aIgham 19:16,18
bIgham 24:7
cMbo 19:1+; Ro 1:20
dMbo 40:6
eMbo 104:24
fMt 6:26
gIgham 19:5; Mbo 24:1; 1Kor 10:26
hMbo 66:13+; Hib 13:15
iMt 7:7; Yems 5:13
jRo 1:32
kMbo 91:16; Lu 2:30

Psalms 50

Ŋgar to tapait Maaron pa poia toni ve tataghon tutuuŋ toni, nene watooŋrau kat

Mbouŋ to Asap

Yoova, ye Maaron ariaŋa.
Aliŋa ilat pa yam tamtoghon to taan.
Ye ipoi gham ighaze yam asob anim alup gham ila nagho.
Yam to aneep ila pa ndag iza, ve yam to aneep ila pa ndag izila ne paam.
Ndug Zion paghuna le paghuna kat.
Maaron ineep tonowe, ve ŋguruba isul ivot.

Maaron toit ighaze inim tonene. Irau neneeŋa muul maau.
Yab ighan imuuŋ pani, ve yaghur tiina toman uman iluvuti. a 

Ye ipoi sambam ve taan tinim, leso tighita iŋgabiiz tamtoghon toni ve ighur atia padi.

Ve isaav ighaze: “Tamtoghon tiou to lolodi ineep tiou ve titaghon ŋgar tiou, ayou di tisob tinim tilup di ila naghog. Nene yes to tigham watooŋrau payom, ve timbua saveeŋ toman ghou tighaze yeiŋa nilup ghei ninim ee moghon.” b 
Maaron iŋgagabiiz tamtoghon ve ighurghur atia padi.
Ve mbeb to sambam paroŋania tipatooŋa tighaze gabizooŋ toni, nene deŋia moghon.
c 
“Yam tamtoghon tiou Israel, alooŋ saveeŋ to naghaze nasavia payam.
Pasa, you to Maaron tiam.
Aazne, you pale nasaav ila matamim, ve navotia sosor tiam.

Watooŋrau to aghamgham di payou ne, you nayaan gham padi maau.
Moghon moghon naghita gham aghurghur watooŋrau tizala artaal, leso yab ighan suvun di. Nene poia. d 

Eemoghon you irau nagham makau, ma mekmek to tineep ila sirsiir tiam lolo ne maau.

10 Pasa, you nambool pa mbeb eta maau.
Mbeb tisob to tilaghlaagh ila su lolo,
ve makau to tineep irau lolooz to naol ne, nene tiou moghon. e 

11 Ve man to tirovroov ila tata paroŋania, you nawatag di tisob ve naŋgin di.
Ve mbeb tisob to tilaghlaagh ila reg lolo ne paam, nene tiou. f 
12 Ighaze pitool ghou, irau nasaav payam maau.
Pasa, taan toman mbeb tisob to tineep ila, nene tiou moghon. g 

13 Vena, yam aghaze you naghanghan makau minda,
ma naghunghun mekmek siŋi? Maau.

14 Watooŋrau to lolog pani, nene vene: Lolomim poia payou, ve apait ghou pa poia tiou.
Ve saveeŋ to ambua toman Maaron tiam to ineep sala le sala kat ne, agham uraata le anoŋa ivot. h 

15 Ve ighaze pataŋani igham gham, ghoro ataŋ roran ghou pa ulaaŋ.
Leso nagham mulin gham, ve apait izag pa tapirig ve poia tiou.” i 
16 Eemoghon ndiran samsamia, Maaron isaav padi ighaze:
“Tutuuŋ tiou to naghur di pataghaaŋ, yam awatwaat di sorok pasa?
Ve pughu vena to asasavia saveeŋ to nambua toman tamtoghon tiou?”

17 Pasa, sawa to you napasaluŋgan gham, yam ayasiil pa aliŋag.
Ve azorzoor saveeŋ tiou, ve avelegi inimale mbeb sorok.

18 Ighaze aghita yubyub eta, yam lolomim poia pani, ve aghami inim itamim.
Ve yes to tighurghur maat, yam ala toman di ve yamŋa alaghlaagh. j 

19 Saveeŋ samsamia ve kaarom naol, to ivotvot ila avomim.

20 Ve yam aŋgalŋgal saveeŋ pa siŋ tiam, ve awaghamun toŋvetaz tiam izadi.

21 Vena, yam aghamgham tovene ve aghita neneeŋag, tauto aghaze you nayok pa ŋgar tiam tonanan?
Yam aghaze itiŋa rarateed? Maau!
Tauto aazne, you nayaan gham, ve nasaav ila matamim, ve navotia sosor tiam ivot ighazooŋ.
22 Tovenen yam to lolomim imaghmaagh payou, apatum gham!
Pa vene, namundig, ve nawaghamun gham kat. Ve eta irau ipas gham ila nimag maau.

23 Tovenen lolomim poia payou, ve apait ghou pa poia tiou.
Pasa, watooŋrau tovene, tauto igham izag inim tiina.
Tamtoghon to mata iŋgal tau pa laghooŋ toni, nene pale napatooŋ ulaaŋ tiou pani, ve nagham mulini. k 
Copyright information for `TUCO