aIgham 14:22
bIgham 15:18
cYems 1:2+; 1Pe 1:7
dIs 43:2
eYo 9:31; Yems 4:3; 1Yo 3:22

Psalms 66

Tamtoghon to Maaron tipaiti pa uraat toni tintina

Yam to aneep irau taan isob, lolomim poia pa Maaron, ve alool ve apaiti.

Ambou ve apait iza pa tapiri ve poia toni.
Apaiti kat pasa, ye iza tiina.

Asaav pa Maaron aghaze: “Uraat tintina to yom ughamgham di, tamtoghon tighita di le timatughez.
Pasa, tapirim tiina le tiina kat.
Tauto koiamŋa timatughez payom kat, ve tiput aghedi ila naghom, ve titaŋroran ghom tighaze lolom isamin di.

Ve yes moghon maau. Tamtoghon to tineep tirau taan isob, pale tiput aghedi payom, ve timbou ve tipait ghom.
Lolodi poia ve timbou tapiridi pa tipait izam.”
Anim aghita uraat to Maaron ighami.
Ye igham uraat tintina pa iuul tamtoghon.
Uraat tonowen tipatooŋ katin tapiri. Tauto tamtoghon tighita di, le matughezaaŋ tiina igham di.

Muuŋ, ye ivalag te, le pida ila pa ŋas, pida ila pa waan, ve taan mamaasa ivot.
Tauto nditimbuud tilaagh titaghoni, ve tivool tila pa dige ite.
Tovenen iit lolood poia, ve tiniid iza pa ŋgar to ye igham padi tonowe. a 

Ye tapiri tiina kat. Pale igham pooz itaghoni taghoni gha ila.
Moghon moghon, ye mata pa tamtoghon to ndug ndug, ve iŋgagabiiz di.
Tovenen yam ndiran to zoraaŋ saveeŋ, azoor pooz toni muul malep. Aneep ila samba. b 

Yam ndug ndug, apait Maaron tiei pa poia toni.
Apaiti toman aliŋamim tiina, leso tamtoghon tilooŋ paitooŋ tiam.

Pasa, ye to ikiskis ghiit taneep mataad iyaryaar.
Ve ye iŋginŋgin ghiit, tauto tatap maau, ve tayoon ariaŋa.

10 Onoon kat, Maaron, yom utoov ghei pa pataŋani pida, leso ugham ghei niŋgalaaŋ ila matam, ninimale silva to tighuri ila yab, leso ighan muun ighau, ve iŋgalaaŋ kat. c 

11 Yom ugham ghei niŋgud malum tiom,
ve ughur pataŋani tiina kat iza tiei.

12 Yom upul koiamai tilib payei, ve karis todi to malmal tilaan tizala poghomai.
Pataŋani tiei, nene inimale nilaagh ila yab to ighanghan ne lolo, ve nilaagh ila yawaaŋa to tapiri tiina.
Eemoghon yom upas ghei nivot pa pataŋani tiei, ve ugham ghei nineep pooi, ve niraua kat pa mbeb to naol. d 
13 Sawa to naneep ila pataŋani lolo, you nasaav payom naghaze: “Ighaze yom uul ghou, you pale nagham watooŋrau payom.”
Tauto aazne, nataghon saveeŋ mbuaaŋ tiou tonenen,
ve nanim rumai tiom naghaze naghur watooŋrau tiou izala artaal, leso yab ighan suvuni.

15 You pale nagham mbeb tubudi, ve narab di tinim watooŋrau payom, ve yab ighan suvun di.
Yab pale ighan sipsip tiou nditamoot, ve vuzidi popoia izalat.
Ve tonene moghon maau. Pale nagham watooŋrau pa makau ve mekmek paam.
16 Yam to amatughez pa Maaron ve ataghon ŋgar toni, asob anim ve alooŋ saveeŋ tiou tonene.
You naghaze navotia uraat tiina to ye igham payou.

17 You nataŋ rorani pa ulaaŋ, ve avog ipaiti paam.

18 Sawa tonenen, inimale nakis ŋgar samia eta ineep ila lolog, tone Ŋgeu Tiina irau ilooŋ suŋuuŋ tiou maau. e 

19 Eemoghon ye ighur taliŋa payou, ve ilooŋ suŋuuŋ tiou.

20 Tauto napait Maaron pa poia toni.
Pasa, ye iyasiil pa suŋuuŋ tiou maau, ve ipas poia toni payou maau.
Ŋgar toni to lolo ineep tuŋia ila to tamtoghon toni ve iuluul di, tauto ipatooŋa payou.
Copyright information for `TUCO