bIgham 19:18+
cMbo 29:3+
dIgham 15:1-12
eMbo 119:102
fMt 5:3, 23:12
gYo 8:12; 2Kor 4:6; 2Pe 1:19
hYo 17:17
iMbo 23:1-5; 1Pe 5:10
j2Kor 10:4; Ep 6:10-17
kRo 15:9

Psalms 18

David ipait Maaron iza

Mbouŋ to David, mbesooŋa to Yoova.

Sawa to Yoova igham mulin David ila Saul ve koia tisob nimadi, ye imbou mbouŋ tonene pa Yoova a 

O Yoova, you lolog payom kat, ve naghamgham tapirig ilat tiom.

Yoova iponpoon ghou pa koiagŋa inimale raŋ to izala kat. Ve inim ruum ariaŋa pa nayooŋ ila lolo.
Sawa isob, ye ighamgham mulin ghou pa pataŋani tiou.
Maaron tiou iponpoon ghou pa ndaab inimale yaam tintina, ve you nayoŋyooŋ ila toni.
Ye inim sigeu payou, ve ye Volaaŋa tiou ariaŋa.
Ve ye inimale didiiŋ ariaŋa to iluvut ghou.

Iit irau tapait Yoova iza!
You napoii pa ulaaŋ, ve ye igham mulin ghou ila koiagŋa nimadi.
Liis to mateeŋ, rismoghon tone iliis ghou.
Pataŋani naol titatan ghou tinimale dibom tintina to tipol izala poghog.

Ve ravraav ariaŋa to mateeŋ ikaukau ghou, ve rismoghon tone ighereb ghou nazila ndug to mateeŋa.
Tovenen naghita liis to mateeŋ ineep ila matag.

Sawa to naneep ila pataŋani tonowen lolo, you napoi Yoova pa ulaaŋ.
Nataŋ roran Maaron tiou naghaze inim iuul ghou.
Taŋiiz tiou iŋarua, ve ye ighur taliŋa pani.
Ye ineep ila rumai toni lolo, ve ilooŋ aliŋag.
Tovenen igham yoŋgyoog itok taan le taan katkatia,
ve lolooz tisob pughudi tirur paam.
Pasa, ye ate yabyab kat.

Mbuas ivot pa uzu saambu,
ve yab yama toman ŋgiliŋi ivot pa avo, ve ighan suvun mbeb naol. b 

Ghoro sambam paroŋania ikaak, ve ye iyoon izala yaghur tae asosooŋa, ve izi inim.

10 Ye ineep izala aŋela toni ariaŋa ndimo, ve iroov inim,
inimale yaghur to le bage imbaada ve iroov inim.

11 Ye ipoon tau pa ndoroom, leso inim le ina to yoŋgaaŋ.
Yaghur tae asosooŋa ikaui, ve iŋgooz tau ila lolo.

12 Ye ineep tonowe toman ŋguruba tiina, ve igham ndug milia.
Tauto lalaav kiliŋkiliŋia izi, ve ais patu patu toman yab ŋgiliŋi titaptap tizi pa taan.

13 Yoova ineep izi sambam, ve isaav toman aliŋa tiina kat, inimale lalaav avolutu.
Maaron Tiina To Ilib Pa Ndimaronŋa Tisob Ne aliŋa ivot. Ve yab ŋgiliŋi toman ais patu patu titaptap tizi. c 

14 Ye igham lalaav iŋgal koia inimale pane natu toni.
Tauto matughezaaŋ tiina igham di, ve tiwaghaughau.

15 Yoova, sawa to upatooŋ mbalmbali tiom padi,
yaghur tiina ivot pa uzum, ve iviviir te ila saguan, le magargaar ivot ighazooŋ.
Ve taan pughu to ineep izila sila kat ne ivot peria. Mbeb eta ipoona muul maau. d 
16 Ghoro Yoova ineep sala, ve izuzuun nima izi inim ikis ghou, ve indae ghou naza pa mazovan bibiliiŋa lolo.

17 Koiagŋa tapiridi tintina, ve you narau di maau.
Yes tighur koi payou kat.
Eemoghon Yoova iuul ghou, ve ipas ghou ila nimadi.

18 Sawa to naneep ila pataŋani lolo, yes tipamundigin malmal payou.
Eemoghon Yoova ipoon ghou ve ipalot ghou.

19 Ye ipas ghou navot pa pataŋani tiou, ve ighur ghou nala naneep izi ndug poia.
Pasa, ye lolo payou kat. Tauto igham mulin ghou ve naneep pooi.
20 You nataghon ŋgar to deŋia ila Yoova mata. Tauto ye lolo payou ve igham poian ghou.
Nimag isosor pa mbeb eta maau. Tauto ye igham leg atia poia.

21 Pasa, moghon moghon, you nataghon ataam to Yoova.
Irau nagham ŋgar samia ve napul murig pa Maaron tiou ne maau. e 

22 Pasa, matag kisin tutuuŋ toni tisob.
Tutuuŋ toni to tineep pataghaaŋ, you napul murig padi maau.

23 Tauto leg sosor eta ila mata maau.
You naŋgin poian taug, tauto nagham mbeb eta isosor maau.

24 You naghamgham ŋgar deŋia ve ŋgar ŋgalaaŋa moghon ila Yoova mata.
Tauto ye lolo payou ve igham leg atia poia.
25 Yoova, ighaze tamtoghon eta lolo ineep tuŋia ilat tiom ve itaghon ataam tiom, nene pale lolom ineep tuŋia ila toni paam ve uuli irau sawa isob.
Tamtoghon to ighaze le sosor eta maau ve ŋgar toni isob popoia moghon, nene pale yom upamuul ŋgar poia pani paam.

26 Ve ighaze ŋgeu eta ighamgham ŋgar ŋgalaaŋa moghon, nene pale yom paam ugham ŋgar ŋgalaaŋa pani.
Eemoghon yes to ledi ŋgar tiina pa ghamuuŋ kaarom ve ŋgar samia, yom lem ataam naol pa uyat ŋgar todi tonowen.

27 Tamtoghon to titatan taudi, yom ughamgham mulin di pa pataŋani todi.
Eemoghon yes to tipapait taudi ve tiveleg ghom, yom utatan di tizi tinim mbeb sorok. f 

28 Yoova, Maaron tiou, yom ugham ghazooŋa tiom isul ghou, ve undiir ndoroom ighau payou, leso naneep pooi. g 

29 Yom upapalot ghou. Tauto you irau naparab toman koiagŋa le nalib padi.
Maaron tiou inepneep toman ghou. Tovenen you irau nayatov ghou le namalaaŋ pa didiiŋ ariaŋa to iluvut koiagŋa ndug todi, ve nalooŋ nala.

30 Ataam to Maaron, nene poia le poia kat.
Ve saveeŋ toni, nene onoon moghon. Irau taghur ila kat.
Tamtoghon tisob to tiyooŋ ila toni, ye inim sigeu padi. h 
31 Yoova moghon to Maaron tau. Ite paam maau.
Ye moghon to iponpoon ghiit inimale yaam tiina.

32 Ye ipapalot ghou pa tau tapiri, tauto nayoon ariaŋa.
Ve ye iŋgin ghou pa laghooŋ tiou, ve ipatooŋ ataam payou. i 

33 Ye igham agheg tuŋia ila taan, ve nalaan ariaŋa nanimale mekmek sagsag.
Tovenen sawa to nalaagh ila ndug sapsapi, irau agheg kirikia ve natap maau.

34 Ye ipatooŋ ghou pa ŋgar to ghamuuŋ malmal, ve ipalot nimag.
Tauto you irau nandaad pane ariaŋa to tigharaata pa mbaras. j 

35 Yoova, yom unum sigeu payou, ve ugham mulin ghou ila koiagŋa nimadi.
Ve nimam waan, tauto ipapalot ghou.
Yom uluul ghou, tauto izag inim tiina.

36 Yom ugharaat poian agheg ina.
Tauto agheg kirikia maau, ve nayoon tuŋia pa malmal.

37 You nalaan taghon koiagŋa nala le navot todi.
Ve narab di tisob timatmaat. Eta ineep muul maau.

38 You narab di le tisob titaptap tizi agheg pughu.
Eta irau imundig muul pa igham malmal payou ne maau.

39 Pasa, yom upapalot ghou pa taum tapirim. Tauto nayoon ariaŋa pa malmal.
Yom ughur koiagŋa tinim nimag ve nalib padi.

40 Yom ugham di titoor di, ve tighau tila.
Yes to tighur koi payou ne, you napasob di le tisob kat.

41 Yes tipoi pa ulaaŋ. Eemoghon eta iuul di maau.
Taŋiiz todi iŋarua Yoova paam. Eemoghon ye ilooŋ di maau.

42 You narab mbirisan di, le tinim ghavuur to yaghur iviviira gha ilale.
Ve navazag di tinimale tiiŋ to ineep ila ataam.

43 Sawa to tamtoghon timundig ve tizoor aliŋag, yom uvool tiou, ve ugham mulin ghou ila nimadi.
Ve ughur ghou nanim daba pa ndug ndug.
Tamtoghon to taan pida to you nawatag di maau, aazne tineep ila sambag, ve timbesmbees payou.

44 Ighaze tilooŋ aliŋag, nene rikia moghon ve titaghoni.
Ndug ndug tinim ve tiput aghedi payou toman matughezaaŋ tiina.

45 Pasa, tighilaal tighaze tirau mbeb eta maau.
Tauto matughezaaŋ tiina igham di, ve tipul ruum todi ariaŋadi to tiyoŋyooŋ ila lolodi, ve tinim tiou.
46 Onoon kat, Yoova inepneep!
Ye iponpoon ghou inimale yaam tiina.
Ye Volaaŋa tiou. Tovenen you napakuri ve napait iza.

47 Ye ivool tiou, ve iyat ŋgar samsamia to koiagŋa tigham payou.
Ve ighur ndug tisob tineep ila sambag.

48 Ye ipas ghou ila koiagŋa nimadi, ve iuul ghou le nalib padi.
Ye igham mulin ghou ila yes to tirabrab tamtoghon ne nimadi.
49 Tovenen Yoova, you pale nalool ve napait izam ila tamtoghon to ndug ndug lolodi, ve nambou pa napait ghom. k 

50 Yoova iuluul yes to ye ighur di tinim kinik. Tauto tiliblib pa malmal tintina.
Ye tau ighur David pa igham pooz.
Tovenen lolo ineep tuŋia ila toni, ve pale ighur poia toni iza to David toman papaghu toni itaghoni taghoni gha ila.
Copyright information for `TUCO