aRo 3:18
bMbo 57:10, 89:1+, 108:4
cMbo 145:16
dRut 2:12; Mbo 17:8, 57:1
eMbo 65:4; Yo 4:10+
fYo 1:4, 4:10+, 7:37+; 1Pe 2:9

Psalms 36

Ŋgar samia to tamtoghon, ve ŋgar poia to Maaron

Mbouŋ to David, mbesooŋa to Yoova

Ŋgar to zoraaŋ Maaron aliŋa to ineep ila ndiran samsamia lolodi, nene isavsaav padi, ve ighamgham pooz padi.
Tauto matadi iŋgal Maaron maau, ve timatughez pani maau. a 

Sosor todi tonowen, ighamun ŋgar todi.
Tauto tipapakur taudi, ve matadi iŋgal sorok tighaze Maaron ighita sosor todi maau, ve irau ighur atia padi maau.

Saveeŋ kaarom ve saveeŋ samsamia moghon to ivotvot ila avodi.
Ŋgar to iuul ghiit pa taneep pooi, nene tipuli wa. Tauto tigham ŋgar poia eta maau.

Ŋgar todi iyaryaaŋ kat. Tighaze le tigham ŋgar samia moghon.
Mboŋ to naol ne, tighengheen ila moogh todi, ve matadi iŋgalŋgal pa sa ŋgar samia to pale tighami.
Ataam samia tonowen, lolodi pa tipuli maau.
Yoova, lolom ineep tuŋia ila to tamtoghon tiom ve uluul di. Ŋgar tiom tonanan, nene tiina le tiina kat. Izala le ikis sambam.
Ve ŋgar to taghoniiŋ saveeŋ mbuaaŋ tiom paam. Izala le ikis tata. b 

Ŋgar tiom deŋia, nene inimale lolooz tintina.
Ve ŋgar tiom to uŋgabiiz tamtoghon itaghon ŋgar deŋia ve ughur atia padi, nene paam, tiina kat inimale mazovan bibiliiŋa to izila le izila kat.
Yoova, yom uŋgin tamtoghon ve mbeb naol naol to su ve paanu, ve uluul di, tauto tineep pooi. c 

Maaron, gabuam to lolom ineep tuŋia ila to tamtoghon tiom ve uluul di, nene mbeb tau.
Tamtoghon tisob tiyooŋ ila nimam samba, inimale tatareek ndinatu tiyooŋ ila tinandi bage samba. d 

Rumai tiom, nene ivon pa mbeb popoia naol. Tovenen tamtoghon tighan le isooŋ di.
Poia tiom izaza todi inimale ya tiina to irereer. Yom upaghun di pani, ve tiyamaana poia kat. e 

Yom to unum pughu pa mbeb tisob to tineep matadi iyaryaar.
Ve ghazooŋa tiom isul ghei, tauto matamai ighazooŋ. f 
10 Yoova, lolom ineep tuŋia ila to yes to tiwatag ghom.
Yes to ŋgar deŋia ineep tuŋia ila lolodi, upatooŋ poia tiom padi, ve uul di itaghon ŋgar tiom deŋia.

11 Tovenen yes to tipapait taudi izadi ve tiveleg tamtoghon tiom, upul di titatan ghou malep.
Ve upul ndiran samsamia tinaan ghou malep.
12 Aghita. Yes to tinoknok ghamuuŋ ŋgar samia, tauto Maaron irab di titaptap tizizi, le patudi tiwaghengheen izala taan pogho.
Irau timundig muul maau.
Copyright information for `TUCO