aMbo 25:5, 27:1; Yo 8:12; 2Kor 4:6

Psalms 43

Ŋgeu to iŋazuuv Maaron iseeŋ suŋuuŋ toni

Maaron, yes to matadi iŋgal ghom maau, tighamgham pataŋani payou.
Uyoon payou, ve upaghazoŋan ghou ila matadi ughaze you nagham sosor eta maau.
Upas ghou ila ndiran kaaromŋa ve ndiran samsamia tonene nimadi.

Pasa, yom Maaron tiou, ve you nayooŋ ilat tiom.
Pughu vena to upul murim payou? Vena to upul koiagŋa titatan ghou ve tigham ghou lolog isami?
Naghaze ugham ghazooŋa tiom isul ghou ve upaghazoŋan ghou pa saveeŋ tiom onoon.
Pasa, mbeb ru tonowen pale tipatooŋ ataam payou, ve tigham pooz payou, leso nazala pa inam to nepooŋ to ineep izi lolooz tiom patabuaŋ daba. a 

Ghoro naŋarua artaal tiom, ve nayoon ila naghom ve napait ghom.
Pasa, yom Maaron tiou, ve yom to ugham ghou lolog poia kat.
Tovenen you pale narab gita, ve nambou pa napait izam.
Pasa, yom Maaron tiou.
Tauto naghason taug muul naghaze pughu vena to aazne lolog isami?
Lolog ipataŋan ve nagham ŋgar naol pasa?
You irau naghur ila to Maaron ariaŋa ve naghur matag pani.
Pasa, ye Maaron tiou ve Volaaŋa tiou. Tovenen you pale napaiti muul.
Copyright information for `TUCO