aMbo 34:18; 2Kor 1:3+
bRo 11:33
cLu 1:52
dMt 6:26; Lu 12:24

Psalms 147

Tapait Maaron pa poia toni

Aleluia, tapait Yoova!
Onoon kat. Ighaze tambou pa Maaron toit ve tapaiti, nene poia kat.
Pasa ŋgar tovene, nene deŋia, ve igham ghiit lolood poia.
Yoova ighamgham uraat pa igharaat mulin Yerusalem.
Ve yes Israela to koiadi tigham di tila tineep irau ndug ndug, ye iyouyou di timuul tinim.

Tamtoghon to pataŋani ivot padi le lolodi isami kat, ye irabrab atedi,
ve igharaat pataŋani todi, leso lolodi poia. a 

Muuŋ kat, lolo ighur pa pitum piiz to pale ighur di tivot.
Ve ye tau iwaat pitum eŋaeŋa izadi le tisob.

Tiina toit, ye ariaŋa ve iza tiina.
Ve ŋgar toni tovene paam, tiina le tiina kat. Ighaze takaal pughu, pale taraua maau. b 

Yes to titatan taudi, ve timbadbaad pataŋani, Yoova iuluul di leso tineep pooi.
Eemoghon ndiran samsamia, ye itatan di ve ivazag di tizila taan. c 
Ambou toman tinimim iza, ve apait Yoova pa poia toni.
Arab gita, ve apakur Maaron toit.

Ye igham yaghur tae imbotoon tata,ve igham uman izi pa ipambees taan, ve igham kikiliiŋ itub izala lolooz.

Ye ipanpan mbeb naol naol to su.
Ighaze man kool ndinatu titaŋ pa aniiŋ, nene ye to igham aniiŋ padi. d 
10 Tamtoghon tinumeer hos to bide tapiridi, ve yes ndaaba to tiyoon ariaŋa pa malmal.
Eemoghon mbeb tovene irau igham Yoova lolo poia ve tini iza ne maau.

11 Tamtoghon to timatughez pani ve titaghon ŋgar toni, tauto tighami lolo poia.
Ye tini iza pa yes to tinumeera tighaze ye lolo ineep tuŋia ila to tamtoghon toni ve iuluul di.
12 Yam Yerusalema, apakur Yoova!
Yam tamtoghon to Zion, apait Maaron tiam.

13 Pasa, ataam to didiiŋ to iluvut ndug tiam, ye ipariaaŋ di le tuŋia. Ve ighurghur poia toni izaza tiam.

14 Ye iŋginŋgin ndug tiam, tauto aneep pooi.
Ve ighamgham amim aniiŋ wit to popoia kat. Tauto aghan le isooŋ gham.
15 Ighaze ye lolo pa mbeb eta ivot izi taan, nene aliŋa izi inim, ve mbeb tonenen ivot.
Saveeŋ toni ilaan, ve igham uraat rikia moghon.

16 Ye igham ndug ighavurvuraaŋ le ipisosooŋ inimale sipsip oro.
Ve sawa to ndug iyauŋ, ye igham waam izi le ipatuuk inim ais.

17 Ye igham ais patu patu titaptap tizi taan.
Ighaze igham ndug iyauŋ kat, sei to pale ineep potla? Eta maau.

18 Ghoro isaav, ve ais tonowen itoora inim ya, ve ireer muul itaghon ye aliŋa.
Ye igham yaghur toni tuntunu ilaagh, ve ya tireer muul.
19 Muuŋ, ye ivotia saveeŋ toni ila to Yakop,
ve ipatoot yes Israela pa tutuuŋ toni toman ataam toni to gabizooŋ mbeb.

20 Ye igham ŋgar tovene pa ndug ite paam maau.
Tauto tikankaan pa tutuuŋ toni ŋgara.
Aleluia, tapait Yoova!
Copyright information for `TUCO