazooŋ, nene pale ŋgar raraate moghon ivot.

31 “Sawa tonenen ighaze ivot, ve ŋgeu eta inepneep ila ndug to nepooŋ to ruum pogho we,
(17:31) Yes Yuda, ruum todi poghodi babaŋa. Tovenen tirourou tonowe inimale iit tarourou ila patar.


nene irau izila muul ruum lolo pa igham mbeb toni pida ne maau. Izi le ighau malmali ila. Ve ighaze ŋgeu eta ineep uum toni ve ighamgham uraat, nene ye paam, irau imuul ila pa ruum toni maau. Ighau malmali ila. s 

32 Tovenen agham ŋgar pa mbeb tiam malep. Matamim iŋgal muul pa pataŋani to muuŋ ivot pa Lot azuwa. t 

33 Tamtoghon to ighaze ikaal ataam pa tau leso ineep poia izi taan, nene pale ilale. Ve ighaze tamtoghon eta lolo ee moghon ve ipul tau payou, nene pale igham nepooŋ poia ila to Maaron. u 

34 “You nasaav payam. Sawa tonenen ighaze ivot, ve tamtoghon ru tilup di pa ghenooŋ ila inadi ee moghon, pale tigham eez, ve tipul eez ineep. v 

35 Ve ighaze ndiliva ru tilup di pa uraat to gharatooŋ aniiŋ, nene pale tigham eez, ve tipul eez ineep.”
(17:35-36) Ndiran ŋgara pida tighaze saveeŋ ite paam ineep ila saveeŋ waaro tonene lolo. Saveeŋ tovene: “Ve ighaze nditamoot ru tineep uum ve tighamgham uraat, nene pale tigham eez, ve tipul eez ineep.” Ughita Matayu 24:40.


37 Taghoniiŋa toni tilooŋ saveeŋ tonene, ve tighasoni tighaze: “Tiina, mbeb to yom usavia ne, pale ivot izi sine?”

Yesu ipamuul aliŋadi ighaze: “Ndug to uri igheen pani, nene irau iyooŋ maau. Pasa, man kool pale tiroov tila, ve tilup di tonowe ve tighani.”
(17:37) Saveeŋ tonene, pughu tovene: Mulaaŋ to Yesu pale ivot ighazooŋ ila tamtoghon matadi.
,
y 

Copyright information for `TUCO