aLu 12:16+; 1Tim 6:6+,17
bMt 16:27; Ro 2:6; 1Kor 3:8; 2Kor 5:10; Syg 22:12

Psalms 62

Suŋuuŋ to tamtoghon to ighur ila to Maaron ariaŋa

Mbouŋ to David

Timbou mbouŋ tonene itaghon ŋgar to Yedutun, ye ŋgeu to imuuŋ pa uraat to mbouŋ

You lolog imbumbu maau. Ateg izi, ve nasaŋan Maaron pa iuul ghou.
Pasa, you nawatag: Ye moghon to irau igham mulin ghou pa pataŋani tiou.

Onoon kat, ye moghon, to Volaaŋa tiou ariaŋa.
Ye iponpoon ghou inimale raŋ to izala kat,
ve inim ruum ariaŋa pa nayooŋ ila lolo.
Tovenen mbeb eta irau iwaghamun ghou maau.
Yam to aghaze awaghamun ghou ne, ŋeez o apul ŋgar tiam samia tonanan?
Yam asob azuaria gham pa aghaze arab ghou pasa?
Aghita. Tapirig isob wa. You nanimale sirsiir muŋgina to pughu imbuuz ve ighaze imatit.

You leg izag. Tauto ireu lolomim, ve azuaria gham aghaze atatan ghou nazi.
Yam ndiran to kaarom kat! Agham kaarom, ghoro lolomim poia.
Yam asavsaav ila avomim uli aghaze Maaron ighur poia toni iza tiou.
Ve lolomim, aghaze Maaron iwaghamun ghou.
Eemoghon you lolog imbumbu maau. Ateg izi, ve nasaŋan Maaron pa iuul ghou.
You naghur matag pani moghon.

Onoon kat, ye moghon, to Volaaŋa tiou.
Ye iponpoon ghou pa koiagŋa inimale raŋ to izala kat,
ve inim ruum ariaŋa pa nayooŋ ila lolo.
Tovenen mbeb eta irau itok ghou ve natap ne maau.

You nanumeer Maaron naghaze pale igham mulin ghou pa pataŋani tiou, ve igham izag ivot inim tiina.
Irau namatughez maau. Pasa, ye to inim inag to yoŋgaaŋ,
ve iponpoon ghou inimale raŋ ariaŋa.
Yam tamtoghon to Maaron, anumeera irau sawa isob.
Avotia lolomim pani, ve asavia pataŋani tiam tisob tila toni.
Pasa, ye to inim inaad to yoŋgaaŋ.
Tamtoghon tisob tinim mbeb sorok.
Yes to ledi izadi maau, ve yes to izadi tintina ne paam. Tineep rismoghon ve tisob, tinimale yaghuraad to ivotvot ila avood ne.
Irau tanumeer di maau.
Ighaze taŋgabiiz poian di, pale tighita di tirau mbeb eta maau.
Pasa, yes toman uraat ve mbeb todi rikia moghon tilaledi, tinimale yaghuraad to ivotvot ila avood.

10 Tovenen ŋgar to ghamuuŋ malmal leso tayou leed mbeb to tamtoghon, anumeera malep.
Ve ŋgar to yubuuŋ paam, aghur matamim pani pa igham gham aneep pooi ne malep.
Ve ighaze yaam ve mbaliiŋ tiam tivot tinim naol, aghur lolomim pani malep. a 
11 Sawa naol, you nalooŋ Maaron isaav ighaze ye moghon to le tapiri tiina.

12 Tiina tiei, lolom ineep tuŋia ila to tamtoghon tiom ve uluul di irau sawa isob.
Ve yom ughur atia pa tamtoghon tisob itaghon ŋgar todi todi. b 
Copyright information for `TUCO