aMbo 112:5,9; Mt 5:7; Yems 2:13+
bMbo 55:12+; Lu 22:21; Yo 13:18

Psalms 41

Suŋuuŋ to tamtoghon to imorooŋ

Mbouŋ to David

Ighaze tamtoghon eta mata iŋgalŋgal yes mbolaaŋa ve iuluul di, nene pale poia to Yoova izaza toni ve tini iza.
Ve ighaze pataŋani eta ivot pani, nene pale Yoova iuuli. a 

Yoova tau pale inim sigeu pani ve iŋgini. Leso imaat sob, ve ineep pooi.
Pale ineep izi taan to Yoova igham pa tamtoghon toni, ve poia to Yoova izaza toni.
Yoova irau ipuli ila koia nimadi ne maau.

Ve ighaze ye imorooŋ ve ighengheen, nene pale Yoova tau iŋgini, ve ipasob moroghooŋ toni.
You nasaav naghaze: “Yoova, you nagham sosor payom wa.
Lolom isamin ghou ve upasob moroghooŋ tiou. Pasa, you mbesooŋa tiom.”
Koiagŋa tisasavia saveeŋ samsamia iŋarua ghou tighaze: “Ŋgeu tonowen, ŋeez o imaat? Leso iza isob, ve lolood imaagh pani?”

Ve sawa to tamtoghon tinim tiŋgig ghou, tisavia saveeŋ toman lolodi maau.
Yes tinim pa tiŋgig ghou pa moroghooŋ tiou moghon.
Ve sawa to timuul tila, tisasavia varug sorok irau ndug tighaze: “Paam imaat.”

Yes to tighur koi payou ne, tisob tighaze le nasami kat.
Tovenen tikakamuun payou tighaze:

“Aa, ŋgeu tonowen, moroghooŋ samia kat ighami.
Irau mata pakia ve imundig muul ne maau. Paam imaat.”

Ve itag ite to nanumeera kat naghaze yeru lupuuŋ tiei ee moghon, ve niluplup ghei pa ghanghaniiŋ,
ye paam ipul muri payou, ve inim koiag. b 
10 Yoova, lolom isamin ghou ve uul ghou. Pasa, you mbesooŋa tiom.
Upasob moroghooŋ tiou, ve ugham tinig poia muul.
Leso nayat ŋgar samia to koiagŋa tigham payou.
11 Yoova, aazne you nawatag naghaze yom lolom poia payou. Pasa, koiagŋa titatan ghou maau. Tovenen irau aliŋadi iza sorok tighaze yes tilib payou ne maau.

12 You nataghon ŋgar deŋia moghon. Tauto upalot ghou ve nayoon ariaŋa.
Ve yom pale ugham ghou naneep toman ghom itaghoni taghoni gha ila.
13 Tapait Yoova pa poia toni! Ye Maaron to iit Israela.
Tapait iza to aazne, ve itaghoni taghoni gha ila.
Onoon le onoon kat.
Copyright information for `TUCO