b2Kor 11:13; 1Yo 4:1
cHib 10:36, 12:3+
dHib 10:32+
fMbnp 2:9, 3:22; Syg 22:2,14
gSyg 1:18
hYo 8:39+; Ro 2:28+; Yems 2:5
i2Tim 4:8; Yems 1:12
jSyg 20:6,14, 21:8
kSyg 1:16
mNam 22:5, 25:1+, 31:16; 2Pe 2:15
nSyg 1:16, 19:15,21
oIgham 16:14+; Is 62:2; Yo 6:48+; Syg 3:12, 22:4
pSyg 1:14+
q1King 16:31+; Mbaŋ 15:29; 1Kor 10:19+
sRo 2:4; Syg 9:20+
uMbo 7:9; Ro 2:6; 2Kor 5:10; Syg 20:12+
vMbo 2:8+; 1Kor 6:2+; Syg 20:4
xNam 24:17; Is 60:1-3; 2Pe 1:19; Syg 22:16

Revelation of John 2

Krisi aliŋa iŋarua lupuuŋ to ndug Epesus

Ŋgeu tonowen isaav payou muul ighaze: “Aŋela to iŋgin lupuuŋ tiou to tineep izi ndug Epesus, umbood saveeŋ ila pani tovene:

‘Ŋgeu to ikis pitum liim ve ru ila nima waan, ve ilaghlaagh ila lam aia milmilia liim ve ru lolodi, aliŋa ilat payom ighaze:

‘Ŋgar ve uraat naol to yom
(2:2) Saveeŋ to Yoan imbooda pa lupuuŋ liim ve ru to Krisi, ighaze ughita saveeŋ ‘yom’ ineep ila, ugham ŋgar ughaze saveeŋ iŋarua tamtoghon ee moghon malep. Saveeŋ toni iŋarua tamtoghon tisob to lupuuŋ eŋaeŋa.


ughamgham di, you nawatag di tisob. Yom urab taum pa uraat tiou, ve uyoon ariaŋa pa badooŋ pataŋani. Ve yes to tighamgham ŋgar samia, yom ughurghur di maau. Ve yes to titoom tighaze yes mbaŋooŋa to Krisi, yom uŋgabiiz katin di, ve ughilaal di ughaze yes ndiran to kaarom. b 

Pataŋani naol tivotvot payom pasa, yom utaghon ghou ve uvotia izag. Eemoghon uyasiil maau. Tinim iza ve uyoon ariaŋa. c 

‘Eemoghon mbeb eez, to you narere ghom pani. Sawa to ughur inim tiou muuŋ, lolom payou kat. Eemoghon aazne, lolom payou kat maau. Matam iŋgal ŋgar to muuŋ ughami. Pasa aazne, yom utap tiina. Tovenen utoor ŋgar tiom, ve utaghon ŋgar to papazogi ughami. Ighaze maau, you pale nalat ve napas lam tiom aia ighau pa ina. d 

Ve ŋgar tiom ite to you naghita poia, nene vene: Yes to titaghon ataam ru tinimale Nikolas,
(2:6) Nikolas, ye ŋgeu eez to muuŋ isavsaav pa yes Kristen tovene: Ighaze tila toman yes to tikankaan pa Maaron pa ŋgar todi, ma tighur maat, ma tighan aniiŋ to tipait maaron kaaromŋa pani, nene mbeb sorok. Maaron irau mata ila pa ŋgar todi tonowen maau.


yom ughur koi pa ŋgar todi tonowen animale you.

‘Tamtoghon to ighaze le taliŋa, ye irau ilooŋ saveeŋ to Maaron Avuvu isavia pa lupuuŋ to Krisi. Ighaze tamtoghon eta iyoon ariaŋa ve ilib pa tovaaŋ, you pale nayok pani, pa ighan ai anoŋa ila ai to iyoon ila uum to Maaron lolo. Leso ineep mata iyaryaar le alok.’ f 

Krisi aliŋa iŋarua lupuuŋ to ndug Smerna

“Aŋela to iŋgin lupuuŋ tiou to tineep izi ndug Smerna, umbood saveeŋ ila pani tovene:

‘Ŋgeu to ineep muŋgaaŋ, ve ineep muri kat, aliŋa ilat payom. Ye to imaat ve imundig mata iyaryaar, isaav payom ighaze: g 

‘You nawatag: Pataŋani naol toman mbolaaŋ tiina igham ghom. Eemoghon you naghita ghom naghaze yom uraua kat pa ŋgar naol to Maaron. Ve you nawatag: Yes Yuda pida to yamŋa anepneep, tiŋgal saveeŋ naol payom. Onoon, ndiran tonowen tiparim taudi tighaze yes Yuda. Eemoghon yes Yuda tau maau. You naghita di naghaze yes lupuuŋ to Sadan. h 

10 You nasaav payom: Mala maau pale pataŋani ite paam ivot payom. Eemoghon umatughez malep. Ŋgeu Samia pale ipazaagh tamtoghon ve tighur tamtoghon tiom pida tilooŋ tila ruum to yabyabuuŋ. Pataŋani tonenen pale itoov ghurla tiam. Eemoghon pale igham gham irau mboŋ saaŋgul moghon, ve isob. Tovenen akis ghurla tiam tuŋia le sawa tiam to mateeŋ. Leso nagham lemim atia to yes to tiyoon ariaŋa ve tilib pa tovaaŋ. Atia tonowen, nene nepooŋ to taneep mataad iyaryaar le alok. i 

11 ‘Tamtoghon to ighaze le taliŋa, ye irau ilooŋ saveeŋ to Maaron Avuvu isavia pa lupuuŋ to Krisi. Ighaze tamtoghon eta iyoon ariaŋa ve ilib pa tovaaŋ, ye pale ineep pooi. Pasa, mateeŋ to inim ru pani, nene irau igham mbeb eta pani maau.’ j 

Krisi aliŋa iŋarua lupuuŋ to ndug Pergamum

12 “Aŋela to iŋgin lupuuŋ tiou to tineep izi ndug Pergamum, umbood saveeŋ ila pani tovene:

‘Ŋgeu to aliŋa ilat payom, buza toni mata kat. Ve buza tonowen, ye mata ru. Ye isaav payom ighaze: k 

13 ‘You nawatag: Sadan ina to ghamuuŋ pooz ineep izi ndug to yom uneep pani, ve ye ighamgham uraat toman tapiri tiina tonanan.
(2:13) Artaal tiina kat to maaron kaarom to yes Grika, iza Zeus, iyoon izi Pergamum. Artaal tonowen, ghitooŋa inimale kinik ina to ghamuuŋ pooz. Ve rumai tiina eez to yes Roma iyoon izi Pergamum paam. Pasa, yes Roma tighaze tamtoghon tisuŋ pa kinik to Rom ve tipaiti inimale ye Maaron.


Muuŋ, tamtoghon tiom eez, iza Antipas, lolo ee moghon ve ipariaaŋ saveeŋ tiou. Imatughez maau, ve ipul muri payou maau. Tauto tirabi imaat izi ndug tiam. Eemoghon sawa tonenen, yom upul ghurla tiom maau. Ve aazne paam, yom ukiskis izag sone.

14 ‘Eemoghon ŋgar tiom pida, you narere ghom pani. Pasa, tamtoghon tiom pida, titaghon ŋgar to Balam. Nene nasavia yes to titaghon Nikolas toman ndita ŋgar todi. Matam iŋgal. Muuŋ, Balam ipatooŋ Balak pa ataam to iweu yes Israela pa ghamuuŋ ŋgar samia. Tauto igham di titap pa ghurla todi, ve tighur muridi pa Maaron, ve tighan aniiŋ to tipait maaron kaaromŋa pani, ve tighur maat. m 

16 Tovenen utoor ŋgar tiom. Ighaze maau, you pale nalat tiom rikia moghon, ve naparab toman ndiran tonanan pa buza to ineep ila avog ne. n 

17 ‘Tamtoghon to ighaze le taliŋa, ye irau ilooŋ saveeŋ to Maaron Avuvu isavia pa lupuuŋ to Krisi. Ighaze tamtoghon eta iyoon ariaŋa ve ilib pa tovaaŋ, you pale nagham a aniiŋ manna to ineep iyooŋ izi ndug sambam. Ve nagham le yaam pisosooŋa eez to timbood iza paghu ila. Iza tonowen, eta iwatagi maau. Tamtoghon to igham yaam pisosooŋa tonowen, ye moghon to pale iwatagi.’ o 

Krisi aliŋa iŋarua lupuuŋ to ndug Tiatira

18 “Aŋela to iŋgin lupuuŋ tiou to tineep izi ndug Tiatira, umbood saveeŋ ila pani tovene:

‘Maaron Natu, mata inimale yab yama, ve aghe milmilia inimale mbaras to yab ighani le muun ighau ve ŋgalaaŋa kat. Aliŋa ilat payom ighaze: p 

19 ‘Ŋgar ve uraat naol to yom ughamgham di, you nawatag di tisob. Yom lolom payou ve tamtoghon paam. Ve ughur inim tiou ariaŋa, ve umbees payou kat, ve uyoon ariaŋa pa badooŋ pataŋani. Ve uraat tiom to aazne, nene ilib pa uraat to ugham di muuŋ.

20 ‘Ve mbeb ee moghon to you narere ghom pani. Liva samia eez ineep toman ghom. Ye iwaat tau ighaze ye propet to Maaron. Eemoghon ŋgar toni, nene inimale Yezebel to muuŋ ighamun ŋgar to yes Israela. Saveeŋ kaarom to ye ivovotia, nene ipaghau mbesooŋa tiou pa ataam tiou. Tauto matadi samia tinimale ŋgavuun, ve tighanghan aniiŋ to tipait maaron kaaromŋa pani. Ve yom neneeŋam pani moghon. Ugham ŋgar eta pani maau. q 

21 You naghur soso pani naghaze itoor ŋgar toni ve ipul ŋgar toni to ghuruuŋ maat.
(2:21) Saveeŋ tonene, avaat saveeŋ palelaaŋ. Saveeŋ waaro naol to buk tonene to tisavia ŋgar to ghuruuŋ maat, nene ŋgaradi tovene: Tamtoghon tighur muridi pa Krisi ve timbees pa maaron ite tinimale liva to ipul azuwa ineep, ve ighur maat toman tamoot ite. Liva samia to Krisi isavia, ye iweuweu yes Kristen to ndug Tiatira ve timbesmbees pa maaron kaaromŋa pida, inimale muuŋ kinik Ahab azuwa Yezebel iweua ve ipul muri pa Yoova, ve imbees pa maaron kaarom Baal.


Eemoghon ye lolo pa itoor ŋgar toni ve ipul ŋgar samia tonowen maau. s 

22 Tovenen you pale nagham moroghooŋ samia ivot pani. Ve yes to tiluplup tomani pa ŋgar toni samia ne paam. Ighaze titoor ŋgar todi maau, nene pale naghur pataŋani tiina iŋarua di. 23 Ve Yezebel ndinatu paam,
(2:23) Yezebel ndinatu, nene yes to titaghoni pa ŋgar toni.


you pale narab di tisob timatmaat. Leso lupuuŋ to Krisi tisob tiwatag tighaze you natirtiir tamtoghon lolodi ve ŋgar todi. Ve you pale naghur atia iŋarua yam eŋaeŋa itaghon ŋgar tiam tiam. u 

24 ‘Eemoghon yam pida to ndug Tiatira ataghon Yezebel ŋgar toni maau. Ve saveeŋ toni to tiwaata tighaze “Sadan ŋgar toni yoŋgaaŋ,” yam awatagi maau. Tovenen you nasaav payam naghaze irau naghur pataŋani ite paam iza tiam maau. 25 Eemoghon yam irau ayoon ariaŋa, ve akis ŋgar to Maaron to ineep tiam ne tuŋia, le sawa to namuul nanim.

26 ‘Ighaze tamtoghon eta iyoon ariaŋa ve ilib pa tovaaŋ, ve itaghon ŋgar tiou le indeeŋ sawa toni isob, nene pale naghur ndug ndug tineep ila samba ve igham pooz padi, inimale Tamaŋ Maaron ighur di tineep ila you sambag. Ve pooz toni pale iyaryaaŋ kat. Ye pale irab matin ndiran samsamiadi tapiridi, inimale tamtoghon to irab balagin uur ve imbiriis. v 

Ve you pale nagham pitum Daga to mboŋmaagh pa tamtoghon tonenen paam.
(2:28) Pitum Daga to mboŋmaagh, nene iza to Krisi ve sawa paghu to pale ivot pa Mboŋ Muri.
,
x 

29 ‘Tamtoghon to ighaze le taliŋa, ye irau ilooŋ saveeŋ to Maaron Avuvu isavia pa lupuuŋ to Krisi.’

Copyright information for `TUCO