aMt 4:6; Lu 4:10; Hib 1:14
bMk 16:18; Lu 10:19

Psalms 91

Maaron inim inaad to yoŋgaaŋ

Ighaze ŋgeu eta iyooŋ ila to Maaron Ariaŋa To Ilib Pa Ndimaronŋa Tisob, ye pale ineep pooi ila Maaron samba.

Ye irau isaav pa Yoova ighaze: “Maaron tiou, you nanumeer ghom.
Yoova, yom unum inag to yoŋgaaŋ, ve uponpoon ghou pa koiagŋa unumale didiiŋ ariaŋa.”
Onoon kat, ye pale ipaghau aghem pa liis to koiamŋa tighuri payom.
Ve ipaghau moroghooŋ samia payom.

Pale iŋgin ghom ila nima samba inimale tatareek ipakud ndinatu ila bage samba.
Yes to tiyooŋ ila toni, pale tineep pooi. Pasa, ye itataghon saveeŋ mbuaaŋ toni.
Ŋgar tonenen pale inim sigeu payom, ve ipoon ghom pa mbeb samsamia.
Tovenen yom irau umatughez pa mbeb samsamia to mboŋ maau.
Ve ndag paam, irau umatughez pa koiamŋa pane todi ndinatu maau.

Tovenen moroghooŋ samsamia to ighamgham tamtoghon pa mboŋ, ve pataŋani to irabrab di pa ndag, yom irau umatughez padi maau.

Ighaze tamtoghon ndiŋndiŋ eez (1000) timatmaat ve titaptap ila digem, ma tamtoghon ndiŋndiŋ saaŋgul (10,000) to tiluvut ghom timatmaat, yom umatughez malep.
Pasa, mbeb samia eta irau inim igharau ghom maau.

Atia to iza to ndiran samsamia, yom pale unepneep, ve ughita katini pa taum matam.

Pasa, yom uyoŋyooŋ ila to Yoova, ve ye inim inam to nepooŋ.
Maaron Tiina To Ilib Pa Ndimaronŋa Tisob iŋgin ghom. Tauto uneep pooi ila samba.

10 Tovenen mbeb samia eta irau iwaghamun ghom maau,
ve moroghooŋ samia eta irau igharau inam to nepooŋ maau.
11 Pasa, Maaron pale imbaaŋ aŋela toni pa tiŋgin ghom.
Ndug sine to ughaze ula pani, yes pale matadi payom.

12 Pale tikis ghom pa nimadi, ve tipalot ghom.
Leso utut aghem ila yaam sob. a 

13 Ighaze utut laion paghu, ma uvazag moot samia eta, nene irau tigham mbeb eta payom maau. b 
14 Pasa, Yoova isaav ighaze: “Yes to lolodi ineep tuŋia inim tiou ve titaghon ataam tiou, you pale napas di tivot pa pataŋani todi.
Ve you pale naghur di tizala sala, ve matag padi. Leso mbeb eta iwaghamun di sob.
Pasa, yes tiwatag ghou, ve lolodi ineep tiou.

15 Ighaze titaŋ roran ghou, you pale nalooŋ di.
Sawa to tineep ila pataŋani lolo, you pale naneep toman di.
Pale nauul di, ve napakur di.

16 You pale naseeŋ sawa todi ila mala, leso tineep toman lolodi poia.
Ve napatooŋ ulaaŋ tiou ivot ighazooŋ padi.”
Copyright information for `TUCO