aMbaŋ 4:25+
bMbaŋ 13:33; Hib 1:5, 5:5
cSyg 2:27, 12:5, 19:15
dPil 2:9+
eMbo 34:8, 84:12

Psalms 2

Maaron isia tamtoghon toni inim kinik

Pughu vena to ndug ndug atedi yabyab ve tighaze tipamundigin malmal?
Tamtoghon tikaal ataam pa tigham didiaaŋ pasa? Ŋgar todi irau ighur maau. Tighami sorok. a 

Yes kinik to taan tigham aghedi tighaze tigham malmal.
Ve yes pooza tilup di, ve tikaal ataam pa tizoor Yoova ŋgar toni ve titatan ŋgeu to ye ighuri inim kinik.

Yes tighaze: “Yo! Takuup ravraav toman sen todi to tikau ghiit pani ne, ve tapiyaav di tila.
Leso tiŋgin ghiit muul sob.”
Eemoghon Yoova ineep ila ina to ghamuuŋ pooz izi ndug sambam, ve iŋiŋ padi.
Ye mata velegin ŋgar todi.

Ghoro isaav ariaŋa padi toman ate yabyab. Ate malmal, ve ipamatughezan di. Ighaze:

“You naghur tamtoghon tiou eez igham naghog ve inim kinik.
Ye ineep izi lolooz tiou patabuaŋ Zion, ve ighamgham pooz.”
Kinik to iit Israela isaav tovene: “You pale navotia saveeŋ to Yoova imbua toman ghou. Ye isaav payou ighaze:
‘You natug yom. Yom tamam to you. Aazne, you naghur ghom pa uraat. b 

Ughason ghou, ghoro you nagham ndug ndug tinim lem.
Tamtoghon to tineep irau taan dige to naol ne pale tinim lem, ve uŋgin di.

Pooz tiom pale ariaŋa kat, inimale titi to kinik to tigharaata pa ain.
Yom pale urab matin kinik tisob tapiridi. Pale tisami tinimale uur to tirabi le berberia.’” c 
10 Tovenen, yam kinik asob agham ŋgar pooi.
Ve yam pooza to taan, alooŋ saveeŋ ve apatum gham.

11 Amatughez pa Yoova, ve ambees pani.
Atandag pani, ve apaiti toman tinimim iza.

12 Aput aghemim pa Natu, ve aneep ila samba. d 
Pa vene, Maaron ate yabyab payam, ve imundig ireu gham asob alalemim. Pasa, ye ate tuku.
Eemoghon yes to tiyooŋ ila toni, poia toni pale iza todi, ve tineep toman tinidi iza. e 
Copyright information for `TUCO