bNam 24:17
cMika 5:2; Yo 7:42
eMbo 72:10+; Is 60:6
fIgham 4:22; Hos 11:1
hMbnp 35:19; Yer 31:15
iIgham 4:19
jLu 2:39; Yo 1:46

Matthew 2

Yes ŋgara to ndag pughu tila tighita Yesu

Sawa to kinik Erod ighamgham pooz pa yes Israela, Yesu tina Maria ipoopa izi ndug Betelem to ineep taan suruvu to Yudea. Muri ghoro, ndiran pida to ledi ŋgar tintina pa pitum ne, tilaagh tila tivot Yerusalem. Ndiran tonowen, ndug todi ineep mala kat ila pa ndag iza.
(2:1) Yes ŋgara tonene tiwatag Maaron kat maau. Tisuŋsuŋ pa maaron pida.


Yes tila tivot Yerusalem, ve tighason tighaze: “Kinik to yes Yuda to tina ipoopa aazne, ineep sine? Pasa, yei nineep izi ndug tiei to ndag iza we, ve nighita pitum paghu eez to inim ghilalooŋ payei pani. Tauto ninim nighaze nighita, ve niput aghemai pani, ve nipakuri.” b 

Kinik Erod ilooŋ saveeŋ tonene le ruŋa iza ve igham ŋgar naol. Ve ival tiina to Yerusalem paam, tisob ruŋadi iza, ve tigham ŋgar naol. Tovenen Erod ipoi yes daba to watooŋrau toman ŋgara pida to tutuuŋ tinim tilup di, ve ighason di ighaze: “Laak, Mesia, pale tina ipoopa izi sine?”

Yes tipamuul aliŋa tighaze: “Pale ipoopa izi ndug Betelem to ineep taan suruvu to Yudea ne. Pasa muuŋ, propet eez imbood saveeŋa tovene:

Ndug Betelem to uneep taan suruvu to Yudea ne, yom ndug sorok maau.
Varum pale ilib pa paanu tintina to tighamgham pooz pa Yudea.
Pasa, ŋgeu tiina eez pale ivot ilat tiom.
Ye pale iŋgin tamtoghon tiou Israel, ve igham pooz padi.” c 
Erod isavsaav toman di le isob, ghoro ipoi yes ŋgara to ndag iza tinim inimale yoŋgaaŋ, ve ighason poian di pa sawa sine kat to tighita pitum tonowen ivot. Ghoro imbaaŋ di tila pa ndug Betelem ighaze: “Ala akaal pain kainaŋen tonowen le ighaze aghita, ghoro amuul anim apaes payou. Leso you paam nala naghita, ve naput agheg pani, ve napaiti.”

Erod isavsaav toman di le isob, ghoro timundig ve tila. Ve pitum to muuŋ tighita izi ndug todi, nene ila imuuŋ padi, ve titaghoni tila. Yes tighita pitum tonowen muul, le lolodi poia kat. Pitum tonowen ila le ineep izala ruum to pain kainaŋen ighengheen pani ne pogho. 11 Tila tivot tonowe, ve tilooŋ tila ruum lolo, ve tighita pain kainaŋen yesuru tina Maria. Tiput aghedi pani ve tipakuri, ghoro tikaak pelpeel todi, ve tiwaan mbaliiŋ pida to atiadi tintina, ve tigham pani inimale pakuruuŋi. Tigham yaam gol, ve naunauŋ pida to vuzidi popoia kat.
(2:11) Mbeb to tigham pa Yesu, nene inim ghilalooŋ pani ighaze ye kinik. Ve frankinsens, nene naunauŋ to tighamgham pa watooŋrau. Nene ipatooŋ ghiit ighaze Yesu ye Maaron. Ve miir, nene mbeb to tighurghuri izala mateeŋa poghodi leso tigharaat di. Nene ipatooŋ ghiit ighaze Yesu pale imaat pait.
,
e 

12 Muri ghoro, Maaron ivot padi ila vibiiŋ, ve iŋgalsekin di ighaze timuul tila to kinik Erod muul malep. Tovenen titaghon ataam ite, ve timuul tila pa ndug todi.

Yosep igham Yesu yesuru tina Maria, ve tighau tila pa Isip

13 Yes ŋgara to ndag iza timundig ve tila, ve mala maau, Maaron imbaaŋ aŋela toni eez ila ivot to Yosep ila vibiiŋ, ve isaav pani ighaze: “Ulooŋ. Erod pale ikaal pain kainaŋen tonene, leso irabi imaat. Tovenen yom irau umundig, ugham pain kainaŋen yesuru tina, ve aghau ala pa Isip. Ala aneep tonowe, le irau you nasaav payom muul.”

14 Tovenen Yosep imundig pa mboŋ, ve igham pain kainaŋen yesuru tina, ve tighau tila pa Isip. 15 Tinepneep tonowe le Erod imaat.

Tauto saveeŋ to Maaron ivotia ila propet toni eez avo, anoŋa ivot. Saveeŋ tovene:

Natug ineep izi Isip, ve napoii imuul inim. f 

Erod irab ndipain to ndug Betelem

16 Erod isaŋan yes ŋgara to ndag iza le maau, ghoro ighilaal ighaze yes titombaana. Tovenen ate malmal kat. Ye mata iŋgal saveeŋ to yes ŋgara to ndag iza tisavia pa sawa to tighita pitum ivot, tovenen imbaaŋ ndaaba toni pida tila ndug Betelem ve ndug pida to tineep tigharau. Tila tivot tonowe, ve tirab ndinatudi nditamoot tisob to ndaman todi ruŋaruŋa ve izi. 17 Tovenen Maaron aliŋa to muuŋ propet Yeremia ivotia, anoŋa ivot. Saveeŋ tovene:

18 Taŋiiz tiina pale ivot izi ndug Rama.
(2:18) Ndug Rama ineep igharau ndug Betelem.

Rael pale itaŋ tiina pa ndinatu.
Pasa, tirab di tisob timatmaat. Eta ineep muul maau.
Tovenen titoova pa tirab Rael ate, eemoghon tiraua maau. h 

Yosep igham Yesu yesuru tina Maria, ve timuul tila pa taan to Israel

19 Yosep yesuru Maria ve natudi Yesu tinepneep izi Isip, le Erod imaat. Ghoro aŋela eez to Maaron ila ivot to Yosep ila vibiiŋ, 20 ve isaav pani ighaze: “Umundig, ugham pain kainaŋen yesuru tina, ve amuul ala pa taan to Israel. Pasa, ndiran to tikaal ataam pa tirab pain kainaŋen imaat, yes tisob timatmaat wa.” i 

21 Tovenen Yosep imundig, igham pain kainaŋen yesuru tina, ve timuul tila pa taan to Israel. 22 Eemoghon Yosep ilooŋ tighaze Erod natu Arkelaus igham tama ina, ve inim kinik pa taan suruvu to Yudea. Tovenen imatughez pa ila ineep izi Yudea. Ve mbeb ite, Maaron ivot toni ila vibiiŋ, ve iveivei pani ighaze tineep izi Yudea malep. Tovenen Yosep ipaghau pain kainaŋen yesuru tiina tila pa taan suruvu to Galilaia. 23 Tila tivot tonowe, ve tineep izi ndug Nasaret. Tauto Maaron aliŋa to yes propeta toni tivotia, anoŋa ivot. Saveeŋ tovene:

Tamtoghon pale tiwaata tighaze ‘ŋgeu to Nasaret.’ j 
Copyright information for `TUCO