aSyg 15:3
bMt 6:31+

Psalms 111

Tapait Maaron pa uraat toni, ve tataghon tutuuŋ toni

Aleluia, tapait Yoova!
Ighaze ndiran deŋiadi tilup di pa suŋuuŋ, you pale nala toman di, ve napait Yoova toman lolog kat.

Pasa, Yoova ighamgham uraat tintina.
Tovenen yes to lolodi pa uraat toni kat, tighamgham ŋgar pa uraat toni irau sawa isob tighaze le tiwatag katini.

Uraat toni ipatooŋa ighaze ye tapiri tiina ve poia kat. Tauto tamtoghon titandag pani.
Ŋgar toni deŋia pale inepneep tovene itaghoni taghoni gha ila. a 

Ye ipamundigin ŋgar toit, leso mataad kisin uraat toni to gharatooŋadi ne.
Ye lolo isasamin tamtoghon toni, ve ighamgham poian di.

Yes to timatughez pani, ve titaghon ŋgar toni, ye ighamgham adi aniiŋ.
Ve saveeŋ to yesŋa tamtoghon toni timbua pa tilup di tinim ee moghon, ye mata iŋgalŋgali ve itaghoni irau sawa isob. b 

Muuŋ, ye igham uraat tintina ila tamtoghon toni matadi, leso ipatooŋ tapiri padi.
Sawa tonenen, ye igham taan to ndug ndug inim ledi pa tineep ila.

Uraat naol to ye igham di, nene tipatooŋa tighaze ye itataghon saveeŋ mbuaaŋ toni, ve ŋgar toni deŋia moghon.
Tovenen tutuuŋ tisob to ye ighur di, iit irau taghur ila, ve tataghon katin di.

Tutuuŋ tonowen pale tiyaryaaŋ tovene itaghoni taghoni gha ila.
Yoova ighur tutuuŋ tonowen itaghon saveeŋ mbuaaŋ toni ve ŋgar deŋia.
Muuŋ, ye ipas tamtoghon toni tivot pa pataŋani todi.
Ve sawa to yesŋa timbua saveeŋ pa tilup di tinim ee moghon, avo iyaryaaŋ padi ighaze titaghon saveeŋ mbuaaŋ todi tonowen ŋgara irau sawa isob.
Ye tapiri tiina, ve iza patabuaŋ kat. Tauto tamatughez pani, ve tataghon ŋgar toni.

10 Ŋgar to tamatughez pa Yoova ve tataghon ŋgar toni, nene inim pughu pa ŋgar poia.
Yes to titaghon saveeŋ toni, tiwatag ataam to tigham nepooŋ poia.
Tovenen iit tapaiti irau sawa isob!
Copyright information for `TUCO