aIgham 19:5
bIgham 12:29
cMbo 115:4; Syg 9:20

Psalms 135

Maaron to Israel iŋgin mbeb tisob

Aleluia, tapait Yoova!
Yam mbesooŋa to Yoova, apait iza ve apakuri.
Yam to ambesmbees pani ila rumai toni lolo, ve yam to aneep pumuri igharau rumai dige ne paam.

Apait Yoova! Pasa, ye poia le poia kat.
Ye iza tiina pa ŋgar paghuna to ighamghami. Tovenen apait iza ila mbouŋ.

Muuŋ, Yoova isia Yakop, ve ighami inim le.
Tauto ighita iit Israela ighaze iit tamtoghon toni kat. a 
You nawatag: Yoova, ye iza tiina kat.
Maaron toit ilib pa ndimaronŋa tisob.

Ighaze Yoova lolo pa igham ŋgar eta izi sambam, ma izi taan, ma ila te pogho, ma izila te lolo, nene ighami moghon. Pasa, mbeb eta ila muri maau.

Ye to igham yaghur tae indoui ila yaghur pughu.
Ve igham uman izi, ve igham ndug milia.
Ye ikakaak ruum toni to yaghur ineep ilooŋ ila ne ataama, leso ivot ve ilaagh irau taan.
Muuŋ, ye irab yes Isipa ndinatudi aidaba toman ŋgai todi to tipoop di muuŋ ne, le tisob timatmaat. b 

Ye igham mbeb gharatooŋadi ve uraat tintina izi Isip, le iwaghamun kinik todi toman uraata toni tisob.

10 Sawa to yes Israela tilooŋ tila taan to yes Kanaana, ye irab tamtoghon to ndug ndug timatmaat.
Kinik to tapiridi tintina ne paam, ye irab di timatmaat.

11 Ye irab Sihon to kinik to yes Amora, Og to kinik to Basan,
ve kinik tisob to ndug ndug to Kanaan.

12 Ve igham taan todi inim yes Israela ledi.
Leso tamtoghon toni tineep pani itaghoni taghoni gha ila.
13 O Yoova, izam tiina pale inepneep tovene irau sawa isob!
Tamtoghon pale matadi iŋgal uraat tiom, ve tivotia varum itaghoni taghoni gha ila.

14 Pasa, Yoova iyondyood pa tamtoghon toni, ve ighurghur atia pa yes to tigham samin di.
Ye lolo isasamin mbesooŋa toni, ve iuluul di.
15 Ndug ndug tigharaat maaron todi pa silva ve gol.
Maaron kaaromŋa tonowen, tamtoghon tigharaat di pa nimadi. c 

16 Yes ledi avodi. Eemoghon tisavsaav maau.
Ve ledi matadi. Eemoghon tighita ndug maau.

17 Yes ledi taliŋadi. Eemoghon irau tilooŋ saveeŋ maau.
Ve yaghur eta ivot pa uzudi maau. Pasa, yes mbeb matadi yaryaara maau.

18 Tamtoghon to tigharaat maaron kaaromŋa tovene ve tinumeer di, yes tisob tinimale maaron todi tonowen. Tirau mbeb eta maau.
19 Yam ival tiina to Israel, apait Yoova pa poia toni!
Ve yam ndiran to watooŋrau to avot ila to Aron, apait Yoova pa poia toni!

20 Ve yam rumai Levi to auluul uraat to rumai ne paam, apait Yoova pa poia toni!
Tovenen yam to amatughez pa Yoova ve ataghon ŋgar toni, asob apaiti pa poia toni.
21 Yoova ina to nepooŋ ineep izi Yerusalem.
Tovenen yam to aneep izi ndug Zion, apaiti pa poia toni!
Aleluia, tapait Yoova!
Copyright information for `TUCO