bDan 7:2+; Syg 11:7
dDan 7:4+; Syg 12:3
eMbnp 3:15; Syg 17:8
fDan 7:8,25, 11:36; Syg 11:2
gDan 7:21
hLu 10:20; Ep 1:4; Syg 17:8, 20:12+
iYer 15:2, 43:11; Mt 26:52; Hib 6:12; 1Pe 4:19; Syg 14:12
kMt 7:15, 24:11
lLo 13:1+; Mt 24:24; 2Tes 2:9+
mDan 3:4+
nSyg 14:9+, 16:2, 19:20, 20:4

Revelation of John 13

Mbeb samia iza pa te

Ghoro matag ila le naghita mbeb samia eez
(13:1) Mbeb samia tonene avaat iza to gavman samsamiadi to tighaze tigham tamtoghon to Maaron tipul ghurla todi. Tovenen tighurghur pataŋani padi, ve tirab di timatmaat. Sawa to Yoan, gavman to Rom tighamgham tovene.


ineep te lolo ve bokia iza. Mbeb tonowen, daba liim ve ru, ve ndooŋa saaŋgul. Ndooŋ toni saaŋgul tonowen, moghar saaŋgul tinimale moghar to yes kinik tineep ila. Ve timbood saveeŋ naol ila daba liim ve ru tinim mbeb tonenen iza. Iza naol tonowen, ighaze ŋgeu eta to taan igham di, nene iveleg Maaron ve ipait tau sorok inimale ye Maaron. b 

Mbeb samia to you naghita, nagho inimale lepad, aghe inimale bea, ve avo inimale laion.
(13:2) Lepad, bea, ve laion, nene mbeb samsamia tol to tintinadi kat, ve tirabrab tamtoghon timatmaat.


Ghoro moot ighur tapiri ve iza ila toni, ve ighuri ineep ila tau ina to ghamuuŋ pooz, ve ighur mbeb naol to taan tila mbeb tonenen samba, leso iŋgin di. d 

Ve naghita mbeb tonenen daba eez, sip ineep ila. Pasa, muuŋ tirabi imaat. Eemoghon imundig muul toman tini poia. Tamtoghon to tineep izi taan ve titaghon ŋgar to taan, tisob ruŋadi iza pa mbeb tonenen ve titaghoni. e 

Ve tiput aghedi pa moot ve tipaiti. Pasa, ye to ighur tapiri ve iza ila to mbeb tonenen. Ve mbeb samia tonenen paam, tiput aghedi pani ve tipaiti tighaze: “Aighat, sei irau mbeb tonene? Ve sei irau iparab tomani ve ilib pani? Maau.”

Maaron ipul mbeb samia tonenen iŋgin ndug irau kaiyo tamoot ru avua ru (42). Sawa tonenen, mbeb tonenen ipapait tau iza, ve ipiyaav saveeŋ velegiiŋ naol pa Maaron. f 

Tovenen ikaak avo, ve isavia saveeŋ velegiiŋ naol pa Maaron. Iveleg Maaron iza, iveleg ina to nepooŋ, ve iveleg yes to tinepneep toman Maaron izi sambam ne paam. Ve Maaron ipul mbeb tonenen iparab toman tamtoghon toni patabuaŋa le ilib padi. Ve ighur tamtoghon tisob tineep ila mbeb tonenen samba, leso iŋgin di. Tinidi, toman gabuadi, aliŋadi, ve ndug todi, naol naol. g 

Ve ival tiina to taan tiput aghedi pa mbeb tonenen ve tipaiti. Nene yes to izadi ineep ila rau to nepooŋ mataad yaryaara maau. Rau tonowen, Sipsip to Maaron to tirabi imaat, iŋgini. Muuŋ kat, sawa to Maaron ighur sambam ve taan sone, ye imbood tamtoghon toni izadi ila rau tonenen pataghaaŋ wa. h 

Tamtoghon to ighaze le taliŋa, ye irau ilooŋ saveeŋ tonene, ve igham ŋgar pani pooi.

10 Sawa to mbeb samia tonenen igham pooz, yes to Maaron ighur di pa tilooŋ tila ruum to yabyabuuŋ, nene pale tilooŋ tila ruum to yabyabuuŋ itaghon ŋgar toni. Ve yes to ye ighur di pa timaat pa buza, nene pale timaat pa buza. Tovenen Maaron tamtoghon toni patabuaŋa irau tikis ghurla todi tuŋia, ve tiyoon ariaŋa pa badooŋ pataŋani. i 

Mbeb samia ite to ineep taan lolo ve iza

11 Ghoro matag ila le naghita mbeb samia ite ineep taan lolo ve iza. Ndooŋa ru inimale sipsip. Eemoghon saveeŋ toni, nene raraate inimale moot.
(13:11) Mbeb samia ite to saveeŋ waaro tonene isavia, avaat iza to propet kaaromŋa to tighamun tamtoghon ŋgar todi, ve tighereb di pa ghamuuŋ ŋgar to Sadan.


12 Ye igham ita ite to ivot muuŋ ne nagho, ve ighereb ival tiina leso tineep ila mbeb tonowen samba. Tovenen tamtoghon tisob to tineep izi taan ve titaghon ŋgar to taan, ye igham di tiput aghedi pa mbeb samia to ivot muuŋ, ve tipaiti. Nene ye to tirabi imaat, ve imundig muul. k 

13 Mbeb samia to inim ru pani, Maaron ipuli igham mbeb gharatooŋadi tintina tivotvot. Tauto ighereb tamtoghon ve titaghon ita ite to ivot muuŋ ne pa ŋgar toni. Ye irau igham yab ineep sambam ve izi inim taan ila tamtoghon matadi. Kaarom toni tonowen ighamun tamtoghon to taan ŋgar todi. Tauto tigharaat ita ite to ivot muuŋ ne anunu ve tipaiti. Nene ye to tirabi imaat, ve imundig muul. l 

15 Ve Maaron ipul mbeb samia to inim ru pani igham mbeb gharatooŋa ite. Ye igham ita ite anunu to tigharaata ne le yaghur, leso isavsaav inimale mbeb to ineep mata iyaryaar. Ve yes to tiput aghedi pa anunu tonowen maau, nene pale anunu tonenen isaav, ve tirab di timatmaat. m 

16 Ve ye iyou tamtoghon tisob, ve izoorndug padi ighaze tigham ita ite to ivot muuŋ ne mboom toni ila nimadi waan ma ndamodi inim ghilalooŋ padi. Yes to izadi tintina, ve yes to ledi izadi maau, yes mbaliiŋ taudi ve yes mbolaaŋa, yes mbesooŋa ve yes to mbesooŋa maau ne. 17 Ve tighur tutuuŋ ariaŋa tovene: Yes to ledi ghilalooŋ tonowen, yes moghon to irau tighol mbeb ve tigholia mbeb todi. Ve ighaze maau, nene pale maau. Ghilalooŋ tonowen, nene mbeb samia to ivot muuŋ ne iza. n 

18 Ighaze taghazooŋ pa Maaron ŋgar toni, nene pale tawatag mbeb tonene pughu. Tovenen tamtoghon to le ŋgar, nene pale iwatag ataam to niniiŋ mbeb samia tonowen iza, ve ighilaal pughu. Ghilalooŋ toni, nene 666. Ve nene ghilalooŋ to tamtoghon.
(13:18) Ndiran ŋgara pida matadi iŋgal tighaze: 7, nene iza to mbeb to poia kat ve deŋia moghon. Tovenen 7, nene Maaron namba toni. Ve 6, nene iza to mbeb to izuaria tau kat ighaze le inim Maaron tau, eemoghon iraua maau. Tovenen 666, nene iza to yes to tiveleg Maaron, ve tipait taudi izadi tighaze le tigham Maaron ina. Muuŋ ve inim, daba pida to taan tigham ŋgar tovene. Ve sawa to Yoan paam, kinik tiina to Rom igham ŋgar tovene. Ŋgara pida tighaze namba 666 iŋarua kinik samia eez to yes Roma, iza Nero. Pasa, yes Israela ledi ataam to niniiŋ leta to tineep ila tamtoghon izadi. Ve ighaze tanin leta to Nero iza itaghon ataam todi, nene ivot inim 666.


Copyright information for `TUCO