aMbo 41:9; Yo 13:18+
cMt 6:25+; Lu 12:22+; 1Pe 5:7

Psalms 55

Suŋuuŋ to tamtoghon to ita ite ighur koi pani

Mbouŋ to David

Ŋgeu to imuuŋ pa mbouŋ, irau isaav pa tamtoghon pa tirab gita ve timbou mbouŋ tonene

O Maaron, ughur taliŋam pa suŋuuŋ tiou.
You nataŋ roran ghom: Lolom isamin ghou ve uul ghou. Uŋgooz matam payou malep.

Ulooŋ suŋuuŋ tiou tonene, ve uul ghou.
Pasa, pataŋani naol tigham ghou le isooŋ katin ghou.
Tauto lolog imbumbu, ve tapirig isob.

Koiagŋa aliŋadi izaza, ve tigham saveeŋ matughezaaŋ payou.
Ndiran samsamia tonowen tigham pataŋani tiina payou tighaze titatan ghou.
Atedi yabyab payou, ve tighur koi payou kat.
Paam namaat tonene. Tovenen ateg imbumbu ve namatughez kat.

Matughezaaŋ tiina igham ghou le tinig irur, ve wadedeŋag izi.
Tovenen nakausim naghaze: “Oyai, leg bageg nanimale man mbaluuz, ghoro poia!
Leso naroov naghau nala ndug mala, ve ateg izi.

Pale nala nala le nala ndug balim to mala kat we, ve nakaal inag poia eta, leso naneep pani.

Onoon kat, leg bageg nanimale man, tone rikia moghon naghau nala, ve nakaal inag eta to yoŋgaaŋ.
Leso naneep tonowe, ve nasaŋan le pataŋani tonene isob. Pasa, nene inimale naneep ila uman ve yaghur tiina lolo.”
Tiina tiou, ughamun ndiran samsamia tonowen saveeŋ todi, leso ighur anoŋa sob. Ve upasob di ve tilaledi.
Pasa, you naghita ŋgar to ghamuuŋ malmal ve zoraaŋ saveeŋ ivon kat ila ndug tiina tonene lolo.

10 Mboŋ ve ndag, ŋgar tovene ivotvot ila ndug lolo.
Ndug tonene ivon kat pa ŋgar samsamia naol ve pataŋani.

11 Onoon kat, tamtoghon tiwaghamun nepooŋ to ndug le isami kat.
Tamtoghon to sualen, ighaze tilup di izi maran pa tigharaat saveeŋ, ma tiraukol, nene moghon moghon titatan nditadi ve titombaan di, leso tiyub mbeb todi. Ŋgar todi tonowen, tipuli rita maau.

12 Inimale koiag eta iveleg ghou, tone poia. Pataŋani tovene, you irau nambaada.
Ve inimale tamtoghon ite paam to ighur koi payou ne, mata izi payou, tone poia.
Pasa, tamtoghon tovene, you irau nayooŋ pani.

13 Eemoghon maau. Yom to muuŋ naghita ghom naghaze ituru ŋgar toit ee moghon.
Ve naghaze pa yom ŋgeu tiou, ve itag ite kat.

14 Ve tinig imot ilat tiom, ve naghita ituru lupuuŋ toit poia.
Ve muuŋ, itiŋa ival tiina taluplup ghiit pa suŋuuŋ ila Maaron rumai toni lolo.
Eemoghon aazne, yom uzi ve unum koiag. a 
15 Maaron, koiagŋa lolodi ve ruum todi tivon pa ŋgar samsamia naol.
Ukarmotin di pa mateeŋ, ghoro poia.
Naghaze tineep matadi iyaryaar, ve tizila ndug to mateeŋa.
(55:15) Muuŋ, sawa to yes Israela tilaghlaagh izi ndug balim, tamtoghon tol tizoor Mose tighaze ye irau iŋgin di maau. Izadi nene Kora, Datan, ve Abiram. Ŋgar todi tonowen igham Maaron ate yabyab. Tovenen igham taan ikaak, ve yesŋa tamtoghon todi tisob titap tizila. Ghoro taan avo ila ivool muul. (Ughita Namba 16:1-34.) Ŋgeu to itoor mbouŋ tonene, ighaze Maaron igham ŋgar tovene ivot pa koia, ghoro poia.

16 Tovenen you pale napoi Maaron pa iuul ghou.
You nawatag: Yoova pale igham mulin ghou pa pataŋani tiou.

17 Sawa isob, you nataŋ rorani pa mboŋmaagh, ndag maatu, ve rabrab, ve navotia pataŋani tiou pani.
Ve ye pale ilooŋ aliŋag, ve iuul ghou.

18 Onoon, koiagŋa katindi tilup di tighaze tigham malmal payou, ve titatan ghou.
Eemoghon Maaron pale ipas ghou ila nimadi, ve naneep pooi.

19 Pale ilooŋ suŋuuŋ tiou, ve itatan di. Pasa, muuŋ kat ve inim, ye inepneep ila ina to ghamuuŋ pooz.
Ve itortoor ŋgar toni maau.
Tovenen yes to timatughez pani maau, ve ŋgar todi iyaryaaŋ tighaze tizoor aliŋa, ye pale itatan di.
20 Itag ite to muuŋ yeru niluplup ghei, ighita saveeŋ mbuaaŋ toni inimale mbeb sorok.
Tauto ireu saveeŋ toni, ve igham malmal pa ndita to muuŋ yesŋa lupuuŋ todi ee moghon.

21 Saveeŋ toni, nene poia ve ŋgoreeŋa kat.
Eemoghon ila lolo, ye ighaze igham malmal.
Talooŋ saveeŋ toni, ve taghaze pa ye ighaze igham lolood poia.
Eemoghon maau. Saveeŋ to ivot ila avo, iŋgal tamtoghon inimale buza.
22 Sa mbeb ma pataŋani to ighaze ivot payom, ughuri ila Yoova nima.
Ye pale ipariaaŋ ghom, ve ikis ghom uneep pooi.
Pasa, mata iŋgalŋgal ndiran deŋiadi.
Irau ipul di titap pa tovaaŋ eta ne maau. c 
23 Eemoghon ndiran kaaromŋa ve yes to tirab tamtoghon timatmaat,
Maaron, yom pale uŋgor sawa todi inim tuku, ve upiyaav di tizila ndug to mateeŋa.
Ve you, ghoro nanumeer ghom naghaze pale uul ghou.
Copyright information for `TUCO