bMbo 103:8+; Yo 16:20+; 2Kor 4:17

Psalms 30

Ŋgeu eez ipait Maaron pasa, Maaron ighami tini poia

Mbouŋ to David

Mbouŋ tonene iŋarua sawa to tigharaat Rumai Tiina ve tighuri inim Maaron le

O Yoova, you napait izam. Pasa, sawa to naneep ila pataŋani tiina lolo, yom ugham mulin ghou, ve undae ghou naza muul.
Inimale yom upul ghou namaat, tone koiagŋa lolodi poia, ve tipakur di tighaze tilib payou.

O Yoova, Maaron tiou, you nataŋ roran ghom pa ulaaŋ.
Ve yom upasob moroghooŋ tiou, ve tinig poia wa.

Rismoghon tone namaat ve nazila ndug to mateeŋa.
Eemoghon yom uul ghou, tauto namundig muul, ve aazne naneep pooi. a 
Yam tamtoghon to Yoova to lolomim ineep tuŋia ila toni ve ataghon ataam toni, apaiti ila mbouŋ tiam.
Yoova, ye patabuaŋ. Tapiri ve ŋgar toni, nene ite kat.
Tovenen lolomim poia pani, ve apait iza pa poia toni.

Mbalmbali toni ineep mala maau. Ineep ris, ve isob.
Eemoghon poia toni, nene izaza toit irau sawa to taneep izi taan.
Ighaze tataŋ pa mboŋ,
mboŋmaagh, ye pale igham ghiit lolood poia muul. b 
Sawa to nepooŋ tiou poia moghon, you nasaav naghaze:
“Pataŋani eta irau ivot payou ve itok ghou ne maau.”

Pasa, yom ughamgham poian ghou ve upapalot ghou.
Tauto napait taug naghaze you pale naneep tuŋia tovene irau sawa isob, nanimale lolooz tintina.
Eemoghon sawa to uŋgooz matam payou, matughezaaŋ tiina igham ghou le nasaŋeeŋ.
Sawa tonenen, napoi ghom ve nataŋ roran ghom naghaze lolom isamin ghou ve uul ghou. You nasaav payom naghaze:

“O Yoova, ighaze namaat ve nazila ndug to mateeŋa, nene pale mateeŋ tiou iuul sei?
Ughita. Mateeŋa to tizila taan lolo ve tinim ghavuur, todi eta irau ipait ghom? Ma todi eta irau ivotia ŋgar tiom to utataghon saveeŋ mbuaaŋ tiom? Maau.

10 Tovenen Yoova, ulooŋ suŋuuŋ tiou tonene.
Lolom isamin ghou ve uul ghou lak! Pasa, you mbesooŋa tiom.”
11 Aa ghara upasob taŋiiz tiou! Tovenen you pale tinig iza ve nator.
Yom upasob pataŋani tiou, ve ududuum uli to moŋiiŋ izi pa tinig.
Yom ugham ghou lolog poia kat, ve naneep ila poia tiom lolo.

12 Tovenen irau neneeŋag maau.
You pale nambou ve napait izam toman lolog.
Yoova, yom Maaron tiou. You pale napait ghom pa poia tiom to aazne, ve itaghoni taghoni gha ila.
Copyright information for `TUCO