aSyg 11:18
bSyg 4:6, 12:11, 13:15+
dIgham 15:1+; Lo 32:4+; Mbo 111:2
eMbo 86:9
fSyg 11:19
gIgham 40:34

Revelation of John 15

Aŋela liim ve ru tikis pataŋani liim ve ru

Ghoro matag ila le naghita mbeb tiina ite ivot izi sambam inim ghilalooŋ. Ghilalooŋ tonowen, ite kat. Nagham ŋgar pani le naraua maau. Naghita aŋela liim ve ru tikis pataŋani liim ve ru to samsamiadi kat. Pataŋani tonowen pale tivot pa tipasob mbalmbali to Maaron. a 

Tamtoghon to Maaron tipait iza ila mbouŋ

Ve naghita mbeb ite. Tigharaata pa galas toman yab, ve ghitooŋa inimale te. Ve Maaron tamtoghon toni tiyoon ila dige. Nene yes to tiyoon ariaŋa, ve tilib pa mbeb samia toman anunu, ve namba to inim ghilalooŋ pa iza. Yes tiput aghedi pani maau, ve tigham namba toni maau. Yes tikis gita to Maaron igham padi, ve tipait Maaron iza ila mbouŋ. b 

Yes timbou mbouŋ to Mose, ye mbesooŋa to Maaron. Mbouŋ tonowen iŋarua Sipsip to Maaron paam.
(15:3) Muuŋ, yes Israela tiyoon ila Te Kaviaaŋa dige ve tipait Maaron iza ila mbouŋ pa ulaaŋ toni. Tamtoghon to saveeŋ waaro tonene isavia di, tovene paam. Tipait Maaron iza ila mbouŋ. Pasa, Sipsip to Maaron igham mulin di, ve ighur atia pa koiadi.


Timbou tovene:

“O Maaron, Tiina tiei, tapirim ilib pa mbeb to naol ne.
Uraat to yom ughamgham di, nene tintina kat. Nigham ŋgar padi le niraua maau.
Yom kinik tiina kat to uŋgin ndug tisob. Ve ŋgar tiom, nene deŋia ve onoon moghon. d 

Tiina tiei, yom moghon to patabuaŋ. Tovenen tamtoghon tisob irau timatughez payom ve titaghon ŋgar tiom, ve tipait izam pa tapirim ve poia tiom.
Ndug naol pale tisob tinim tiput aghedi payom, ve tipait ghom. Pasa, ŋgar tiom to ughurghur atia pa tamtoghon, tauto upatooŋa ivot ighazooŋ wa.” e 

Oon liim ve ru to tivon pa mbalmbali to Maaron

Muri ghoro, matag ila le naghita mbeez patabuaŋ to inim rumai izi sambam. Lolo to patabuaŋ kat ne, ataama ikaak. Nene lolo to saveeŋ mbuaaŋ to Maaron toman tutuuŋ toni ineep ila. f 

Aŋela liim ve ru to naghita di muuŋ, tineep mbeez tonowen lolo ve tivot. Yes tikis pataŋani liim ve ru to samsamiadi kat, le irau di. Aŋela tonenen nonogiiŋa todi ŋgalaaŋa ve milmilia kat. Ve mbeb milmilia to tigharaat di pa gol, tineep tiluvut atedi. Ghoro mbeb matadi yaryaara paaŋ, todi eez irei oon geegeu liim ve ru, le irau di. Oon liim ve ru tonowen, tigharaat di pa gol, ve tivon kat pa mbalmbali to Maaron to ineep irau sawa isob. Ve Maaron ŋguruba ve tapiri toman mbuasa ivot, le ipavonin Rumai Tiina to iyoon izi sambam ne lolo. Tauto eta irau ilooŋ ila maau. Pale tineep ve tisaŋan, le aŋela liim ve ru tonenen tipasob uraat todi to ghuruuŋ pataŋani pa tamtoghon le isob, ghoro tilooŋ tila. g 

Copyright information for `TUCO