aMbo 19:9, 119:140
bYo 17:15; 1Pe 1:5

Psalms 12

Tamtoghon avodi kaarom. Ve Maaron saveeŋ toni, nene onoon moghon

Mbouŋ to David

O Yoova, uul ghei lak! Pasa, tamtoghon to lolodi ineep tuŋia ilat tiom ve titaghon ataam tiom, tisob wa.
Yes to avodi onoon, eta ineep toman ghei muul maau.

Tamtoghon tisob tighamgham kaarom, ve tisasavia saveeŋ to le anoŋa maau ne pa nditadi.
Yamadi tortoraaŋ saveeŋ.
Saveeŋ to ivotvot ila avodi, nene poia. Eemoghon ŋgar to ineep ila lolodi, nene ite.
Yoova, ndiran to tisasavia saveeŋ ŋgoreeŋ pa tamtoghon pa tigham lolodi, upoon avodi.
Yes tipakur taudi tighaze: “Sei to inim daba payei ve iŋgin ghei?
Yei avomai mata. Sa ŋgar to ighaze nisavia, nene pale tamtoghon titaghoni moghon.”
O Yoova, ugham di neneeŋadi.
Tovenen Yoova isaav ighaze: “Yes mbolaaŋa to tirau mbeb eta maau, ve yes to koiadi tiwaghamun di, you nalooŋ taŋiiz todi wa.
Yes tikausim pa nepooŋ poia.
Tovenen aazne, you pale namundig ve nauul di.
You pale nagham mulin di ila koiadi nimadi, ve nauul di tineep pooi.”
Yoova saveeŋ toni, nene onoon moghon.
Kaarom eta ineep ila lolo maau. Saveeŋ toni, nene inimale silva to tighuri izala yab pa liim ve ru, leso muun isob ighau pani le iŋgalaaŋ kat.
Tovenen iit irau taghur ila saveeŋ mbuaaŋ toni. a 
Onoon, aazne ndiran samsamia tipapakur di ve tilaagh irau ndug ndug.
Ve ival tiina tipapait ŋgar samia.
Eemoghon Yoova, yom matam payei, ve uŋgin ghei nineep pooi.
Ve upoon ghei pa ndiran tovene irau sawa isob. b 
Copyright information for `TUCO