aMbo 78:4

Psalms 71

Suŋuuŋ to olman waat eez to ghurla toni iyaryaaŋ kat

Yoova, you nanumeer ghom, ve nayooŋ ilat tiom.
Upul koiagŋa titatan ghou malep. Pasa, ighaze tilib payou, pale mayag.

Yom utataghon ŋgar deŋia. Tovenen uul ghou, ve upas ghou navot pa pataŋani tiou tonene.
Ughur taliŋam payou ve uul ghou lak.

Yom Volaaŋa tiou ariaŋa. Uponpoon ghou pa koiagŋa unumale raŋ to izala kat.
Ve unum ruum ariaŋa pa nayooŋ ila lolo.
Sawa isob, you irau naŋarua ghom, leso mbeb eta iwaghamun ghou sob, ve naneep pooi.
Aliŋam inim pataghaaŋ wa ughaze yom pale ugham mulin ghou.

Maaron tiou, ugham mulin ghou ila ndiran samsamia nimadi.
Pasa yes ndiran to sosor, ve lolodi isamin tamtoghon eta maau.
Ighaze tikis ghou, nene pale tiwaghamun ghou kat.
Yoova, you naghur matag payom pa uul ghou.
Tiina tiou, sawa to pain ghou ve inim, you nanumeer ghom.

Sawa to naneep ila tinaŋ apo ve inim, you naneep ila nimam.
Tovenen sawa to tinaŋ ipoop ghou, yom uŋgin ghou.
Tauto moghon moghon napapait ghom pa poia tiom.

Ival tiina tigham ŋgar naol payou. Pasa, tighita ŋgar to ivotvot payou ne, le tighilaal katin ghom.
Yom unum inag ariaŋa to yoŋgaaŋ.

Tovenen mboŋmaagh ila le rabrab izi, lolog poia kat payom, ve avog ipapait izam pa tapirim ve poia tiom.
Aazne, nanim olman waat wa. Eemoghon ughita ghou nanimale mbeb samia to tamtoghon tipiyaava ilale ne malep.
Tapirig isob wa. Upul murim payou malep.

10 Pasa koiagŋa tilup di, ve tikalkaal ataam pa tirab ghou namaat.
Sawa to tiyoŋyooŋ ve tisasaŋan pa rabuuŋ ghou, tisavsaav tighaze:

11 “Aa, Maaron ipul muri pani wa! Tataghoni ve takisi. Pasa, le tamtoghon eta pa iuuli maau.”
12 O Maaron, uneep saguan payou malep!
Maaron tiou, rikia unum uul ghou!

13 Koiagŋa to tiŋgal saveeŋ payou ne, ugham di mayadi, ve urab di le tisob.
Yes to tighaze tiwaghamun ghou ne, utatan di, ve ugham di mayadi kat.
14 Eemoghon you pale naghur matag payom irau sawa isob, ve nasaŋan ghom pa uul ghou.
You naghaze napait ghom le napait ghom kat.

15 Avog pale ivotia ŋgar tiom deŋia pa tamtoghon.
Mboŋmaagh ila le rabrab izi, you pale nasavia uraat tintina to yom ughamgham di ne pa uul tamtoghon.
Uraat tonowen, ighaze natoova pa nanin di, nene pale naraua maau.

16 Yoova, yom upatooŋ tapirim ila uraat tintina. Tovenen you pale nala ve navotia uraat tiom tonenen pa tamtoghon, leso matadi iŋgali.
Naghaze nasavia ŋgar deŋia to yom ughamghami.
Lolog pa nasavia mbeb ite paam maau. Naghaze nasavia ŋgar tiom deŋia moghon.
17 Sawa to pain ghou ve inim imuul aazne, yom upaghazoŋan ghou pa ŋgar tiom.
Tauto navovotia uraat tiom gharatooŋadi pa tamtoghon. Uraat tonowen, ite kat.

18 O Maaron, aazne nanim olman waat, ve moom iza pa dabag wa.
Eemoghon upul murim payou malep!
Uneep toman ghou le irau navotia tapirim ve uraat tiom tintina pa ndinatumai, nditimbumai, ve iseeŋga taghoni gha ila. a 

19 Maaron, tapirim ve ŋgar tiom deŋia, nene tiina le tiina kat. Izala izala le ikis sambam.
Ve uraat naol to yom ughamgham di ne, tovene paam. Nene tintina kat.
Sei to pale irau ghom? Eta maau.
20 Onoon, yom upul pataŋani naol tivot, ve tiwaghamun ghou.
Eemoghon yom pale ugham ghou naneep pooi muul.
Paam namaat nazila naal.
Eemoghon yom pale ugham mulin ghou. Irau namaat maau.

21 Ve yom pale upakur ghou, ve ugham izag ivot inim tiina,
ve urab ateg, leso lolog poia muul.
22 Tovenen you pale narab gita, ve napait izam.
Pasa, yom utataghon saveeŋ mbuaaŋ tiom.
Maaron tiou, yom Maaron patabuaŋ to yes Israela.
You pale narab gita tiou, ve nambou mbouŋ pa napait ghom.

23 Pale nalool ve nambou pa napait izam.
Pale napakur ghom toman lolog.
Pasa, yom to ugham mulin ghou pa pataŋani tiou.

24 Tovenen ndag to naol ne, mboŋmaagh ila le rabrab izi, you pale nasavia ŋgar tiom deŋia.
Pasa, yes to tighaze tiwaghamun ghou,
yom utatan di le tapiridi isob, ve upamuul di tila toman mayadi.
Copyright information for `TUCO