bMbo 11:3
cYo 10:34

Psalms 82

Maaron iyaan yes pooza to taan

Mbouŋ to Asap

Maaron ineep ila ina to ghamuuŋ pooz, ve yes daba to ndug sambam tilup di ila mata.
Ye ipayoon ndimaronŋa
(82:1) Ndiran ŋgara pida tighaze ndimaronŋa to mbouŋ tonene isavia di, nene aŋela pida to Maaron ighur di pa tiŋgin ndug ndug. Aŋela tonowen, tauto tighamgham pooz pa yes daba to taan. Maaron iyaan di pasa, tipamundigin yes daba to taan pa tigham pooz pooi itaghon ŋgar deŋia maau. Yes tipul daba to taan tigham ŋgar samsamia naol.

pa savsaveeŋ, ve iŋgabiiz di pa uraat todi. Ighaze:

“Yam tonene, ataam tiam to ghamuuŋ pooz, deŋia maau. Pale ŋeez o apul ŋgar tiam tonanan?
Sawa to daba to taan tigharaat saveeŋ to tamtoghon, yam apul di tivolvool to ndiran samsamia.

Yam irau apamundigin di, leso tigharaat saveeŋ to yes to tapiridi maau ve yes parooŋa, le deŋia moghon.
Ve tiyoon pa yes to tineep ila pataŋani lolo, ve yes to ledi ulaaŋ eta maau, ve tiuul di pa pataŋani todi.

Tovenen yes to tapiridi iraua maau, ve yes mbolaaŋa,
yam irau matamim padi, ve agham mulin di ila ndiran samsamia nimadi.
Eemoghon yam aghamgham tovene maau.
Lemim ghilalooŋ maau. Ŋgar tiam ivot sone.
Laghooŋ tiam, yam ataghon ŋgar to ndoroom.
Tauto ŋgar ve tutuuŋ naol to tinim pughu pa nepooŋ poia izi taan, yam awaghamun di le tisami kat. b 

Onoon, muuŋ you nawaat gham naghaze ndimaronŋa.
Ve nasaav payam naghaze yam asob anim Maaron Tiina To Ilib Pa Ndimaronŋa Tisob Ne ndinatu. c 

Eemoghon yam pale asob amatmaat animale ival tiina to taan.
Pale atap animale yes daba to taan, ve lemim izamim muul maau.”
O Maaron, umundig ve ughur atia pa ndiran samsamia to tineep izi taan.
Pasa, ndug tisob to taan toman mbeb todi, nene yom tiom.
Copyright information for `TUCO