aYo 14:27; Ro 5:1; 2Tes 3:16
bMbo 89:14; Ro 3:26
cMbo 67:6; Yems 1:17

Psalms 85

Maaron tamtoghon toni tighasoni pa iuul di, leso tineep poia muul

Nene mbouŋ to ŋgeu to imuuŋ pa uraat to mbouŋ

Mbouŋ to yes Kora

O Yoova, muuŋ yom ughamgham poian ndug tiom.
Yei to Yakop papaghu toni ne, sawa to nineep ila pataŋani lolo, yom uul ghei ve ugham ghei nineep poia muul.

Ve sawa to tamtoghon tiom tigham sosor, yom upul sosor todi.
Ŋgar todi to isosor ila matam, yom ureua isob ilale.

Yom utatan mbalmbali tiom,
ve lolom poia padi muul.
Ve aazne, nitaŋ roran ghom muul.
Maaron, yom Volaaŋa tiei. Matam imuul payei, ve uul ghei. Leso nineep poia muul.
Atem yabyab payei muul malep.

Vena, pale mbalmbali tiom izaza tiei irau sawa isob?
Pale inepneep tovene itaghoni taghoni gha ila?

Yei tamtoghon tiom. Tovenen matam imuul inim payei, ve upamundigin ghei muul.
Leso lolomai poia payom, ve nipait ghom.

O Yoova, lolom ineep tuŋia ila to tamtoghon tiom ve uluul di. Upatooŋ ŋgar tonenen payei muul, ve ugham mulin ghei. Leso nineep pooi.
You pale naghur taliŋag pa saveeŋ to Maaron ighaze ivotia pa tamtoghon toni.
Pasa, you nawatag: Yoova pale isavia saveeŋ luuma pait.
Tamtoghon toni to lolodi ineep tuŋia ila toni ve titaghon ataam toni, ye pale iuul di, leso tineep poia muul.
Eemoghon tipatum di. Ŋgar to borouŋa to muuŋ tighamghami, tighami muul malep. a 

Onoon kat. Yes to timatughez pa Maaron ve titaghon ŋgar toni, ye inepneep igharau di, ve isasaŋan pa iuul di.
Ye pale ineep toman ghiit, ve ipatooŋ tapiri ve poia toni ivot ighazooŋ izi taan tiei tonene.
10 Maaron lolo ineep tuŋia ila to tamtoghon toni ve iuluul di. Ve yes titaghon tutuuŋ toni. Tauto yesŋa tilup di tinim ee moghon.
Yes titaghon ŋgar deŋia, ve ye igham di tineep pooi toman lolodi luuma. Tauto lupuuŋ todi ee moghon. b 

11 Ŋgar to taghoniiŋ saveeŋ onoon, nene ivotvot izi taan.
Ve Maaron ineep izi sambam, ve mata pait itaghon ŋgar toni deŋia.
12 Onoon kat, Yoova pale igham lemai mbeb popoia.
Pale igham aniiŋ katindi tivot ila taan tiei. c 

13 Ŋgar deŋia, to imuŋmuuŋ pani, ve ighagharaat ataam pani pa inim.
Copyright information for `TUCO