aMbaŋ 7:46
c1Sam 7:1-2
eMbaŋ 2:30
fMbo 148:14; Lu 1:69

Psalms 132

Yes Israela matadi iŋgal sawa to Maaron isia David inim kinik padi, ve igham lolooz Zion inim ina to nepooŋ

Mbouŋ to yes to tizala Yerusalem pa suŋuuŋ

O Yoova, matam iŋgal David pa pataŋani naol to imbaad di.
Muuŋ, David imbua saveeŋ ariaŋa toman Yoova, ye Maaron ariaŋa to Yakop.
Ve ipariaaŋ saveeŋ tonowen le iyaryaaŋ kat.

Ighaze: “You irau nalooŋ nala ruum tiou, ve nala inag to ghenooŋ sone.

Irau ateg izi, ve nagheen sone.

Le irau nandeeŋ ndug eta pa Yoova.
Ŋgar tiou iyaryaaŋ kat naghaze nakaal ndug eta, leso inim Maaron ariaŋa to Yakop ina to nepooŋ, ghoro ateg izi!” a 
Sawa to yei nineep izi taan suruvu to Eprata,
(132:6) Eprata, nene ndug Betelem iza ite.

yei nilooŋ Bokis to Saveeŋ Mbuaaŋ varu.

Tovenen nila le nighita ineep igharau ndug Yar. c 

Muri ghoro, tisakia ila Yerusalem. Tovenen nisaav nighaze: “Tamundig tala pa Maaron ina to nepooŋ to Yerusalem we.
Tala tagharau ina to ghamuuŋ pooz, ve taput agheed pani, ve tapaiti.”
O Yoova, umundig toman Bokis to Saveeŋ Mbuaaŋ, ve ula pa inam to nepooŋ, ve atem izi.
Bokis tonowen to inim ghilalooŋ pa tapirim.
(132:8) Yes Israela tighita Bokis to Saveeŋ Mbuaaŋ tighaze nene Maaron ina to ghamuuŋ pooz. Sawa to David inim kinik, ye igham Bokis to Saveeŋ Mbuaaŋ, ve ighuri ineep izi Yerusalem (2Sam 6). Solomon irei Rumai Tiina le isob, ghoro sawa pida to yes Yuda tilup di pa suŋuuŋ, tigham bokis tonowen ivot pa Rumai Tiina, ve tilaagh tomani titaghon ndug Yerusalem lolo, ve timbou mbouŋ tonene. Le isob, ghoro tighuri imuul ilooŋ ila rumai lolo.

Yei nighaze ŋgar deŋia ineep tuŋia ila to ndiran tiom to watooŋrau, inimale nonogiiŋa to moghon moghon tindud di pani.
Ve yes to lolodi ineep tuŋia ilat tiom ve titaghon ataam tiom, nighaze tilool ve tipait izam toman lolodi poia.
10 O Yoova, matam iŋgal mbesooŋa tiom David.
Ye ndamo payei, tauto nighaze ulooŋ suŋuuŋ tiei tonene. Paghu toni to yom ughuri inim kinik payei ne, upul murim pani malep.
11 Muuŋ, Yoova imbua saveeŋ ariaŋa toman David, ve ipariaaŋa le iyaryaaŋ kat.
Tovenen irau ireua maau. Isaav ighaze:
“You pale naghur papaghu tiom eta inim kinik, leso igham inam, ve ineep ila inam to ghamuuŋ pooz. e 

12 Ve ighaze papaghu tiom matadi kisin saveeŋ mbuaaŋ tiou, ve titaghon tutuuŋ tiou,
nene pale naghur papaghu todi paam tinim kinik, ve tineep ila inam to ghamuuŋ pooz to aazne, ve itaghoni taghoni gha ila.
Tutuuŋ tonenen, you taug pale napatooŋ ŋgara padi.”
13 Yoova isia ndug Zion, ve ighami inim le wa.
Ndug tonene, to ye lolo pani ighaze ineep ila.

14 Tauto isaav ighaze: “Ndug tonene pale inim inag to nepooŋ irau sawa isob.
Inag to ghamuuŋ pooz pale ineep sualen. Pasa, lolog pa ndug tonene kat.”

15 You pale nagham poian tamtoghon to Zion, ve poia tiou tiina iza todi. Leso tiraua kat pa mbeb to naol.
Ve nagham aniiŋ pa yes mbolaaŋa todi, ve tighan le apodi isuŋ.

16 Ve yes to watooŋrau to tineep izi Zion, you pale napalot di pa uraat todi. Leso tinim ataam pa ulaaŋ tiou ila pa tamtoghon.
Tovenen tamtoghon to Zion to lolodi ineep tuŋia inim tiou ve titaghon ataam tiou, pale tilool ve tipait izag toman lolodi poia kat.
17 Paghu to David to naghuri inim kinik ve ineep izi ndug tonene, you pale nagham iza ve tapiri ivot inim tiina.
Kinik to you taug nasia ve naghuri pa uraat, you pale napalot papaghu toni,
ve tigham pooz itaghoni taghoni gha ila, tinimale lam to iyaryaar irau sawa isob. f 

18 You pale natatan kinik koia, ve moghon moghon tinepneep toman mayadi.
Eemoghon yes to tinepneep ila kinik samba, you pale napalot di, ve nagham di tineep poia kat. Leso nepooŋ todi poia tonowen ipambood kinik.
Copyright information for `TUCO