aNam 6:24+
bTit 2:11
cMbo 65:11
dMt 28:19; Syg 7:9

Psalms 67

Yes Israela tipait Maaron pa taitaiŋ to ye igham padi

Ŋgeu to imuuŋ pa mbouŋ, irau isaav pa tamtoghon tirab gita ve timbou mbouŋ tonene. Timbou mbouŋ tonene pa tipait Maaron

Maaron igham poian ghiit ve ighur poia toni iza toit.
Pale lolo poia pait, ve ghazooŋa toni isul ghiit. a 

Leso tamtoghon to tineep tirau taan tiwatag ŋgar toni,
ve ndug ndug tighilaala tighaze ye moghon to irau igham mulin di. b 
Maaron, nighaze tamtoghon to ndug ndug tipakur ghom.
Ndug tisob tipait izam, ghoro poia!

Nighaze tamtoghon to ndug ndug lolodi poia, ve tilool ve timbou pa tapait ghom.
Pasa, yom uŋgagabiiz tamtoghon, ve ughagharaat pataŋani todi itaghon ŋgar deŋia.
Ve yom to ughamgham pooz pa ndug ndug to tineep tirau taan isob.
Maaron, nighaze tamtoghon to ndug ndug tipakur ghom.
Ndug ndug tipait izam, ghoro poia!
Taitaiŋ poia ivot ila taan toit wa.
Poia to Maaron toit pale ineep toman ghiit tovene itaghoni taghoni gha ila. c 
Onoon kat, Maaron ighur poia toni iza toit.
Leso tamtoghon to tineep tirau taan dige to naol ne timatughez pani, ve titaghon ŋgar toni. d 
Copyright information for `TUCO