Mar 7
a[Mt 15:1-9]
 
bMt 23:25+
cLu 11:38
dIs 29:13; Kol 2:20+; Tit 1:14
eIgham 20:12, 21:17
Mar 7
f[Mt 15:10-20]
 
gMbaŋ 10:14+; Ro 14:14,20; 1Tim 4:4
Mar 7
h[Mt 15:21-28]
 
jMt 15:29+
kMk 8:23; Yo 9:6
lIs 35:5+

Mark 7

Tutuuŋ to Maaron ilib pa Yuda nditimbudi tutuuŋ todi a 

Ndiran tutuuŋa toman Yuda pida paam timbees pa Maaron itaghon tutuuŋ to nditimbudi titaghoni muuŋ ve inim. Ŋgar todi tovene: Irau tighan aniiŋ sorok maau. Timen nimadi itaghon tutuuŋ todi le tiŋgalaaŋ ila Maaron mata, ghoro tighan. Ve ighaze tila nal ina, ve timuul tinim, nene yes irau titir ya izala poghodi, ve timen muun ilale. Leso tiŋgalaaŋ ila Maaron mata muul, ve tighan aniiŋ. Yes ledi tutuuŋ naol tovene. Tutuuŋ pida tiŋarua menuuŋ uur ve rubruub, ve tutuuŋ pida tiŋarua mbeb pida paam. b 

Ndiran tutuuŋa pida toman ŋgara pida to tutuuŋ tipul Yerusalem, ve tila tineep toman Yesu. Yes tighita taghoniiŋa toni titaghon tutuuŋ todi to menuuŋ nimadi maau, ve rikia moghon tighan aniiŋ. Tovenen tighita di, le irau lolodi maau. Pasa, taghoniiŋa toni nimadi iŋgalaaŋ maau, ve tigham aniiŋ ve tighan. c 

Tovenen tighason Yesu tighaze: “Ughita. Taghoniiŋa tiom nimadi iŋgalaaŋ maau, ve tighan aniiŋ. Pughu vena to titaghon tutuuŋ to nditimbuud maau?”

Yesu ipamuul aliŋadi ighaze: “Yam ndiran kaaromŋa. Aparim taumim sorok pa ghurla tiam! Muuŋ, propet Isaia ivotia Maaron aliŋa waaro eez to deŋia kat pa ŋgar to yam aghamghami. Isaav tovene:

‘Ndiran tonene tipapait ghou sorok pa avodi uli moghon.
Eemoghon lolodi, nene ineep mala kat payou.
Saveeŋ ve tutuuŋ katindi to tipatoot tamtoghon pani, nene itaghon ŋgar tiou maau. Itaghon ŋgar to tamtoghon moghon.
Tauto suŋuuŋ ve mbesooŋ todi to tighamgham payou, nene inim mbeb sorok, ve le anoŋa maau.’” d 
Ve Yesu isaav padi muul ighaze: “Tutuuŋ to Maaron tau ighuri, yam apuli wa. Ve tutuuŋ to tamtoghon tighuri, tauto akisi tuŋia ve ataghoni.” Yesu iseeŋ saveeŋ toni muul ighaze: “Yam apul murimim pa tutuuŋ to Maaron, ve apuli izi ineeple. Leso apariaaŋ tutuuŋ to nditimbumim tigham payam, ve ataghoni. Ŋgar tovene, yam araua kat! 10 Aghita. Tutuuŋ to Mose isaav tovene:

‘Matam loŋloŋaiŋa pa tamam ve tinam, ve utandag padi.
Ve ‘ighaze tamtoghon eta ipiyaav saveeŋ samia pa tama ma tina, ye irau imaat.’ e 
11 Eemoghon yam asavsaav tovene: Ighaze tamtoghon eta le mbeb to iuul tama ma tina pani, eemoghon igham padi maau, ve isaav padi ighaze: ‘O, mbeb tonene, you irau nagham payam maau. Pasa, nawaat Maaron iza pani wa.’ Ighaze tamtoghon eta igham tovene, ve muri itoor ŋgar toni ve ighaze igham mbeb tonenen pa tama ve tina, yam aŋgalsekini aghaze ye igham tovene malep. 13 Tovenen tutuuŋ to nditimbumim tigham payam ve aazne ataghoni, nene igham gham atatan Maaron saveeŋ toni izi inim mbeb sorok. Ve ŋgar tiam naol to aghamgham di, nene raratedi moghon.”

Mbeb to igham tamtoghon tasami ila Maaron mata f 

14 Yesu isavsaav toman di le isob, ghoro ipoi ival tiina tinim toni muul, ve isaav padi ighaze: “Yam asob alooŋ saveeŋ tiou tonene, ve agham ŋgar pani pooi. 15 Mbeb to tamtoghon tighami ve tighani izila pa apodi ne, eta irau igham di tasami ila Maaron mata ne maau. Ŋgar samsamia to tineep ila lolodi ve tivotvot, tauto tigham di tasami ila Maaron mata.” g 

17 Yesu ipul ival tiina tonowen tineep pumuri, ve ilooŋ ila ruum lolo, ghoro taghoniiŋa toni tighasoni pa saveeŋ toni pughu. 18 Ye isaav padi ighaze: “Wai, yam paam lemim ŋgar maau? Aghilaal sone? Mbeb to tamtoghon tigham di ve tighan di, eta irau igham di tasami ila Maaron mata ne maau. 19 Pasa, mbeb tovene igham mbeb eta pa lolodi maau. Izila pa apodi moghon, ve mala maau timbebeghazi ilale.”

Yesu saveeŋ toni tonene ipaghazoŋan ghiit ighaze mbeb to naol ne, nene poia pa ghaniiŋ. Eta irau igham ghiit tasami ila Maaron mata maau.

20 Ve Yesu isaav muul ighaze: “Ŋgar samsamia to tineep ila tamtoghon lolodi ve tivotvot, tauto tigham di tisami ila Maaron mata. 21 Pasa, ŋgar samsamia to tineep ila tamtoghon lolodi ve tivotvot, tauto tipamundigin di ve tigham ŋgar samsamia naol inimale: tighur maat, tiyub, tirab tamtoghon imaat, tiwaghamun vaiuuŋ, matadi aniiŋ, tigham didiaaŋ, tigham kaarom, matadi samia tinimale ŋgavuun ve ŋgai, tighur koi pa nditadi to ledi mbeb katindi, tipiyaav saveeŋ samia pa nditadi ve Maaron paam, tipait taudi izadi, ve tigham ŋgar samsamia pida paam tinimale yes to tikankaan pa Maaron. 23 Ŋgar samsamia naol tonene to tineep ila tamtoghon lolodi ve tivotvot, tauto tigham di tisami ila Maaron mata.”

Grik tidi eez to Ponisia ighur ila to Yesu ariaŋa h 

24 Yesu ipamundigin laghooŋ toni muul, ve ipul ndug tonowen, ve ilaagh ila ivot taan suruvu to ndug tiina Tair ineep pani. Ghoro ilooŋ ila ruum eez to ndug tonowen ve ineep. Ina to nepooŋ tonowen, ye ighaze tamtoghon tiwatagi malep. Eemoghon maau. Pasa, tamtoghon tighita wa.

25 Liva eez to ndug tonowen, avuvu samia izeev natu liva. Liva tonowen, ye Yuda maau. Ye Grik tidi to taan Ponisia to ineep ila taan suruvu to Siria. Ye ilooŋ Yesu varu, ve rikia moghon iŋarua Yesu ila, itap izi Yesu aghe pughu, ve itaŋ rorani ighaze indiir avuvu samia tonowen ighau pa natu liva.

27 Yesu isaav pani tovene: “Ighaze tasad aniiŋ to ndipain, ve tapiyaava rikia moghon ila ŋgavuun tighani, nene deŋia maau. Ndipain tighan muuŋ le apodi isuŋ, ghoro tapiyaav aniiŋ pida ila pa ŋgavuun tighan.”
(7:27) Saveeŋ to Yesu tonene pughu tovene: Ye pale igham uraat ila yes Yuda lolodi le isob, ghoro pooz to Maaron ila irau ndug ndug to Yuda maau ne paam.


28 Liva tonenen ipamuul aliŋa ighaze: “Tiina, aliŋam poia. Eemoghon ŋgavuun paam tisasaŋan. Ighaze ndipain tighanghan, ve aniiŋ ŋgiira ŋgiira itaptap izi taan, nene inim ŋgavuun adi pa tighan.”

29 Yesu ilooŋ saveeŋ tonene, ve isaav pani muul ighaze: “Yom upamuul aliŋag le deŋia kat. Tovenen umuul ula pa ruum toman lolom poia. Pasa, avuvu samia ighau pa natum liva wa.”

30 Tovenen liva tonenen imuul ila pa ruum, ve ighita natu liva ighengheen izala watiiŋ toni. Avuvu samia ighau pani ve tini poia wa.

Yesu igharaat ŋgeu eez to taliŋa toman avo ivool

31 Yesu ipul taan suruvu to Tair, ve isakia laghooŋ toni ila ivot ndug Sidon. Ghoro iluvut muul inim, ve imbut taan suruvu to Dekapolis, ve ila ivot ya naliu Galilaia muul. j 

32 Ye inepneep tonowe, ve tigham ŋgeu eez ila toni. Ŋgeu tonowen, taliŋa ipam, ve irau isavia saveeŋ ighazooŋ maau. Tovenen titaŋ roran Yesu tighaze ighur nima izala ŋgeu tonenen pogho, leso tini poia. 33 Yesu ighami ve yesuru tila saguan ris pa ival tiina, ghoro izeev nima u ru ilooŋ ila ŋgeu tonenen taliŋa. Le isob, ghoro iŋazub ila nima, ve ighur nima ila ŋgeu tonenen yama. k 

34 Ghoro mata iza pa sambam, iyavan, ve isaav pani ighaze: “Epata!” (Saveeŋ tonene, pughu tovene: ‘Ukaak.’)

35 Rikia moghon ve ŋgeu tonenen taliŋa toman avo pakia, ve isaav aliŋa ivot ighazooŋ. l 

36 Yesu iŋgalsekin di ariaŋa ighaze tivotia mbeb gharatooŋa tonenen varu pa tamtoghon eta malep. Eemoghon maau. Onoon, ye iŋgalsekin di pae katindi. Eemoghon yes tinoknok votiaaŋ mbeb tonenen varu gha ila. 37 Tamtoghon tisob to tilooŋ mbeb tonenen varu, ruŋadi iza kat le ŋgar todi isob, ve tisaav tighaze: “Wai, ŋgeu tonene, ye iraua kat. Mbeb tisob to ye ighamgham di, nene popoia moghon. Aghita. Yes to taliŋadi pamu, ve yes to avodi ivool ne paam, ye igham di tiloŋlooŋ saveeŋ ve tisavsaav.”

Copyright information for `TUCO