aMbo 33:17

Psalms 20

Yes Israela tighason Maaron pa ipalot kinik todi

Mbouŋ to David

Sawa to ighaze yom uneep ila pataŋani lolo, Yoova pale ilooŋ suŋuuŋ tiom ve iuul ghom.
Maaron to Yakop, ye iza tiina pa tapiri ve poia toni. Ye pale inim sigeu payom ve iŋgin ghom uneep pooi.

Maaron ineep ila rumai toni patabuaŋ izi lolooz Zion.
Ye pale iuul ghom ve ipalot ghom.

Pale mata iŋgal watooŋrau tiom tisob. Irau lolo imaagh padi maau.
Watooŋrau tiom to yab ighan suvun di, nene tighami lolo poia.

Ve mbeb to yom lolom pani, ye pale igham payom.
Ve sa ŋgar to matam iŋgali ughaze ughami, ye pale igham anoŋa ivot.

Muri, sawa to yom ulib pa koiamŋa, yei pale lolomai poia kat ve nilool.
Pale nigham pilak tiei, ve nikakayab di tilala tinimnim, ve nipait Maaron toit iza toman tinimai iza.
Mbeb tisob to yom ughason Yoova pani, ye pale ilooŋ ghom ve igham payom.
Ghara nawatag: Yoova pale iuul kinik to ye tau ighuri pa uraat.
Ye pale ineep izi ndug toni patabuaŋ sambam, ve ilooŋ suŋuuŋ toni, ve ipaloti pa tau tapiri. Leso ilib pa koia tisob.
Ndiran pida tinumeer karis todi to malmal,
ve pida tipakur di pa hos todi.
Eemoghon yei ninumeer Maaron tiei Yoova. Ye iza tiina pa tapiri ve poia toni. a 

Tovenen koiamai pale titaptap tizi.
Eemoghon yei pale nimundig ve niyoon ariaŋa pa malmal.
O Yoova, ughur taliŋam pa taŋiiz tiei tonene, ve uul kinik tiei. Leso ilib pa koia.
Copyright information for `TUCO