aMbo 14:3; Ro 3:10,20
bMbo 77:5
cMbo 42:2, 63:1
dMbo 25:4+, 119:12; Yo 16:13

Psalms 143

Ŋgeu eez ighason Maaron pa ulaaŋ

Mbouŋ to David

O Yoova, ulooŋ suŋuuŋ tiou tonene.
Ughur taliŋam pa taŋiiz tiou, ve lolom isamin ghou.
Yom utataghon saveeŋ mbuaaŋ tiom, ve ughamgham ŋgar deŋia moghon.
Tovenen ulooŋ suŋuuŋ tiou tonene, ve uul ghou.

You mbesooŋa tiom. Upayoon ghou pa savsaveeŋ malep.
Pasa, tamtoghon eta deŋia ila matam maau. Yei nisob ndiran to sosor. a 
Ughita. Koiag igham taghon ghou, le ikis ghou ve itatan matin ghou.
Ye igham ghou naneep ila ndoroom tiina lolo, nanimale yes to timaat muuŋ kat wa.

Tovenen lolog ipataŋan, ve matughezaaŋ igham ghou, le tapirig isob.
Pasa, leg ataam eta muul maau.

Tauto matag iŋgal imuul ila pa mbeb to muuŋ tivot.
You naghamgham ŋgar pa uraat tintina naol to yom ugham di pa nimam. b 

Ve nakaak nimag iza ve nasuŋ payom.
You lolog payom kat, nanimale ŋgeu to ilaghlaagh ila ndug to le ya maau, ve murun matini. c 
O Yoova, ulooŋ suŋuuŋ tiou tonene, ve uul ghou rikia.
Pasa, lolog ipataŋan, ve tapirig isob kat.
Uŋgooz matam payou malep. Matam inim payou lak!
Pa vene namaat ve nala naneep ila mateeŋa ndug todi.

Yoova, you nanumeer ghom.
You naghaze mboŋmaagh nalooŋ ghom usaav payou ughaze: “You lolog ineep tuŋia ilat tiom.”
Upatooŋ ghou pa ataam to yom ughaze nataghoni.
Pasa, you lolog payom, ve naghur matag payom pa uul ghou.

Yoova, you nayooŋ ilat tiom, leso naneep pooi.
Ugham mulin ghou ila koiagŋa nimadi.

10 Yom moghon to Maaron tiou.
Upasaluŋgan ghou, leso nataghon katin ŋgar to lolom pani.
Avuvum poia pale igham pooz payou.
Leso laghooŋ tiou itaghon ataam deŋia. d 
11 Yoova, yom izam tiina pa poia tiom. Tovenen ugham mulin ghou leso naneep matag iyaryaar.
Yom utaghon ŋgar deŋia. Tovenen upas ghou navot pa pataŋani tonene.

12 Yom lolom ineep tuŋia ila to tamtoghon tiom ve uluul di. Tovenen urab koiagŋa le tisob timatmaat.
Yes to tighur koi payou ne, upasob di.
Pasa you mbesooŋa tiom.
Copyright information for `TUCO