aMbo 139:1
bMbo 11:7; Yo 17:24; 1Kor 13:12; 1Yo 3:2

Psalms 17

Ŋgeu deŋia eez itaŋ roran Maaron ighaze iuuli

Mbouŋ to David

O Yoova, ulooŋ taŋiiz tiou tonene, ve uul ghou.
Upaghazoŋan ghou ila tamtoghon matadi ughaze you ŋgeu deŋiag. Leso tiwatag tighaze you nagham sosor eta maau.
You nasuŋ ghom pa avog uli moghon maau. Nasuŋ ghom toman lolog. Tovenen ughur taliŋam pa suŋuuŋ tiou tonene, ve uul ghou.

Yom ughita mbeb tisob, ve uwatag ughaze you nataghon ŋgar deŋia ila matam.
Tovenen uvool tiou ve upaghazoŋan ghou ila tamtoghon matadi ughaze you nagham sosor eta maau.
Yom uŋgabiiz poian ghou, ve utoov ghou. Ve unum utiir ghou pa mboŋ paam. Tauto uwatag katin lolog.
Yom uŋgabiiz katin ghou, ve ughita ŋgar samia eta ineep ila lolog maau.
Pasa, ŋgar tiou iyaryaaŋ naghaze avog igham sosor eta malep. a 

You nataghon ŋgar to ndiran pida tighamghami ne maau. Pasa, matag kisin saveeŋ tiom.
Tovenen ndiran samsamia to tighamgham malmal, you napaghau taug pa ataam todi.

Sawa isob, nataghon ataam tiom moghon.
Agheg iyel pani rita maau.
O Maaron, you nawatag: Moghon moghon, yom uloŋlooŋ suŋuuŋ tiou. Tovenen nataŋ roran ghom naghaze uul ghou.
Ughur taliŋam payou, ve ulooŋ aliŋag tonene.

Yom lolom ineep tuŋia ila to tamtoghon tiom ve uluul di.
Tovenen ugham uraat gharatooŋadi tintina ve uul ghou.
Yes to tiyooŋ ilat tiom, nimam waan pale igham mulin di ila koiadi nimadi, ve tineep pooi.
Uŋgin poian ghou inimale uŋgin taum matam.
Upoon ghou inimale tatareek ipakud ndinatu.

Pasa, ndiran samsamia tizuaria di tighaze le tiwaghamun ghou.
Koiagŋa tiluvut ghou, ve tighaze tirab ghou namaat.
10 Lolodi isamin tamtoghon maau.
Ve tipapait taudi izadi toman aliŋadi tiina.

11 Yes titaghon ghou tinim tiluvut ghou wa.
Ve matadi deŋia payou tighaze tikokor ghou, ve tiza payou nazila taan.

12 Yes tinimale laion to pitoola, ve ighaze isaas motin mbeb, leso ighani.
Yes tinimale laion paghu to iyooŋ ila su lolo ve isasaŋan.
13 Yoova, umundig urab koiagŋa lak! Uyoon unum sigeu payou, upoon di, ve utatan tapiridi.
Ukas di pa buza tiom, ve ugham mulin ghou ila ndiran samsamia tonene nimadi. Leso naneep pooi.

14 Ndiran tonene tigham ŋgar tighaze mbeb to taan, nene mbeb tau.
Upatooŋ nimam padi, ve ugham mulin ghou ila nimadi.
Atia to yom ughaze ugham padi, ugham alulu padi sob. Upasobi pataghaaŋ. Leso tiyamaana kat!
Ve ugham tovene pa ndinatudi ve iseeŋga ila iza to nditimbudi paam.
15 Eemoghon you ŋgeu deŋiag. Tovenen you pale naghita naghom.
Sawa to namundig, you pale naneep ila naghom, ve nayamaana naghaze: “Aa, mbeb to nazuaria ghou pani, tauto naghami wa!” b 
Copyright information for `TUCO