aMbo 91:1+
bMbo 91:9+

Psalms 121

Maaron ineep toman ghiit ve iŋginŋgin ghiit

Mbouŋ to yes to tizala Yerusalem pa suŋuuŋ

Matag izala pa lolooz naghaze naghita:
Ulaaŋ pale inim tiou vena?

Yoova moghon to pale nagham ulaaŋ ila toni.
Ye to ighur sambam ve taan.
Ye pale mata payom. Irau ipul ghom aghem kirikia ve utap maau. Ŋginiiŋ tiom ipamaat irau sawa isob.

Onoon kat, ŋginiiŋ to iit Israela, ighaze mata ighengheen, nene irau igheen maau.
Ipamaat irau sawa isob.
Yoova mata payom ve iŋgin ghom, leso uneep pooi.
Ye ineep ila digem, ve inim yavyaav payom pa ipoon ghom pa ndag. a 
Tovenen ighaze ndag, ndag irau ighaaz katin ghom maau.
Ve mboŋ, kaiyo irau iwaghamun ghom maau.

Yoova pale mata payom, ve ipoon ghom pa mbeb samsamia to naol.
Ye tau pale iŋgin ghom uneep pooi. b 

Ye pale mata pa laghooŋ tiom ve nepooŋ tiom. Tovenen sawa to upul ruum ve uvot ula, le sawa to ulooŋ umuul unum, ye pale ineep toman ghom, ve iŋgin ghom uneep pooi.
To aazne, ve itaghoni taghoni gha ila.
Copyright information for `TUCO