aMbo 2:1; Mk 14:1

Psalms 21

Yes Israela tipait Maaron pa ulaaŋ to ye igham pa kinik todi

Mbouŋ to David

O Yoova, kinik tiei lolo poia kat. Pasa, yom upaloti pa taum tapirim.
Yom uuli pa malmal le ilib pa koia. Tauto tini iza kat.

Mbeb to ye lolo pani ve ighason ghom pani, yom uŋguruuta maau. Yom ugham pani wa.

Yom ula uvot toni, ve upakuri pa mbeb popoia naol.
Ve ughur moghar ndamooda milmilia izala daba.
Moghar tonowen, tigharaata pa gol to poia kat.

Ye ighason ghom pa uŋgin poiani ila sawa to malmal,
leso imaat sob, ve ineep pooi itaghoni taghoni gha ila.
Ve yom ulooŋ suŋuuŋ toni.

Yom uuli le ilib pa malmal, tauto iza ivot inim tiina.
Ve upambooda pa tapirim ve poia tiom. Tauto varu ilaan irau ndug ndug, ve tamtoghon tipaiti tighaze ye iza tiina kat.

Onoon kat, poia tiom pale izaza toni itaghoni taghoni gha ila.
Ve yom uneep tomani. Tauto lolo poia le poia kat.

Kinik tiei inumeer Yoova. Tovenen mbeb eta irau ighami itap ne maau.
Pasa, Maaron Tiina To Ilib Pa Ndimaronŋa Tisob Ne, lolo ineep tuŋia ila toni, ve iuluuli itaghon saveeŋ mbuaaŋ toni.
O kinik, nimam pale ikis koiamŋa tisob.
Yes to tighur koi payom, nimam waan pale isavag di.

Sawa to upatooŋ tapirim ivot ighazooŋ, yom pale uwaghamun di kat inimale yab tiina ighan mbeb.
Onoon kat, mbalmbali to Yoova pale iza todi, ve yab toni ighan suvun di.

10 Ndinatudi paam, yom pale upasob di pa taan.
Tovenen muri, paghu todi eta irau ineep muul maau.

11 Onoon, yes tikaal ataam payom, ve timbua saveeŋ tighaze tiwaghamun ghom.
Eemoghon ŋgar todi samia tonowen irau ighur anoŋa maau. a 

12 Sawa to tighita ghom undaad pane natu iŋarua di, yes pale timatughez ve tighau tila.
13 Yoova, umundig ve upatooŋ tapirim ivot ighazooŋ. Leso nimbou ve nipait izam pa tapirim.
Copyright information for `TUCO