aMbo 73:2+
bYems 1:10+
cMbo 145:19; Mt 6:33
d1Pe 5:7
eEp 4:31; Kol 3:8
fMbo 73:18+; Mt 5:5
g1Pe 1:4
hMbo 112:5; Mt 5:42; 2Kor 8:7
iHib 13:5
jMbo 34:14; 3Yo 11
kMbo 18:25

Psalms 37

Poia to Maaron izaza to tamtoghon deŋiadi

Mbouŋ to David

Ndiran samsamia to aazne tipapakur taudi, ugham ŋgar naol padi malep.
Ve yes to tighamgham sosor, lolom igham pa mbeb todi malep. a 

Pale tineep ris, ve tisami tinimale kikiliiŋ to ndag ighaaza ve imalai.
Pale tinimale mbeb raua to timalai ve titaptap tizi. b 
Unumeer Yoova, ve ugham ŋgar poia moghon.
Leso mbeb eta iwaghamun ghom sob, ve uneep pooi izi taan to ye igham pa tamtoghon toni.

Tinim iza pa Yoova tau.
Leso igham mbeb ivot payom itaghon yom lolom. c 

Sa ŋgar to yom ughaze ughami, unumeer Yoova, ve ughur taum ila nima.
Ye pale iuul ghom, ve ipatooŋ ghom pa ataam to utaghoni. d 

Pale igham ŋgar tiom deŋia ineep ghazooŋa kat ila tamtoghon matadi, inimale ndag ŋguruba.
Tovenen tamtoghon pale tighilaal ghom tighaze lem sosor eta maau, ve ŋgar tiom poia moghon.
Ighaze uraat to ndiran samsamia ilaan poia, ve tiyou ledi mbeb naol ila ataam samia, ugham ŋgar naol padi malep.
Atem izi, ve usaŋan Yoova. Ye tau pale ighur atia padi.

Tovenen atem yabyab ve ugham ŋgar naol malep.
Uyai ghom ve utatan atem.
Pa vene, atem yabyab, ve ugham sosor. e 

Pasa, Yoova pale ipasob ndiran samsamia ve tilaledi.
Eemoghon tamtoghon to tinumeer Yoova ve tighur matadi pani, yes pale tineep pooi ila taan to ye igham pa tamtoghon toni.

10 Mala maau pale ndiran samsamia tisob tilaledi.
Ighaze ukaal naghodi, nene pale irau ughita di muul maau.

11 Eemoghon yes to titatan taudi ve tinumeer Yoova, yes pale tineep pooi ila taan to ye igham pa tamtoghon toni.
Pale igham di tineep poia kat toman tinidi iza. f 
12 Ndiran samsamia tilup di, ve tikaal ataam pa tiwaghamun tamtoghon deŋiadi.
Atedi yabyab kat, ve tiŋaaŋ mareer ila padi.

13 Eemoghon Yoova iŋiŋ padi.
Pasa, ye iwatag: Mala maau pale sawa todi ivot ve tilaledi.
14 Ndiran samsamia tipas buza todi tighaze timbut yes mbolaaŋa to tirau mbeb eta maau.
Ve tindaad pane todi pa tivaneg di.
Tighaze tirab yes to titaghon ataam deŋia.

15 Eemoghon Yoova pale ipamuul buza todi imuul pa taudi.
Ve pane todi pale ipolpol.
16 Ighaze tamtoghon deŋia eta le mbeb rismoghon, nene iraua.
Nepooŋ toni pale poia le ilib pa ndiran samsamia naol to ledi mbeb katindi.

17 Pasa, Yoova pale ipasob ndiran samsamia tapiridi.
Eemoghon ye ipapalot tamtoghon deŋiadi, ve iŋgin di tineep pooi.
18 Yes to ledi sosor eta ila Maaron mata maau, Yoova iwatag nepooŋadi, ve mata padi.
Ve mbeb popoia to ye igham di tinim ledi, nene pale tineep todi itaghoni taghoni gha ila. g 

19 Sawa to ighaze pataŋani ivot, yes pale tineep pooi.
Ighaze pitool ivot, nene pale tiraua kat pa aniiŋ.
20 Eemoghon ndiran samsamia pale tisob tilaledi.
Yoova koia pale timatmaat tinimale kananaŋ ruŋgu to timalai ve kurukia tizi.
Pale tisob tinimale yab mbuasa to iza ve imbiriis.
21 Ndiran samsamia tighamgham bun, ve tiyatyat di maau.
Eemoghon tamtoghon deŋiadi, yes tireirei mbeb todi pa yes mbolaaŋa. h 

22 Yes to poia to Yoova izaza todi, pale tineep pooi ila taan to ye igham pa tamtoghon toni.
Eemoghon yes to mbalmbali toni inepneep todi, ye pale ipasob di ve tilaledi.
23 Yes to titaghon ataam to Yoova, tighami lolo poia kat.
Ve ye pale ipatooŋ di pa ataam, ve ipalot di pa laghooŋ todi.

24 Tamtoghon tovene, ighaze aghe ilot pa mbeb eta, nene irau itap maau.
Pasa, Yoova ikiskis nima ve ipapaloti.
25 Sawa to pain ghou, ve inim aazne nanim olman waat, you naghita Yoova ipul muri pa tamtoghon deŋiadi pa eta sone.
Ve naghita todi eta natu pitoola ve isuŋsuŋ tamtoghon pa a aniiŋ sone. i 

26 Tamtoghon deŋiadi matadi reiŋ mbeb, ve tiyokyok pa tamtoghon tigham bun ila todi.
Ve ndinatudi paam, tinim ataam pa poia to Yoova iza to tamtoghon.
27 Upul murim pa ŋgar samia, ve ugham ŋgar poia moghon.
Leso uneep pooi ila taan to Yoova igham payom itaghoni taghoni gha ila. j 

28 Pasa, Yoova lolo pa ŋgar deŋia.
Tovenen tamtoghon toni to lolodi ineep tuŋia ila toni ve titaghon ataam toni, ye irau ipul muri padi maau.
Pale iŋgin poian di itaghoni taghoni gha ila. k 
Eemoghon ndiran samsamia ndinatudi, ye pale ipasob di ve tilaledi.

29 Ndiran deŋiadi pale tigham taan to Yoova igham pa tamtoghon toni,
ve tineep pooi tonowe irau sawa isob.
30 Saveeŋ to ivotvot ila tamtoghon deŋiadi avodi, nene ŋgar poia ineep ila.
Yes tisasavia ŋgar deŋia moghon.

31 Tutuuŋ to Maaron todi, ineep ariaŋa ila lolodi ve ŋgar todi.
Tauto irau titap maau.
32 Ndiran samsamia tighamgham lilin tamtoghon deŋiadi.
Tizuaria di tighaze le tirab di timaat.

33 Eemoghon Yoova ivolvool to tamtoghon toni. Irau ipul di tineep ila koiadi nimadi ne maau.
Ve ighaze tamtoghon tipayoon di pa savsaveeŋ, nene pale Yoova tau iyoon ila muridi, ve ipaghazoŋan di ighaze ledi sosor maau.
34 Tovenen atem izi, ughur matam pa Yoova, ve utaghon katin ataam toni.
Leso ipait ghom, ve izam pa taan to ye igham pa tamtoghon toni.
Ve yom pale ughita Yoova iwaghamun ndiran samsamia ve tilaledi.
35 Muuŋ, you nawatag ŋgeu samia eez.
Sawa naol, ye ipamatughezan tamtoghon, ve itatan di le tineep sami.
Ŋgeu tonowen tapiri tiina kat. Ye inimale ai mendepur tiina to Lebanon.
Eemoghon muri, nalaagh izi ndug toni, ve naghita ŋgeu tonowen ineep muul maau.
Nakaal nagho le maau. Ila vena?
37 Matam ila pa yes to ledi sosor maau, ve ugham ŋgar pa yes to ŋgar todi popoia moghon, ve ughita sa ŋgar to ivotvot padi.
Ŋgeu oro maate to ilup tamtoghon tinim ee moghon ve iuluul di pa tineep pooi, yesŋa papaghu toni pale tineep pooi itaghoni taghoni gha ila.

38 Eemoghon yes to zoraaŋ Maaron aliŋa, Yoova pale irab di tisob timatmaat.
Ve papaghu todi paam, ye pale ipasob di le tisob.
39 Yoova, ye Volaaŋa to tamtoghon deŋiadi.
Ighaze pataŋani ivot padi, ye pale inim inadi to yoŋgaaŋ.

40 Ye iuluul di, ve ipaspas di tivot pa pataŋani todi.
Ye ighamgham mulin di ila ndiran samsamia nimadi, ve tineep pooi.
Pasa, yes tiŋarua tila, leso tiyooŋ ila toni.
Copyright information for `TUCO