aSyg 18:1-19:4

Psalms 137

Taŋiiz to yes Israela izi Babilon

Yei mbolemai izi ila ya to yes Babilona digedi,
ve niŋazuuv ila pa ndug Zion, le lolomai isami ve nitaŋ.

Tovenen nisaron gita tiei tizala timonau ila ai bogadi.
Pasa, lolomai pa nirab di muul maau.

Koiamai to tigham ghei ninim nineep ndug todi, tighaze nimbou mbouŋ pida, leso tilooŋa ve igham lolodi poia.
Tisaav payei tighaze: “Ou, ambou mbouŋ tiam eta to ndug Zion ve nilooŋa lak!”

Eemoghon aazne, yei nineep ninim loomba pa taan ite.
Pale nimbou mbouŋ pa Yoova izi ndug tonene vena?
O Yerusalem, ighaze lolog imaagh payom,
Yoova tau pale iwaghamun nimag waan, leso narab gita muul sob.

Onoon kat, ighaze matag iŋgal Yerusalem muul maau,
ve tinig iza pa mbeb ite paam ilib pa Yerusalem,
Yoova tau pale iwaghamun avog, leso nambou muul sob.
O Yoova, matam iŋgal ŋgar samia to yes Edoma, ve uyati.
Pasa, sawa to koiamai tireu Yerusalem, yes Edoma tinidi iza, ve tisaav tighaze:
“Iya! Poia kat pa areu Yerusalem. Areu mbirisani izi!”

O ndug Babilon, yom uwaghamun ndug katindi, tovenen yom paam pale usami.
Tamtoghon to ighaze iyat ŋgar to yom ugham payei, nene pale tini iza pa poia to Maaron to iza toni!

Ve yes to tikis ndinatumim geegeu, ve tilos di tizala yaam pogho, tovene paam. Poia to Maaron pale iza todi ve tinidi iza. a 
Copyright information for `TUCO