aMbaŋ 1:20

Psalms 109

Ŋgeu eez ighason Maaron pa ipamuul ŋgar samia to koia imuul ila pa taudi

Mbouŋ to David

O Maaron, sawa isob you napapait ghom.
Ulooŋ suŋuuŋ tiou. Neneeŋam malep!

Pasa, ndiran samsamiadi to avodi kaarom, tighur koi payou,
ve tiŋgal saveeŋ kaarom naol payou.

Koiagŋa tonowen tipipiyaav saveeŋ samsamia payou,
ve tiwaghamun izag sorok.

Muuŋ, you lolog padi, ve nagham ŋgar poia padi.
Eemoghon tiyat ŋgar poia to nagham padi ne pa ŋgar samia, ve tiŋgal saveeŋ naol payou.
Eemoghon you ŋgeu to suŋuuŋ.

Ŋgar poia to you nagham padi, yes tiyati pa ŋgar samia.
You lolog padi. Eemoghon yes tighur koi payou, ve tighaze:

“Taghur tamtoghon samia eta iyoon ila dige pa iŋgal saveeŋ pani.
Leso sawa to tipayoonda pa savsaveeŋ, tighita tighaze ye isosor, ve tighur atia pani.
Ve nighaze suŋuuŋ toni paam, nene isosor ila Maaron mata.

Ŋgeu tonowen ineep mala izi taan malep.
Tamtoghon ite paam igham ina, ve igham uraat toni, ghoro poia. a 

Azuwa pale inim naar,
ve ndinatu tinim parooŋa.

10 Pale tireu ndinatu ruum todi tizi, ve tinaan di tighau tila.
Leso tiwaghamgham, tiwalaghlaagh, ve tisuŋsuŋ ledi mbeb.

11 Ighaze ŋgeu tonowen igham bun ila to tamtoghon eta, nene pale tamtoghon tonenen inim ve iyou mbeb toni tisob tinim le.
Mbeb to ye ighun wadedeŋa pani, ndiran to ndug ite pale tila ve tiyou di tinim ledi.

12 Tamtoghon eta igham poian ŋgeu tonowen malep.
Ve ndinatu to tinim parooŋa, tamtoghon eta lolo isamin di ve iuul di malep.

13 Ndinatu timatmaat le tisob, ghoro poia.
Leso ŋgeu tonowen le iza muul sob, ve tamtoghon lolodi imaagh pani.

14 Ŋgar samia to nditimbu, tamtoghon pale tisavia pa Yoova, leso mata iŋgalŋgali.
Ve sosor to tina paam, Yoova ireua malep.

15 Tovenen sosor to ŋgeu tonowen toman siŋ toni, Yoova pale mata iŋgalŋgali irau sawa isob, ve ipasob di pa taan.
Leso tamtoghon lolodi imaagh padi kat.
16 Pasa, ŋgeu tonowen, mata iŋgal ve igham ŋgar poia eta pa tamtoghon maau.
Yes mbolaaŋa ve yes to tineep ila pataŋani lolo, ye ighamgham samin di, ve irab di timatmaat.

17 Ŋgar to avood samia pa tamtoghon, ye lolo pani.
Eemoghon saveeŋ toni samia tonowen pale imuul pa tau, ve iwaghamuni.
Ŋgar to tasuŋ Maaron leso ighur poia toni iza to tamtoghon, ŋgeu tonowen lolo pani maau.
Tovenen poia to Maaron pale ineep saguan pani.

18 Ŋgar to avood samia pa tamtoghon, ye ipulpuli maau.
Nene inimale nonogiiŋa to ye lolo pani kat, ve moghon moghon indududi.
Eemoghon saveeŋ toni samia tonowen pale imuul pa tau,
ve izila lolo inimale ya, ve itaghon tua to naol ne inimale ŋgoreeŋ, ve iwaghamuni.

19 Saveeŋ toni samia tonowen, pale imuul pa tau ve ikaui,
inimale kawaal to ye ikawaala ila ŋgali, ve inimale puus to ipusi pani irau sawa isob.”
20 O Yoova, saveeŋ samsamia naol to koiagŋa tiŋgalŋgali payou,
upamuula imuul ila pa taudi. Leso uyat ŋgar todi tonowen.

21 Yoova, yom Maaron tiou. Izam tiina pa poia tiom ve ulaaŋ tiom.
Yom lolom ineep tuŋia ila to tamtoghon tiom ve uluul di.
Tovenen uyoon payou, ve upas ghou navot pa pataŋani tiou tonene.

22 Pasa, aazne naneep sami, ve leg ataam eta maau.
Tovenen ateg imbumbu, ve lolog isami kat.

23 You nanimale mbeb yavyaava to ighaze ndag izila, ghoro taghita muul maau.
You nanim isis to yaghur iviviira ila.

24 You naŋgun taug pa ghaniiŋ aniiŋ ris wa.
Tovenen nakoŋkoŋ, ve tuag tisob timareer, ve agheg imatmaat.

25 Ighaze koiagŋa tighita ghou, yes tiveveleg ghou, ve tiŋiŋiŋ payou.
Ve luadi katia payou ve tighaze: “Aa, ughita wa?”
26 Yoova, yom Maaron tiou. Uul ghou lak!
Ugham mulin ghou pa pataŋani tiou tonene. Pasa, lolom ineep tuŋia ila to tamtoghon tiom ve uluul di.

27 Ugham koiagŋa tiwatag nimam. Upatooŋ tapirim padi ve tighita katini pa matadi.
Leso tighilaal tighaze yom to Volaaŋa tiou.
28 Onoon, yes avodi samia payou. Eemoghon yom pale ughur poia tiom iza tiou.
Ighaze koiagŋa tipamundigin malmal payou, yom pale utatan di, ve upamuul di tila toman mayadi.
Leso ugham mbesooŋa tiom lolo poia ve tini iza.

29 Tovenen yes to tiŋgal saveeŋ payou ne, ugham di tiwaghamgham, ve tighau tila toman mayadi.
Mayaŋiiŋa todi tonowen pale inim ledi nonogiiŋa pa tindudi irau sawa isob.
30 Eemoghon you pale lolog poia kat pa Yoova, ve aliŋag iza ve napaiti pa poia toni.
Sawa to yeiŋa ival tiina nilup ghei pa suŋuuŋ, you pale nait iza.

31 Pasa, yes to tineep ila pataŋani lolo ve titaŋ rorani pa ulaaŋ, ye iyondyood digedi pa iuul di.
Ve yes to koiadi tiŋgal saveeŋ padi ve tighaze tirab di timaat, ye igham mulin di.
Copyright information for `TUCO