aIgham 15:18; Mbo 93:1
bIgham 19:16+; Mbo 89:14
cMbo 46:2,6
dPil 3:1, 4:4

Psalms 97

Maaron, ye kinik tiina to ilib pa ndimaronŋa tisob

Yoova, ye kinik tiina to iŋgin mbeb tisob.
Tovenen yam tamtoghon to aneep irau taan, lolomim poia.
Ve yam mutua tovene paam, tinimim iza. a 

Yoova iŋgozgooz tau ila yaghur tae asosooŋa, ve ndoroom ikaui.
Ŋgar deŋia toman ŋgar to ulaaŋ, tauto inim pughu pa pooz toni. b 

Ye igham yab ighan imuuŋ pani,
ve ighan koia tisob.

Ye igham ndug milia irau taan.
Tovenen taan ighita, ve irur.

Yoova, ye tiina to iŋgin taan isob.
Sawa to ye inim ve ipatooŋ tapiri, lolooz tisob tireer, ve timbiriis ila nagho. c 

Mbeb naol to tineep ila sambam paroŋania, tipatooŋ Yoova tighaze ŋgar toni deŋia moghon.
Ndug tisob tighita mbeb tonowen, ve tighilaal Yoova tighaze ye iza tiina.
Tamtoghon tisob to timbesmbees pa maaron kaaromŋa anunudi, Yoova igham di mayadi. Pasa, maaron kaaromŋa todi tirau mbeb eta maau.
Maaron todi tonowen pale tisob tiput aghedi pa Yoova, ve tipaiti.
Maaron, yes to ndug Zion tilooŋ varum pa uraat to yom ughamghami, le lolodi poia.
Ve ndug ndug to Yuda paam, tisob tinidi iza.
Pasa, yom uyondyood pa tamtoghon tiom, ve uluul di pa pataŋani todi.

Yoova, yom Maaron Tiina. Tamtoghon tisob to taan tineep ila sambam.
Yom izam tiina le tiina kat. Ulib pa ndimaronŋa tisob.
10 Yoova lolo pa yes to tighurghur koi pa ŋgar samia.
Tamtoghon toni to lolodi ineep tuŋia ila toni, ve titaghon ataam toni, ye inim sigeu padi, leso mbeb eta iwaghamun di sob.
Ve ighamgham mulin di ila ndiran samsamia nimadi.

11 Ye ighurghur ghazooŋa pa ndiran deŋiadi.
Yes to ŋgar deŋia ineep tuŋia ila lolodi, ye igham di lolodi poia kat.

12 Yam ndiran deŋiamim, tinimim iza pa Yoova!
Apaiti pa poia toni, ve apakur iza patabuaŋ! d 
Copyright information for `TUCO