aMbo 103:20
bMbo 96:7+
dYo 12:28+; Syg 4:5

Psalms 29

Maaron aliŋa inimale lalaav avolutu

Mbouŋ to David

Yam aŋela ariaŋamim to sambam, apakur Yoova.
Apait iza pa tapiri ve poia toni. a 

Apait Yoova! Pasa, ye iza tiina kat.
Ye ipambood tau pa ŋgar toni patabuaŋ.
Tovenen aput aghemim pani ve apaiti. b 
Yoova aliŋa
(29:3) Yes Kanaana tisuŋsuŋ pa maaron kaarom eez, iza Baal. Yes tighaze Baal iŋgin ndug. Ye igham uman izizi, ve igham ndug milia. Ve ye to igham aniiŋ to uum titub pooi. Yes Israela titoor mbouŋ tonene pa titatan ŋgar kaarom tonowen. Ve tighaze Baal igham uraat tonowen maau. Yoova to ighami. Tauto ighaze lalaav avolutu, ghoro tighaze nene Maaron aliŋa.

ila irau te dige to naol ne.

Maaron to iza tiina ne aliŋa, nene inimale lalaav avolutu.
Yoova isaav toman aliŋa tiina izala te pogho. d 

Yoova aliŋa tapiri tiina.
Aliŋa ipatooŋa ighaze ye iza tiina kat.

Yoova aliŋa iŋgalŋgal balagin ai mendepur tintina to Lebanon.
Aliŋa iŋgalŋgal mbirisan di.

Yoova aliŋa itok lolooz tintina to Lebanon, le tiyatovtov di tinimale makau ndinatu papaghu to tinidi iza.
Ve itok lolooz Ermon, le iyatovtova inimale bapolo sagsagŋa ndinatudi to tinidi iza.

Yoova aliŋa igham ndug milia, ve yab ighan.

Ve itok taan to ndug balim le irur.
Igham ndug balim to Kades katkatia ilala inimnim.

Yoova aliŋa igham mekmek sagsagŋa to apodi ne, ruŋadi iza le tipoop pataghaaŋ.
Ve igham ai raua tisob kurukia tizi.
Tovenen tamtoghon tisob to tilup di pa suŋuuŋ ila rumai toni lolo, tisaav toman aliŋadi tiina tighaze: “Tapait Yoova iza. Pasa, ye tapiri tiina kat!”
10 Muuŋ, yawaaŋa ivot toman tapiri ve itatab taan. Sawa tonenen, Yoova ineep ila ina to ghamuuŋ pooz ve iŋgini.
Aazne paam, ye kinik to ineep ila ina to ghamuuŋ pooz.
Pooz toni pale inepneep tovene itaghoni taghoni gha ila.

11 Yoova ighamgham tapiri pa tamtoghon toni.
Pale ighur poia toni izaza todi, ve iŋgin di tineep pooi toman lolodi luuma.
Copyright information for `TUCO