aMbo 10:1; Mk 15:34
bIs 53:3
cMt 27:39; Mk 15:29
dMt 27:43
eMbo 71:6; Ga 1:15
fLu 23:33; Yo 19:18
gMt 27:35; Yo 19:24
hHib 2:12
iMbo 2:8; Syg 5:9-13, 7:9

Psalms 22

Suŋuuŋ to tamtoghon to ineep ila pataŋani tiina lolo ve igham ŋgar ighaze Maaron ipul muri pani

Mbouŋ to David

Maaron tiou, Maaron tiou, pughu vena to upul murim payou?
Pataŋani tiou igham ghou nataŋ tiina. Pughu vena to uul ghou maau, ve uneep saguan payou? a 

Maaron tiou, ndag to naol ne, nataŋ roran ghom.
Eemoghon yom usavia leg saveeŋ eta maau.
Ve mboŋ tovene paam. Ateg izi maau. Nanoknok taŋiiz.
Eemoghon Maaron, you nawatag: Yom patabuaŋ.
Yom uneep ila inam to ghamuuŋ pooz, ve yes Israela tipapait ghom.

Muuŋ ve inim, nditimbumai tinumeer ghom.
Yes tighur ilat tiom, ve yom upas di tivot pa pataŋani todi.
Sawa to titaŋ roran ghom, yom ugham mulin di pa pataŋani todi.
Yes tinumeer ghom, ve yom uul di. Tovenen tighur matadi payom sorok maau.
Eemoghon you, tamtoghon tighita ghou nanimale you tamtoghon maau.
Matadi izi payou, ve tiveleg ghou tighaze you mbeb sorok nanimale motmoot to taan lolo. b 

Tamtoghon tisob to tighita ghou, dabadi katia payou, ve tighaze: ‘Aa, ughita wa?”
Ve tiŋiŋ payou, ve tipiyaav saveeŋ velegiiŋ naol payou. c 

Tisavsaav payou tighaze: “Yom ughaze unumeer Yoova?
Poia. Ighaze venen, ghoro taneep ve taghita. Ighaze ye lolo payom kat, ye pale iuul ghom, ve igham mulin ghom pa pataŋani tiom.” d 
Eemoghon Yoova, yom to ughur ghou navot pooi ila tinaŋ apo.
Ve sawa to naghunghun tuz, yom ugham payamyam payou pooi. e 

10 Sawa to tinaŋ ipoop ghou, tighur ghou nalat nanim lem, leso uŋgin ghou.
Tauto sawa tonowen ve inim, you nanumeer ghom naghaze yom Maaron tiou.
11 Tovenen uneep saguan payou malep.
Pasa aazne, pataŋani tiina ighaze ivot payou.
Ve leg tamtoghon eta to iuul ghou maau.
12 Ughita. Koiagŋa katindi tinim tiluvut ghou.
Tapiridi tintina tinimale makau nditamoot to Basan to bide tapiridi.

13 Yes tinimale laion to tikakaak avodi ve livodi imasis iŋarua ghou.
Ve lolodi ŋuria tighaze tisaas ghou ve tighan ghou.

14 Tovenen tapirig isob kat, nanimale ya to ineep ila uur lolo ve tiliŋi ilale.
Tuag tisob goloŋia. Tovenen nayamaan taug naghaze irau nagham mbeb eta maau.
Ve matughezaaŋ tiina igham ghou, ve lolog imbumbu naghaze paam namaat.

15 Ŋgarsuag imamaas ve irau natoon ŋazubag maau.
Yom upul ghou nagheen izala ghavuur, ve paam namaat.

16 Koiagŋa katindi tinim tiluvut ghou tinimale ŋgavuun ketooŋ, ve timorau agheg ve nimag. f 

17 Ve tuag tisob timareer.
Tovenen koiagŋa tiyoon ve timbatut ghou, ve lolodi poia kat. Pasa, nasami wa.

18 Yes tighaze pa namaat wa. Tauto tighaze tirei nonogiiŋa tiou toman mbeb tiou pida irau di.
Tovenen tiŋgozŋgooz, leso tighita sei to pale igham sa mbeb. g 
19 Yoova, uneep saguan payou malep.
Ulaaŋa tiou, unum rikia ve uul ghou!

20 Upoon ghou pa buza to mateeŋ.
Upaghau ghou pa ŋgavuun samsamia tonene. Pa vene, tiwaghamun ghou.

21 Ugham mulin ghou ila laion tonene avo,
ve upaghau ghou pa makau sagsagŋa tonene ndoŋadi.
Aa, ghara naghita naghaze yom ulooŋ ghou!

22 Tovenen you pale navotia mbeb to ugham payou ne pa nditag.
Sawa to tamtoghon tiom tilup di pa suŋuuŋ, you pale nala toman di, ve napait izam. h 
23 Yam to amatughez pa Yoova ve ataghon ŋgar toni, apaiti.
Yam siŋ to Yakop, apait Yoova iza pa tapiri ve poia toni.
Yam Israela asob, aroron ve amatughez pani.

24 Pasa, yes to timbadbaad pataŋani ve tighur matadi pa Yoova, ye irau ighita pataŋani todi inimale mbeb sorok ne maau. Pale iuul di.
Irau iveleg di, ma ipul muri padi ne maau.
Tovenen sawa to titaŋ rorani pa ledi ulaaŋ, ye pale ilooŋ taŋiiz todi ve iuul di.
25 Yoova, ighaze tamtoghon tiom tilup di pa suŋuuŋ tiina, you pale nalool ve napait izam ila matadi, ve napakur ghom pa ŋgar to ugham payou.
You pale nataghon saveeŋ mbuaaŋ tiou, ve nagham watooŋrau payom ila yes to timatughez payom ve titaghon ŋgar tiom ne matadi.

26 Watooŋrau to nagham pa napait Yoova, yes mbolaaŋa pale tighan pida le apodi isuŋ.
Ve yes to tizuaria di pa Yoova, pale tipaiti.
Ye tau pale igham poian di, ve tineep pooi itaghoni taghoni gha ila.
27 Tamtoghon irau taan dige to naol ne, pale matadi iŋgal Yoova, ve titoor ŋgar todi imuul ila pani.
Ndug naol pale tisob tiput aghedi pani ve tipaiti. i 

28 Pasa, Yoova, ye kinik tiina.
Ye iŋgin tamtoghon tisob to taan, ve ighamgham pooz padi.

29 Tovenen mbaliiŋ taudi to taan pale tisob tiput aghedi pani ve tipaiti.
Ve ila ila le yes to tigharau tighaze timaat ve tinim ghavuur ne paam, pale tiput aghedi pani ve tipaiti.

30 Papaghu toit pale timbees pa Yoova.
Yes to tivot muri, pale tilooŋ Yoova varu.

31 Yes to tipoop di muri, tamtoghon pale tisavia ŋgar deŋia to Yoova padi,
ve tipaes padi pa ataam to ye igham mulin tamtoghon toni.
Copyright information for `TUCO