aMt 5:8
bMbo 37:1,7
cMbo 37:9-10, 35-36
dMbo 16:2; Pil 3:8

Psalms 73

Nepooŋ poia to ndiran samsamia itoov ŋgeu eez ghurla toni

Mbouŋ to Asap

Onoon kat, Maaron ighamgham ŋgar poia pa yes Israela.
Yes to ŋgar ŋgalaaŋa ineep ariaŋa ila lolodi, ye igham poian di kat. a 
Eemoghon you, sawa eez agheg kirikia, ve rismoghon tone natap.
Onoon kat, sawa tonenen, rismoghon tone napul ghurla tiou.

Pasa, naghita ndiran samsamia to tipapait taudi ve tiveleg Maaron, nepooŋadi poia kat.
Tovenen nagham ŋgar pa mbeb tonene, le irau lolog maau. b 
Yes titub le tinidi popoia kat. Ledi pataŋani maau, ve tineep poia moghon ila le irau mateeŋ todi.

Pataŋani naol to taan to tighamgham tamtoghon pida, nene tigham di maau.
Yes ledi pataŋani eta maau.

Ŋgar to paitooŋ taudi, nene tipatooŋa ivot ighazooŋ ila tamtoghon matadi, inimale namatavub to tamtoghon tighuri ila luadi.
Ve ŋgar todi to ghamuuŋ malmal, yes tipulpuli maau, inimale nonogiiŋa to moghon moghon tindud di pani.

Nepooŋ todi, poia moghon. Tovenen titub le paŋadi isarsar.
Lolodi ivon pa ŋgar samsamia naol, ve moghon moghon tikalkaal ataam pa tiwaghamun tamtoghon.

Yes tiveveleg tamtoghon, ve tipipiyaav saveeŋ samsamia padi.
Ve tipapait taudi izadi, ve tipamatughezan tamtoghon tighaze pale titatan di.

Yes tipakur taudi, ve tisasavia saveeŋ velegiiŋ pa Maaron to sambam.
Ve nditadi to tineep izi taan ne, ndiran tonowen matadi velegin di, ve tighaze titatan di.

10 Yes tiweu tamtoghon to Maaron paam, ve titaghon di pa ŋgar todi tonowen.
Ival tiina tighaze le tiloŋlooŋ saveeŋ todi.

11 Ndiran samsamia tonowen tisavsaav tighaze: “Ah, Maaron to ineep sala kat we, ye le ŋgar?
Ŋgar to nighamghami ne, Maaron iwatagi maau.”

12 Aghita. Ndiran samsamia, nepooŋadi tovene.
Ledi pataŋani eta maau, ve tindoundou ledi mbeb katindi.
13 Muuŋ, you nagham ŋgar tovene pa nepooŋadi. Tauto nasaav pa taug naghaze: “You tonene, nazuaria ghou naghaze le leg sosor eta sob, ve ŋgar ŋgalaaŋa moghon ineep ila lolog.
Eemoghon ŋgar to nataghoni ne, anoŋa eta maau.
Naghamghami sorok.

14 Pasa ndag to naol ne, mboŋmaagh ila le rabrab izi, Maaron ighurghur pataŋani payou.
Mboŋmaagh to naol ne, ye iloslos ghou.”
15 Maaron, ŋgar tiou samia tonene, inimale nasavia ivot ighazooŋ ve tamtoghon tilooŋa, tone nagham kaarom pa tamtoghon tiom, ve naghamun ŋgar todi. Tauto ineep to taug moghon.
16 You nagham ŋgar naol pa nepooŋ poia to ndiran samsamia, ve nakaal pughu. Eemoghon naraua maau.
Tauto igham lolog ipataŋan kat.

17 Muri ghoro, nalooŋ nala rumai patabuaŋ to Maaron, ve nasuŋ.
Sawa tonenen, ghoro naghilaal, ve ŋgar tiou ivot pa mbeb to muri pale ivot pa ndiran samsamia.
18 Onoon kat, yom pale ugham di tilaagh ila ataam to kirikirikia.
Leso ugham di titap, ve tisami.

19 Pale upasob di rikia moghon,
ve ureu mbirisan di tilaledi.
Ve mateeŋ todi, pale toman matughezaaŋ tiina. c 

20 Maaron, ighaze yom umundig ve uwaghamun di, nene pale upasob di kat. Eta irau ineep muul maau.
Pale tinimale mbeb to taghita ila vibiiŋ, ve mboŋmaagh tamundig lolood imaagh pani.
21 Sawa to nagham ŋgar pa ndiran samsamia, nene igham ghou lolog isami ve ateg yabyab.
Ŋgar tiou iwaghamgham nanimale borouŋa.
You nanimale ŋgai sagsag to le ŋgar payom maau.

23 Eemoghon yom upul ghou maau.
Yom unepneep toman ghou irau sawa isob, ve ukis nimag waan ve upalot ghou.
24 Yom ughamgham pooz payou, leso nataghon ŋgar tiom.
Ve muri, yom pale upakur ghou, ve ugham ghou nalat naneep toman ghom ila ŋgurubam lolo.

25 You nagham ŋgar pa mbeb eta to ndug sambam maau. Yom moghon to nagham ŋgar payom.
Yom unepneep toman ghou, tovenen nakaal sa mbeb muul izi taan? Maau.
Pasa, yom moghon to uraua. d 
26 Ighaze tapirig isob, ve ŋgar tiou iraua maau,
nene pale Maaron ipalot ghou.
You naghita Maaron naghaze ye mbeb tau.
You naghamgham tapirig ila toni, ve naneep ila toni. Ye inimale taan poia eez to tipuli payou, leso naneep ila.
27 Yes to lolodi ineep saguan payom, nene pale tilaledi.
Ve yes to tipul muridi payom, yom pale upasob di.

28 Eemoghon you, sawa to naneep nagharau ghom, nayamaana naghaze nene poia kat.
Yoova, yom Maaron tiou. You nanumeer ghom, ve nayooŋ ilat tiom.
You naghaze navotia uraat tisob to ughamgham di ne pa tamtoghon.
Copyright information for `TUCO