Psalms 142

Suŋuuŋ to tamtoghon to ighita ighaze ye eŋgeni moghon

Mbouŋ to David

Mbouŋ tonene iŋarua sawa to David iyooŋ ila yaam saambu lolo

You nataŋ roran Yoova toman aliŋag tiina.
Taŋiiz tiou iŋarua naghaze lolo isamin ghou ve iuul ghou. Pasa, you mbesooŋa toni.

You navotia pataŋani tiou ila toni.
Mbeb to igham ghou lolog isami, you nasavia pani.
Ighaze lolog ipataŋan kat, ve tapirig isob, yom uwatag nepooŋag wa.
Ataam to nataghoni, nene koiagŋa tighur liis todi ila wa.

Matag izi pa digeg, eemoghon naghita eta ineep pa iuul ghou maau.
Ve leg ndug eta to yoŋgaaŋ maau.
Ve tamtoghon eta mata iŋgal ghou paam maau.
Yoova, you nataŋ roran ghom pa ulaaŋ.
Ve nanumeer ghom naghaze yom to unum inag to yoŋgaaŋ.
Sawa to naneep izi taan, you naneep ilat tiom. Unumale taan poia eez to tipuli payou, leso naneep ila.
Irau nambool pa mbeb eta maau.

Ughur taliŋam pa taŋiiz tiou tonene.
Pasa, aazne pataŋani itatan ghou kat.
Koiagŋa to tighurghur pataŋani payou, tapiridi ilib payou kat.
Tovenen ugham mulin ghou ila nimadi.

Nepooŋ tiou, nene inimale naneep ilooŋ ila ruum to yabyabuuŋ, ve leg ataam eta pa navot maau.
Tovenen upas ghou navot pa pataŋani tonene. Leso napait izam.
Ighaze ugham poian ghou ve uul ghou, nene pale tamtoghon tiom deŋiadi tinim tiluvutin ghou ve napait izam toman lolog poia ila matadi.
Copyright information for `TUCO