aYo 8:46, 15:25
bMt 25:31+
cSyg 2:23
dMbo 90:9; Ro 1:18
eYems 1:14

Psalms 7

Mbouŋ to ŋgeu to koia tiŋgal saveeŋ pani

Mbouŋ to David

Ŋgeu eez, iza Kus. Pughu toni ivot ila to Benyamin. Ye iŋgal saveeŋ sorok pa David, ve David imbou mbouŋ tonene

Yoova, yom Maaron tiou. You nayooŋ ilat tiom.
Ndiran samsamia tigham taghon ghou tighaze tiwaghamun ghou. Uul ghou ve ugham mulin ghou ila nimadi.

Pa vene, tirab ghou, ve tiwaghamun ghou inimale laion isaas motin tamtoghon, le ŋgiira ŋgiira.
Pasa, leg itag ite eta pa igham mulin ghou maau.
O Yoova, Maaron tiou, ndiran to tighaze tigham samin ghou, you nagham sosor eta padi maau. a 

Tamtoghon to yeiŋa nimbua saveeŋ pa nilup ghei ninim ee moghon, you nagham ŋgar samia eta padi maau.
Ve yes to tighur koi payou sorok, you nayub mbeb todi eta maau.

Ighaze you nagham sosor tovene, nene poia pa koiagŋa tigham taghon ghou ve tikis ghou, ve tivazag ghou ila taan, ve nagheen izala ghavuur.
Yoova, umundig toman atem yabyab, ve ureu koiagŋa. Pasa, atedi yabyab kat payou.
Maaron tiou, umundig rikia moghon ve uul ghou. Ughur atia iŋarua koiagŋa pa ŋgar to tighami.

Uyou tamtoghon tisob tila tilup di ila naghom.
Uneep ila inam to ghamuuŋ pooz izi ndug sambam, ve ugham pooz padi. b 

Yoova, yom uŋgabiiz tamtoghon to ndug ndug, ve ughur atia padi.
Uŋgabiiz ghou ve upaghazoŋan ghou ila tamtoghon matadi, leso tiwatag tighaze you ŋgeu deŋiag, ve gabuag toman ŋgar tiou isob, nene poia moghon.

Maaron, ŋgar to yom ughamghami, nene deŋia moghon. Ve yom uwatag katin tamtoghon lolodi ve ŋgar todi.
Ndiran to tighamgham ŋgar samsamia, upasob ŋgar todi tonowen.
Ve upalot ndiran deŋiadi, leso tiyoon ariaŋa. c 
10 Maaron, yom moghon to unum sigeu payou.
Yes to ŋgar deŋia ineep tuŋia ila lolodi, yom ugham mulin di pa pataŋani todi.

11 Maaron, gabizooŋ tiom, nene deŋia moghon.
Ndag to naol ne, yom upatooŋ mbalmbali tiom pa ndiran samsamia. d 

12 Tamtoghon to ighaze itoor ŋgar toni maau,
nene pale Maaron ipot buza ve iyool pane toni pa ighur atia pani.

13 Tamtoghon tovene, Maaron igharaat ndaab toni pataghaaŋ pa irabi.
Ve igharaat pane natu toni ve itun mata pa yab, leso ivanegi.
14 Ndiran samsamia tinimale liva to apo ve ighaze ipoop. Pasa, lolodi ivon pa ŋgar samsamia naol to tighaze tigham pa tamtoghon.
Ve muri, ghoro ŋgar to ineep ila lolodi ne anoŋa ivot. Nene kaarom naol to tiwaghamun tamtoghon. e 

15 Ŋgeu to ighaze itai saambu pa tamtoghon eta, nene pale tau itap izila saambu tonenen.

16 Ŋgar samia to ye ighaze igham pa tamtoghon, nene pale imuul pa tau.
Ve malmal to ye ighaze igham padi, nene pale iwaghamun tau.
17 You lolog poia pa Yoova, ve napaiti pa ŋgar toni deŋia.
You nambou mbouŋ ve napait iza.
Pasa Yoova, ye Maaron tiina kat to ilib pa ndimaronŋa tisob.
Copyright information for `TUCO